ໜ້າເປັນຫວ່ງຕໍ່ປາກົດການລັກລອບນຳເຂົ້າຊີ້ນໝູ ຈາກ ສປ ຈີນ
ໂດຍ: ທ່ຽງທຳ
ສະບາຍດີເພື່ອນຜູ້ອ່ານທີ່ຮັກແພງ, ເຫັນຂ່າວນີ້ແລ້ວ, ຫລາຍຄົນກໍຈະຂົນຫົວລຸກ, ເມື່ອເຈົ້າໜ້າທີ່ດ່ານສາກົນບໍ່ເຕັນ ແຂວງຫລວງນ້ຳທາ ສາມາດກວດ ແລະ ຢຶດຊີ້ນໝູ ແລະ ຜະລິດຕະພັນໝູ ແຊແຂງທີ່ບໍ່ປອດໄພເປັນ ຈຳນວນຫລາຍເຖິງ 200 ເປົາ, ລວມມີນ້ຳໜັກ 4,5 ໂຕນ ທີ່ນຳເຂົ້າມາຈາກ ສປ ຈີນ. ໃນລົດບັນທຸກຄັນໜຶ່ງໂດຍພໍ່ຄ່າຈີນເປັນເຈົ້າຂອງ, ເມື່ອ ວັນທີ 25 ມີນານີ້.
ໃນຂະນະທີ່ປັດຈຸບັນ, ຢູ່ປະເທດດັ່ງກ່າວພວມມີການ ລະບາດຮ້າຍແຮງຂອງພະຍາດອະຫິວາໝູ ອາຟຣິກກາ ເຊິ່ງ ສົ່ງຜົນກະທົບຮ້າຍແຮງ ຕໍ່ອຸດສາຫະກຳລ້ຽງໝູຂອງປະເທດນີ້. ແລະ ກໍນັບວ່າ ເປັນການຍ້ອງຍໍຊົມເຊີຍເຈົ້າໜ້າ ທີ່ດ່ານກໍຄືຂະແໜງການກ່ຽວຂ້ອງ ແຂວງຫລວງນ້ຳທາສາມາດສະກັດກັ້ນການນຳເຂົ້າຊີ້ນສັດດັ່ງກ່າວ.
ຖ້າຈຳນວນຊີ້ນໝູທີ່ບໍ່ປອດໄພຈຳນວນ ດັ່ງກ່າວ ນັ້ນຫາກໄດ້ເລັດລອດເຂົ້າມາລາວ ແລ້ວບໍ່ຮູ້ວ່າໂສກສະຕາກຳຂອງທຸລະກິດການລ້ຽງໝູໃນລາວຈະເປັນແນວໃດ.
ແຕ່ກໍໜ້າເສຍດາຍທີ່ ເບື້ອງເຈົ້າໜ້າທີ່ເຮົາບໍ່ມີການລົງໂທດຢ່າງເຂັ້ມງວດຕໍ່ຜູ້ກະທຳຜິດດັ່ງກ່າວພຽງແຕ່ ເຮັດບົດບັກທຶກກ່າວເຕືອນ ຜູ້ ກ່ຽວບໍ່ໃຫ້ກະທຳຜິດອີກ ແລະ ຮຽກຮ້ອງໃຫ້ຍຸດຕິການນຳເຂົ້າໝູ ແລະ ຜະລິດຕະພັນຊີ້ນໝູຕ່າງໆ ຈາກ ສປ ຈີນ ຕາມແຈ້ງການຂອງລັດຖະມົນຕີກະຊວງກະສິກຳ ແລະ ປ່າໄມ້ວາງອອກໃຫ້ເຂັ້ມງວດ, ເພື່ອສະກັດກັ້ນການ ລະບາດພະຍາດອະຫິວາໝູ ຮ້າຍແຮງນີ້.
ປັດຈຸບັນແຂວງຫລວງນ້ຳທາ ມີດ່ານຊາຍແດນຕິດ ກັບ ສປ ຈີນ ຄື: ດ່ານສາກົນ ບໍ່ເຕັນ, ດ່ານປາງໄຮ ແລະ ດ່ານທ້ອງຖິ່ນບ້ານມອມ.
ດັ່ງນັ້ນຖ້າພວກເຮົາບໍ່ມີ ຄວາມເຂັ້ມງວດໃນການກວດຂັນກໍຈະເປັນໂອກາດໃຫ້ປະເທດເຮົາມີຄວາມສ່ຽງຕໍ່ກຸມຕິດແປດ ແລະ ແພລະ ບາດຂອງພະຍາດສັດດັ່ງກ່າວກໍເປັນໄດ້./.
