ມີດສອງຄົມຂອສື່ສັງຄົມອອນລາຍ

ໂດຍ: ລູກເມືອງພວນ

ດັ່ງທີ່ພວກເຮົາຮູ້ນຳກັນແລ້ວວ່າໃນປັດຈຸບັນ ສື່ສັງຄົມເປັນພາຫະນະທີ່ທັນສະໄໝ ແລະ ວ່ອງໄວ, ໄດ້ຮັບຄວາມນິຍົມຊົມຊອບຈາກຄົນທົ່ວໂລກ, ມັນໄດ້ກາຍເປັນຄວາມຮຽກຮ້ອງຕ້ອງການໃຫ້ແກ່ການເຄື່ອນໄຫວສກຶສາຄົ້ນຄ້ວາຮໍ່າຮຽນ, ການດຳເນີນທຸລະກິດທາງສື່ອອນລາຍ, ການຮັກສາສຸຂະພາບ, ການບັນເທີງ, ເສີມສວຍ ແລະ ຄວາມງາມ… ຂອງຄົນເຮົາ. ສື່ສັງຄົມມີປະໂຫຍດມາກມາຍຢູ່ໃນທຸກຂົງເຂດຊີວິດສັງຄົມ. ແຕ່ພ້ອມດຽວກັນນັ້ນ, ພວກບໍ່ດີກໍມັກສວຍໃຊ້ສື່ສັງຄົມເຂົ້າໃນການໂຄສະນາບິດເບືອນ, ຕົວະຍົວະ, ຊວນເຊື່ອ, ໃສ່ຮ້າຍປ້າຍສີຕໍ່ແນວທາງການເມືອງຂອງພັກ,  ປ່າວຂ່າວແນວບໍ່ມີຄວາມຈິງອອກໄປເຮັດໃຫ້ປະຊາຊົນຫຼົງເຊື່ອ, ແຕກຕື່ນ, ເກີດຄວາມລະແວງສົງໄສ, ຕ້ານພັກ ຕ້ານລັດ… ມີບາງຄັ້ງພວກເຂົາໄດ້ອີງໃສ່ຄວາມເປັນຈິງທີ່ເກີດຂຶ້ນໃນສັງຄົມໂດຍພວກເຂົາ ແຕ່ພວກເຂົາຈະມອງໄປອີກມູມໜຶ່ງເພື່ອໃສ່ຮ້າຍປ້າຍສີ, ໂຈມຕີພັກ-ລັດ. ຕົວຢ່າງ: ເຂື່ອນເຊປຽນ, ເຊນໍ້ານ້ອຍແຕກຫັກ ແມ່ນຍ້ອນສາຍເຫດມາຈາກທຳມະຊາດ ແຕ່ພວກກຸ່ມຄົນບໍ່ດີຊໍ້າພັດສ້າງເລື່ອງຂຶ້ນມາວ່າ: ລັດຖະບານລາວເປັນຜູ້ວາງແຜນເຮັດໃຫ້ເຂື່ອນແຕກຫັກ ເພາະມີຜົນປະໂຫຍດໄດ້ເສຍກັບໂຄງການດັ່ງກ່າວ, ແມ່ນຄວາມບໍ່ຫວັງດີຂອງບໍລິສັດລົງທຶນຂອງຕ່າງຊາດ ຈົງໃຈມ້າງເພເສດຖະກິດຂອງລາວ…. ເວລາມີການຊ່ວຍເຫຼືອຢ່າງຫຼວງຫຼາຍຈາກພາຍໃນ ແລະ ຕ່າງຊາດໃຫ້ປະຊາຊົນເມືອງສະໝາມໄຊ ເຂົາກໍເວົ້າວ່າ ລັດຖະບານລາວ ແລະ ບຸກຄົນໄດ້ສວຍໂອກາດແບ່ງປັນ, ຕັດຮອນເອົາເຄື່ອງຂອງ ແລະ ເງິນຄຳທີ່ໄດ້ມາຈາກການຊ່ວຍເຫຼືອນັ້ນມາເປັນຂອງຕົນເອງ, ສ່ວນທີ່ເອົາໄປຊ່ວຍປະຊາຊົນແມ່ນພຽງແຕ່ເລັກນ້ອຍເທົ່ານັ້ນ… ພວກເຂົາສ້າງກະແສຂ່າວຕ່າງໆນາໆ ເພື່ອໃສ່ຮ້າຍປ້າຍສີລັດຖະບານ, ເຮັດໃຫ້ປະຊາຊົນວິພາກວິຈານ ແລະ ເກີດຄວາມບໍ່ພໍໃຈ.

ດັ່ງທີ່ເວົ້າມາແລ້ວວ່າ ສື່ສັງຄົມປຽບສະເໝືອນມີດສອງຄົມ, ຖ້າພວກເຮົາຮູ້ໃຊ້ມັນແມ່ນຈະມີຜົນປະໂຫຍດຢ່າງມະຫາສານ, ອາດເວົ້າໄດ້ວ່າເຮັດໃຫ້ປ່ຽນຊີວິດຂອງຄົນກໍວ່າໄດ້ ແຕ່ຖ້າຫາກບໍ່ຮູ້ນຳໃຊ້ມັນກໍຈະກັບມາບາດມື ຫຼື ເປັນອາວຸດອັນຕະລາຍຕໍ່ຕົນເອງ ແລະ ເປັນພິດໄພຕໍ່ສັງຄົມ. ດັ່ງນັ້ນ, ການນຳໃຊ້ສື່ສັງຄົມ ໂດຍສະເພາະແມ່ນການນຳໃຊ້ສື່ທາງ ເຟສບຸກ ແມ່ນຄວນມີສະຕິ ແລະ ພິຈາລະນາໃຫ້ຖີ່ຖ້ວນກ່ອນຈະແຊຕໍ່, ຄອມເມັນ, ໂຟນໂລ, ການກົດໄລ, ການ ແອັດ….ຄວນມີວິຈາລະຍານ, ທັດສະນະ ແລະ ສາຍຕາເບິ່ງໃຫ້ສັດຈະວິພາກ.

ການເຂົ້າເຖິງສື່ສັງຄົມນັ້ນ ມັນເປັນເລື່ອງທີ່ບໍ່ສາມາດຫຼີກລຽງໄດ້ຂອງທຸກໆຄົນ ແຕ່ທຸກຄົນຕ້ອງເປັນເຈົ້າການຕ້ານ ແລະ ສະກັດກັ້ນ ທຸກຂ່າວປອມ, ບິດເບືອນ, ໃສ່ຮ້າຍປ້າຍສີຂອງພວກຄົນບໍ່ດີ ແລະ ອິດທິກຳລັງປໍລະປັກ ເພື່ອປົກປັກຮັກສາອິດທິພົນ ບົດບາດການນຳພາຂອງພັກ, ການຄຸ້ມຄອງຂອງລັດ. ເຮັດໃຫ້ສັງຄົມລາວເປັນສັງຄົມທີ່ປອດໃສຂາວສະອາດ ປາສະຈາກຂ່າວທີ່ບໍ່ມີຄວາມຈິງ. ສື່ມວນຊົນພວກເຮົາກໍຕ້ອງນຳທັນສື່ບິດເບືອນ ແລະ ຂ່າວປອມເຫຼົ່ານັ້ນ ເພື່ອຕອບໂຕ້ ແລະ ແກ້ຂ່າວໃຫ້ທັນການ, ໃຫ້ປະຊາຊົນເຫັນບັນຫາຈະແຈ້ງຂຶ້ນ ແລ້ວ ໃຫ້ການສະໜັບສະໜູນ ແລະ ເປັນກະບອກສຽງຕ້ານກັບຂ່າວປອມ, ຂ່າວບິດເບືອນບໍ່ມີຄວາມຈິງ, ຕີຖອຍສຽງໃສ່ຮ້າຍພັກ-ລັດຂອງພວກເຮົາເທື່ອລະກ້າວ.