ສະຫລອງປີໃໝ່ໃຫ້ຕິດພັນການສົ່ງເສີມການທ່ອງທ່ຽວ

ບຸນປີໃໝ່ລາວ, ໄດ້ໝູນວຽນມາບັນຈົບຄົບຮອບອີກວາລະໜຶ່ງ, ເຊິ່ງປະຊາຊົນບັນດາເຜົ່າໃນທົ່ວປະເທດຕ່າງກໍກຽມຈິດ​ໃຈ​ເພື່ອສະເຫລີມສະຫລອງບຸນດັ່ງກ່າວໃຫ້ມີບັນຍາກາດມ່ວນຊື່ນຖືກຕ້ອງຕາມຮີດຄອງປະເພນີອັນດີງາມຂອງຊາດດັ່ງເຄີຍປະຕິບັດສືບທອດກັນມາແຕ່ບູຮານນະການ ​ແລະ ​ເມື່ອ​ມໍ່ໆ​ນີ້,​ ພັກ-ລັດຖະບານ ກໍ​ໄດ້​ອອກ​ແຈ້ງ​ການຮຽກຮ້ອງມາຍັງປວງຊົນລາວທັງຊາດ ຖືເອົາການສະເຫລີມສະຫລອງບຸນປີໃໝ່ລາວປີນີ້ ເປັນໂອກາດສືບຕໍ່ຂະຫຍາຍມູນເຊື້ອຮີດຄອງປະເພນີອັນດີງາມ ແລະ ຄວາມສາມັກຄີຂອງປະຊາຊົນບັນດາເຜົ່າ ຕິດພັນກັບການສົ່ງເສີມການທ່ອງທ່ຽວລາວໃຫ້ມີບັນຍາກາດຟົດຟື້ນ, ປະຢັດມັດທະຍັດ ​ແລະ ຕ້ານ​ການ​ຟຸມ​ເຟືອຍ.   ບຸນປີໃໝ່ລາວປີນີ້ ແມ່ນ​ເລີ່​ມແຕ່ວັນທີ 14, 15 ແລະ 16 ເມສາ 2019 (ກົງກັບວັນອາທິດ, ວັນຈັນ ແລະ ວັນອັງຄານ) ແຕ່ເນື່ອງຈາກວັນທີ 14 ເປັນມື້ວັນອາທິດ, ຊຶ່ງເປັນມື້ພັກລັດຖະການ ສະນັ້ນລັດຖະບານຈຶ່ງກໍານົດເອົາວັນທີ 17 ກົງກັບວັນພຸດ ເປັນວັນພັກຊົດເຊີຍ, ພ້ອມທັງມອບໃຫ້ກະຊວງອຸດສາຫະກໍາ ແລະ ການຄ້າ, ກະຊວງກະສິກໍາ-ປ່າໄມ້ ແລະ ບັນດາແຂວງທົ່ວປະເທດ ເອົາໃຈໃສ່ຊີ້ນໍາການຜະລິດສະບຽງອາຫານ, ການສະໜອງເຄື່ອງອຸປະໂພກ-ບໍລິໂພກ ໃຫ້ພຽງພໍກັບຄວາມຕ້ອງການຂອງສັງຄົມ, ລວມທັງການຕິດຕາມກວດກາ ແລະ ຄຸ້ມຄອງລາຄາສີນຄ້າໃນທ້ອຕະຫລາດ ເພື່ອບໍ່ໃຫ້ມີການສວຍໂອກາດຂຶ້ນລາຄາຕາມລໍາພັງ, ໃຫ້ບັນດາກະຊວງ, ອົງການທຽບເທົ່າ ແລະ ທ້ອງຖິ່ນຕ່າງໆໃນຂອບເຂດທົ່ວປະເທດເອົາໃຈໃສ່ຊີ້ນໍາໃນການຮັກສາຄວາມປອດໄພ ແລະ ຄວາມເປັນລະບຽບຮຽບຮ້ອຍໃນສັງຄົມ, ໂດຍໃຫ້ມີການແບ່ງຄວາມຮັບພິຊອບໃນການຕິດຕາມກວດກາ, ເວນຍາມ ແລະ ປະຈໍາການ ເພື່ອປ້ອງກັນສໍານັກງານອົງການ ຕະຫລອດໄລຍະບຸນປີໃໝ່, ຈັດສັນ ແລະ ອໍານວຍຄວາມສະດວກໃນການສັນຈອນໄປ-ມາ ໃຫ້ມີຄວາມປອດໄພ ແລະ ເພີ່ມທະວີການໂຄສະນາສ້າງຈິດສໍານຶກໃຫ້ປະຊາຊົນເຄົາລົບກົດລະບຽບຈະລາຈອນເພື່ອປ້ອງກັນອຸຸປະຕິເຫດ, ຄຽງຄູ່ກັນນັ້ນ ຕ້ອງເພີ່ມທະວີການໂຄສະນາປະຊາສໍາພັນໃຫ້ປະຊາຊົນໃນທົ່ວສັງຄົມໄດ້ຮັບຮູ້ເຂົ້າໃຈກ່ຽວກັບການສະເຫລີມສະຫລອງບຸນປີໃໝ່ໃຫ້ຖືກຕ້ອງ ແລະ ສອດຄ່ອງກັບວັດທະນະທໍາຮີດຄອງປະເພນີອັນດີງາມຂອງຊາດ ເພື່ອດຶງດູດການທ່ອງທ່ຽວ, ໂດຍສະເພາະແມ່ນປີທ່ອງທ່ຽວ ລາວ-ຈີນ 2019 ໃຫ້ໄດ້ຮັບຜົນດີຕາມຄາດໝາຍວາງໄວ້.