ຖ້າເຮັດແທ້ ພຽງເດືອນດຽວກໍຢາເສບຕິດລາຍ ໄດ້ຫລາຍລາຍ
ຕາມການລາຍງານຂອງກົມຕຳຫລວດຕ້ານ ແລະ ສະກັດກັ້ນຢາເສບຕິດ ໃຫ້ຮູ້ວ່າ: ພຽງເດືອນມີນານີ້, ກຳລັງເຈົ້າໜ້າທີ່ຫລາຍທ້ອງຖິ່ນສາມາດຈັບກຸມຜູ້ຄ້າຂາຍຢາເສບຕິດໄດ້ຫລາຍລາຍມາດຳເນີນຄະດີ, ອັນພົ້ນເດັ່ນແມ່ນສາມາດຈັບຜູ້ຄ້າຂາຍລາຍໃຫຍ່ໄດ້ຄື: ໃນວັນທີ 7 ມີນາ, ເຈົ້າໜ້າທີ່ ປກສ ເມືອງຕົ້ນເຜິ້ງ ແຂວງບໍ່ແກ້ວ ໄດ້ນຳກຳລັງລົງກວດຄົ້ນເຮືອນເປົ້າໝາຍຄ້າຂາຍຢາເສບຕິດ ຢູ່ບ້ານໃຫຍ່ສີເມືອງງາມ ພົບເຫັນຢາເສບຕິດປະເພດຢາບ້າ 544 ພັນເມັດ, ພ້ອມທັງສາມາດຈັບຕົວຜູ້ເຈົ້າຂອງຊື່ທ້າວ ບຸນ ອາຍຸ 34 ປີ ມາດໍາເນີນຄະດີ ແລະ ສືບສວນຂະຫຍາຍຜົນຫາຜູ້ຮ່ວມຂະບວນການ. ຕໍ່ມາໃນວັນທີ 8 ມີນາ, ເຈົ້າໜ້າທີ ປກສ ແຂວງສະຫວັນນະເຂດ ໄດ້ຈັບຕົວທ້າວ ວຽງແກ້ວ ອາຍຸ 22 ປີ ແລະ ທ້າວ ຄຳຫລ້າ ອາຍຸ 32 ປີ ທັງສອງຢູ່ບ້ານຄຳສີດາ ເມືອງຈຳພອນ ແຂວງສະຫວັນນະເຂດ ໃນຂະນະເອົາຢາເສບຕິດ 118 ພັນເມັດ ໄປສົ່ງໃຫ້ຜູ້ສັ່ງຊື້ຢູ່ເສັ້ນທາງເຂດບ້ານສະໝູນ ເມືອງພະລານໄຊ ແຂວງສະຫວັນນະເຂດ, ແລະ ໃນວັນທີ 19 ມີນາ, ເຈົ້າໜ້າທີ່ ປກສ ແຂວງບໍ່ແກ້ວ ໄດ້ສະກັດລົດກະບະເປົ້າໝາຍຂົນສົ່ງຢາເສບຕິດແລ້ວໄປຕຳກຳແພງແຄມທາງເຂົ້າສວນກ້ວຍເຂດບ້ານນໍແລ, ຈາກນັ້ນຜູ້ຂັບຂີ່ສາມາດເອົາຕົວຫລົບໜີໄປໄດ້, ຜ່ານການກວດຄົ້ນພາຍໃນລົດມີຢາເສບຕິດປະເພດຢາໄອສ໌ 302 ກິໂລ ຈຶ່ງໄດ້ຢຶດໄວ້ເປັນຫລັກຖານ ພ້ອມທັງຕິດຕາມຜູ້ຂັບລົດຄັນດັ່ງກ່າວມາດຳເນີນຄະດີຕາມລະບຽບກົດໝາຍ.
