ແມັກເກເກີ ປະກາດເລີກເປັນນັກສູ້ MMA
ຄໍເນີ ແມັກເກເກີ ຍອດນັກສູ້ແບບ MMA ປະກາດເລີກເປັນນັກສູ້ ຜ່ານທາງທະວິດເຕີ ທັງທີ່ກ່ອນໜ້ານີ້ຫາກໍໃຫ້ສຳພາດວ່າກຳລັງເຈລະຈາເພື່ອຂຶ້ນສູ້ຄັ້ງໃໝ່ຢູ່.
ຄໍເນີ ແມັກເກເກີ ນັກສູ້ປະເພດສິລະປະການຕໍ່ສູ້ປ້ອງກັນຕົວແບບປະສົມ (MMA) ລະດັບໂລກ ປະກາດເລີກເປັນນັກສູ້ດ້ານນີ້ຢ່າງເປັນທາງການຜ່ານທາງທະວິດເຕີ ເຄືອຂ່າຍສັງຄົມອອນລາຍຍອດຮິດ ໃນວັນທີ 26 ມີນານີ້.
ແມັກເກເກີ ຖືເປັນຍອດນັກສູ້ປະເພດ MMA ຄົນໜຶ່ງຂອງຍຸກນີ້ ໂດຍກ່ອນໜ້ານີ້ລາວມີສະຖິຕິຊະນະ 21 ຄັ້ງ ແລະ ເສຍ 4 ຄັ້ງ ແລະ ລາວຍັງເຄີຍຂຶ້ນຊົກມວຍຄັ້ງພິເສດກັບ ຟລອຍ ເມເວດເທີ ຈູເນຍ ມາແລ້ວ ກ່ອນສຸດທ້າຍຈະເສຍ.
ທັງນີ້ ຖືເປັນການປະກາດທີ່ເຮັດໃຫ້ຫລາຍຄົນຊັອກ ເພາະບໍ່ເທົ່າໃດຊົ່ວໂມງກ່ອນໜ້ານີ້ ລາວຍັງໃຫ້ສຳພາດໃນລາຍການໜຶ່ງວ່າ: ກຳລັງຢູ່ລະຫວ່າງການເຈລະຈາເພື່ອຂຶ້ນຊົກຄັ້ງຕໍ່ໄປ ໂດຍເລັ່ງຈະໃຫ້ມັນມີຂຶ້ນໃນໄລຍະເດືອນກໍລະກົດນີ້ ພ້ອມປະກາດວ່າສະພາບຮ່າງກາຍຂອງລາວພ້ອມແລ້ວ.
ເຖິງຢ່າງໃດກໍຕາມ, ນີ້ບໍ່ແມ່ນເທື່ອທຳອິດທີ່ ແມັກເກເກີ ປະກາດເລີກເປັນນັກສູ້ດ້ານນີ້ ເພາະຢ້ອນກັບໄປໃນປີ 2016 ລາວເຄີຍກ່າວວ່າ: ຂ້ອຍຕັດສິນໃຈຈະເລີກເປັນນັກສູ້ດ້ານນີ້ແຕ່ຕອນອາຍຸຍັງນ້ອຍ, ແຕ່ສຸດທ້າຍກໍກັບມາຂຶ້ນສູ້ອີກ.
