U23 ຫວຽດນາມ ຖະຫລົ່ມ U23 ໄທ ບານເຕະຊີງແຊ້ມອາຊີ 2020 ຮອບຄັດເລືອກ

      ການ​ແຂ່ງຂັນ​ບານ​ເຕະ U23 ຊີງ​ແຊ້ມອາ​ຊຽນຮອບ​ຄັດ​ເລືອກ​ທີ່​ປະ​ເທດ​ຫວຽດນາມ​ເຈົ້າ ກຸ່ມ K ມີ: ຫວຽດນາມ, ​ໄທ, ອິນ​ໂດ​ເນ​ເຊຍ ​ແລະ ບຣູ​ໄນ. ນັດ​ສຸດ​ທ້າຍ U23 ຫວຽດນາມ ຖະຫລົ່ມ U23 ​ໄທ 4-0. ​ເຄິ່ງ​ເວລາ​ທີ 1 U23 ຫວຽດນາມ ​ໄດ້​ປະຕູ​ຂຶ້ນນຳ 1 ປະຕູ​ຈາກ ຮ່າ​ດຶກ​ຈິງ ນາທີ 17. ມາ​ເຄິ່ງ​ເວລາ​ທີ 2 U23 ຫວຽດນາມ ຍິງ 3 ປະຕູ​ຈາກ ຫງຽນຮວາງ​ດຶກ ນາທີ 53, ຫງຽນ​ແທັງ​ຈຸ​ງ ນາທີ 63 ​ແລະ ​ເຈິ້ນ​ແທັງ​ເຊິ​ນ ນາທີ 90+2. U23 ຫວຽດນາມ ​ເປັນ​ແຊ້ມກຸ່ມ K ​ເຂົ້າຮອບ​ສຸດ​ທ້າຍ​ບານ​ເຕະ U23 ຊີງ​​ແຊ້ມອາຊີ 2020 ທີ່​ປະ​ເທດ​ໄທ.

       ສະຖິຕິ​ຫລັງ​ເກ​ມທີ່​ໜ້າ​ສົນ​ໃຈ: ຫວຽດນາມ ຊະນະ​ ​ໄທ ​ໃນ​ບ້ານ​ເປັນ​ນັດ​ທຳ​ອິດ​ໃນ​ຮອບ 31 ປີ ນັບ​ແຕ່​ປີ 1998 ​ໃນ​ການ​ແຂ່ງຂັນ​ບານ​ເຕະ​ຊີງ​ແຊ້ມອາ​ຊຽນທີ່​ຫວຽດນາມ​ເປັນ​ເຈົ້າພາບ​ຮອບ​ຮອງ​ຊະນະ​ເລີດ ຫວຽດນາມ ຊະນະ ​ໄທ 3-0. ນັດ​ນີ້​ແຂ່ງຂັນ​ທີ່​ສະໜາມກິລາ​ແຫ່ງ​ຊາດ​ໝີ​ດິ່ງ ມີ​ທ່ານ ຫງວຽນ​ຊວນ​ຟຸກ ນາຍົກລັດຖະມົນຕີ ສສ ຫວຽດນາມ, ທ່ານ ນາງ ຫງວຽນ​ທິກິມ​ເງິນ ປະທານ​ສະພາ ສສ ຫວຽດນາມ ​ແລະ ​ແຟນບານ 38.278 ຄົນ​ເຂົ້າຊົມ​ການ​ແຂ່ງຂັນ​ນັດ​ນີ້.

      ຂະນະ​ທີ່ U23 ອິນ​ໂດ​ເນ​ເຊຍ ຊະນະ U23 ບຣູ​ໄນ 2-1. ສະຫລຸບ​ຕາຕະລາງ​ຄະ​ແນນ​ກຸ່ມ K: ອັນ​ດັບ 1 ຫວຽດນາມ ມີ 9 ຄະ​ແນນ, ອັນ​ດັບ 2 ​ໄທ ມີ 6 ຄະ​ແນນ, ອັນ​ດັບ 3 ອິນ​ໂດ​ເນ​ເຊຍ ມີ 3 ຄະ​ແນນ ​ແລະ ອັນ​ດັບ 4 ບຣູ​ໄນ ບໍ່​ມີ​ຄະ​ແນນ.