ຣີລ ມາດຣິດ ຕັດສິນໃຈແລ້ວ ເກັບ ຫລື ປ່ອຍ ເບລ
ຫລັງຈາກ ແກເຣັດ ເບລ ປີກຄົນດັງຂອງ ຣີລ ມາດຣິດ ຕົກເປັນຂ່າວກ່ຽວກັບການຍ້າຍທີມມາໂດຍຕະຫລອດ, ຫລ້າສຸດ ອາສ ສື່ຂອງສະເປນລາຍງານວ່າ: ຣີລ ມາດຣິດ ຕັດສິນໃຈຈະຂາຍລາວຫລັງຈົບລະດູການນີ້ແລ້ວ ໂດຍພວກເຂົາຕັ້ງໃຈຈະຫາເງິນຈຳນວນຫລາຍເພື່ອໄປຊື້ບັນດານັກເຕະຝີຕີນດີ.
ເບລ ຕົກເປັນຂ່າວກ່ຽວກັບການຍ້າຍທີມມາຕະຫລອດລະດູການນີ້ ຫລັງຈາກລາວສ້າງຜົນງານໄດ້ໜ້າຜິດຫວັງ ອີກທັງຍັງມີບັນຫາເລື່ອງສະພາບຄວາມຟິດຈົນເຮັດໃຫ້ບໍ່ໄດ້ລົງຫລິ້ນຫລາຍເທົ່າທີ່ຄວນ ແລະ ພໍ ຊີເນດິນ ຊີດານ ກັບມາເປັນຄູຝຶກຂອງ ຣີລ ມາດຣິດ ແລ້ວນັ້ນ ອະດີດນັກເຕະ ທ໊ອດແນ່ມ ຮ໊ອດສະເປີ ກໍມີທ່າທີຈະຕ້ອງບອກລາທີມຫລາຍຂຶ້ນໄປອີກ ເພາະ ຊີດານ ບໍ່ໄດ້ມັກ ເບລ ເທົ່າໃດ.
ຫລ້າສຸດ ອາສ ລາຍງານວ່າ: ຜູ້ບໍລິຫານຂອງ ຣີລ ມາດຣິດ ກັບ ຊີດານ ຕັດສິນໃຈແລ້ວວ່າ ເບລ ບໍ່ຢູ່ໃນແຜນການເຮັດທີມອີກຕໍ່ໄປ ແລະ ຈະຂາຍລາວເພື່ອຫາເງິນຈຳນວນຫລາຍໄປເປັນທຶນໃນການຊື້ບັນດານັກເຕະຊື່ດັງເພື່ອສ້າງຍອດທີມຂຶ້ນມາ ຕາມທີມເຄີຍໃຫ້ສັນຍາໄວ້ກັບ ຊີດານ.
ສື່ດັ່ງກ່າວລາຍງານອີກວ່າ: ຣີລ ຍັງບໍ່ໄດ້ແຈ້ງເລື່ອງນີ້ໃຫ້ ເບລ ແລະ ຜູ້ຈັດການຂອງລາວຮູ້ແຕ່ຢ່າງໃດ ເຊິ່ງທີມທີ່ມີຂ່າວກັບລາວກ່ອນໜ້ານີ້ຄື: ແມນເຊັສເຕີ ຢູໄນເຕັດ ແລະ ບາເຢິນ ມິວນິກ ເປັນຕົ້ນ.
