ຄລ໊ອບ ຕັ້ງເງື່ອນໄຂຖ້າ ຣີລ ມາດຣິດ ຊື້ ມາເນ່
ສະປອດ ສື່ຂອງແຄວ້ນກາຕາລຸນຍາ ລະບຸວ່າ: ຖ້າ ຣີລ ມາດຣິດ ຕ້ອງການຂໍຊື້ ຊາດິໂອ ມາເນ່ ປີກຂອງ ລິເວີພູລ ແທ້ໆ, ເຈີເກັ້ນ ຄລ໊ອບ ຜູ້ຈັດການທີມ ລິເວີພູລ ຈະຂໍເງິນກ້ອນໜຶ່ງ ພ້ອມກັບຕ້ອງການໃຫ້ ຣີລ ມາດຣິດ ແຖມ ມາໂກ ອາເຊນຊິໂອ ມານຳ ເນື່ອງຈາກ ຄລ໊ອບ ມັກ ອາເຊນຊິໂອ.
ກະແສຂ່າວລະຫວ່າງ ຣີລ ມາດຣິດ ກັບ ມາເນ່ ຮຸນແຮງຂຶ້ນໃນໄລຍະຜ່ານມາ ຫລັງຈາກມີການລະບຸວ່າ: ຊີເນດິນ ຊີດານ ຄູຝຶກຂອງຍອດທີມແຫ່ງຖິ່ນ ຊານຕິອາໂກ້ ເບນາເບວ ໝາຍຫົວລາວເປັນເປົ້າໝາຍຫລັກໃນການເສີມທັບ. ຂະນະດຽວກັນ ກໍມີລາຍງານວ່າ: ລິເວີພູລ ບໍ່ຄິດຈະປ່ອຍລາວອອກໄປງ່າຍໆ.
ຫລ້າສຸດ ສະປອດ ລາຍງານວ່າ: ຄລ໊ອບ ຈະຮຽກເງິນຈຳນວນໜຶ່ງ ພ້ອມຂໍ ອາເຊນຊິໂອ ມາເປັນຕົວແຖມນຳອີກ ຖ້າ ຣີລ ມາດຣິດ ຄິດຈະຍື່ນຂໍ້ສະເໜີເຂົ້າມາແທ້ໆ ເພາະຜູ້ຈັດການທີມຊາວເຢຍລະມັນຢາກໄດ້ ອາເຊນຊິໂອ ມາແຕ່ປີກ່ອນແລ້ວ ເຖິງວ່ານັກເຕະໄວ 23 ປີ ຈະບໍ່ໄດ້ໂດດເດັ່ນດ້ານການຍິງປະຕູຄື ມາເນ່ ແຕ່ລາວກໍມີຄວາມສ້າງສັນໃນການຫລິ້ນທີ່ດີ ເຊິ່ງນີ້ເປັນສິ່ງທີ່ ລິເວີພູລ ຂາດຫາຍໄປນັບແຕ່ປ່ອຍ ຟິລິບເປ້ ຄູຕິນໂຢ ໄປໃຫ້ ບາເຊໂລນາ.
ທັງນີ້ ມັນເປັນໄປໄດ້ຍາກທີ່ ຣີລ ມາດຣິດ ຈະຍອມແຖມ ອາເຊນຊິໂອ ມາພ້ອມໃຫ້ ລິເວີພູລ ເພາະກ່ອນໜ້ານີ້ ຊີດານ ອອກມາໃຫ້ສຳພາດວ່າ: ອາເຊນຊິໂອ ຍັງເປັນນັກເຕະຄົນສຳຄັນໃນສາຍຕາຂອງຕົນຢູ່ ຫລັງຈາກດາວເຕະທີມຊາດສະເປນເຄີຍສ້າງຜົນງານໂດດເດັ່ນໃນສະໄໝທຳອິດທີ່ ຊີດານ ຄຸມທີມ ຣີລ ມາດຣິດ.
