ກອງປະຊຸມໂປອາວມຸ່ງເນັ້ນການພັດທະນາແບບຍືນຍົງ

ແຫລ່ງຂ່າວ ຂປລ ໃຫ້ຮູ້ວ່າ: ກອງປະຊຸມເວທີປຶກສາຫາລືໂປອາວເພື່ອອາຊີປະຈໍາປີ 2019 ພາຍໃຕ້ຫົວຂໍ້”ຮ່ວມອະນາຄົດ,ຮ່ວມແຮງຮ່ວມໃຈກັນ ແລະ ຮ່ວມກັນພັດທະນາ” ໄດ້ໄຂຂຶ້ນຢ່າງເປັນທາງການໃນຕອນເຊົ້າຂອງວັນທີ 28 ມີນານີ້ທີ່ເມືອງໂປອາວ, ແຂວງໄຫໜານ ສປຈີນ, ໂດຍການເປັນປະທານຂອງທ່ານ ຫລີ ເຄີ້ ສຽງ ນາຍົກລັດຖະມົນຕີແຫ່ງ ສປ ຈີນ ແລະ ຄະນະຜູ້ແທນ ສປປ ລາວ ນໍາໂດຍທ່ານນາຍົກລັດຖະມົນຕີ ທອງລຸນ ສີສຸລິດ, ໂດຍມີບັນດາປະມຸກລັດ, ລັດຖະມົນຕີ, ຄູ່ຮ່ວມມື ແລະ ຜູ້ປະກອບການອື່ນໆຈາກ 60 ກວ່າປະເທດເຂົ້າຮ່ວມຫລາຍກວ່າ 2 ພັນຄົນ.

   ກອງປະຊຸມໄດ້ດໍາເນີນໄປເປັນເວລາ 2 ວັນ ເພື່ອໃຫ້ຄະນະຜູ້ແທນໄດ້ຮ່ວມກັນປຶກສາຫາລື ແລະ ແລກປ່ຽນບັນຫາສໍາຄັນຕ່າງໆຂອງພາກພື້ນ ແລະ ບັນຫາສາກົນປິ່ນອອ້ມ, ໂດຍສະເພາະການຮ່ວມມືດ້ານການພັດທະນາເສດຖະກິດ-ສັງຄົມ, ການຄ້າ, ການລົງທຶນ, ການພັດທະນາເຕັກໂນໂລຊີ ແລະ ນະວັດຕະກໍາໃຫມ່, ການເຊື່ອມໂຍງ ແລະ ນະໂຍບາຍເປີດກວ້າງອື່ນໆ.

    ທ່ານ ຫລີ ເຄີ້ ສຽງ ໄດ້ກ່າວໃນກອງປະຊຸມວ່າ: ຈີນໄດ້ສືບຕໍ່ປັບປຸງກົດຫມາຍ ແລະ  ສ້າງກົດລະບຽບຕ່າງໆ ເພື່ອສະຫນັບສະຫນູນການຈັດຕັ້ງປະຕິບັດການລົງທຶນຕ່າງປະເທດ ບົນພື້ນຖານຄວາມສະເຫນີພາບລະຫວ່າງນັກລົງທຶນພາຍໃນ ແລະ ຕ່າງປະເທດ, ພ້ອມເປີດໂອກາດໃຫ້ມີການເຂົ້າເຖິງຕະຫລາດຫລາຍຂຶ້ນກວ່າເກົ່າ, ເພີ່ມທະວີການຮ່ວມມື, ສ້າງຄວາມອົກເຂົ້າໃຈ, ເພີ່ມໂອກາດການພັດທະນາເສດຖະກິດ-ສັງຄົມ, ການຄ້າ, ການລົງທຶນ, ການເງິນ, ການໄປມາຫາສູ່ກັນ ແລະ ອື່ນໆ.

    ພ້ອມດຽວກັນນີ້, ທ່ານ ທອງລຸນ ສີສຸລິດ ກໍໄດ້ກ່າວໃນເວທີກອງປະຊຸມໂປອາວວ່າ: ປັດຈຸບັນ, ພວກເຮົາໄດ້ດໍາລົງຊີວິດໃນທາມກາງສະພາບການຂອງໂລກຜັນແປໄປຢ່າງວອ່ງໄວ, ດັ່ງນັ້ນຄວາມຫມັ້ນຄົງດ້ານການເມືອງ, ສັນຕິພາບ, ຄວາມໄວ້ເນື້ອເຊື່ອໃຈເຊິ່ງກັນ-ກັນ ແລະ ອື່ນໆ ໄດ້ກາຍເປັນບັນຫາອອ່ນໄຫວຄວນລະມັດລະວັງ ແລະ ເພີ່ມຄວາມເຂົ້າອົກເຂົ້າໃຈກັນໃຫ້ຫລາຍຂຶ້ນເພື່ອການພັດທະນາຍືນຍົງ. ເສັ້ນທາງແຫ່ງການເປີດກວ້າງເຊິ່ງກັນ-ກັນ ຈະເປັນນະໂຍບາຍທິ່ດີ ແລະ ເປັນເງື່ອນໄຂໃຫ້ປະເທດດ້ອຍພັດທະນາ, ປະເທດກໍາລັງພັດທະນາ ແລະ ພັດທະນາແລ້ວໄດ້ມີໂອກາດເຂົ້າເຖິງນະໂຍບາຍເປີດກວ້າງເພື່ອການພັດທະນາ, ການເຂົ້າເຖິງແຫລ່ງທຶນ, ການພັດທະນາເຕັກໂນໂລຊີໃຫມ່ ດັ່ງນັ້ນພວກເຮົາມຸ່ງຫນ້າສູ່ການເຊື່ອມໂຍງ ແລະ ການເຊື່ອມຈອດກັນຖືກເປັນຫົວໃຈສໍາຄັນໃນການຮ່ວມແຮງຮ່ວມໃຈ ແລະ  ຮ່ວມການພັດທະນາເພື່ອກ້າວໄປສູ່ການຮ່ວມອະນາຄົດທີ່ຈະເລີນກ້າວຫນ້າ, ຮຸ່ງເຮືອງ ແລະ ວັດທະນາຖາວອນຮ່ວມກັນຂອງບັນດາປະຊາຊາດພວກເຮົາຢ່າງເປັນຮູບປະທໍາ.

        ສປປ ລາວ ແລະ ສປ ຈີນເປັນປະເທດເພື່ອນມິດທີ່ຍາວນານ, ຄູ່ຮ່ວມຍຸດທະສາດທີ່ຫມັ້ນຄົງຍາວນານບົນຫລັກການ 4 ດີ ແລະ ເປັນເພື່ອນຮ່ວມຊະຕາກໍາທີ່ມຸ່ງໄປສູ່ອະນາຄົດທີ່ຮ່ວມແຮງຮ່ວມໃຈ, ຮ່ວມການພັດທະນາ ແລະ ໃຫ້ຄວາມສໍາຄັນຕໍ່ການແບ່ງປັນ,ເອື້ອເຟື້ອ, ຊ່ວຍເຫລືອເກື້ອກຸນເຊິ່ງກັນ ແລະ ກັນ ແລະ  ນັບຖືກັນຖານມິດສະຫາຍເປັນອ້າຍນ້ອງໂດຍຕ່າງຝ່າຍຕ່າງໄດ້ຮັບຜົນປະໂຫຍດ.

   ທ່ານນາຍົກລັດຖະມົນຕີ ຢືນຢັນວ່າ: ສປປ ລາວໄດ້ຮັບຜົນປະໂຫຍດໂດຍກົງກັບນະໂຍບາຍເປີດກວ້າງຢ່າງສະເຫມີຕົ້ນສະເຫມີປາຍຂອງ ສປ ຈີນຕະຫລອດມາ, ໃນນັ້ນລວມເຖິງນະໂຍບາຍບ້ານໄກ້ເຮືອນຄຽງທີ່ດີ, ຂໍ້ລິເລີ່ມຫນຶ່ງແລວຫນຶ່ງເສັ້ນທາງຂອງ ປະທານ ສີ ຈິ້ນ ຜີງໄດ້ສົ່ງຜົນກໍ່ໃຫ້ເກີດໂຄງການກໍ່ສ້າງເສັ້ນລົດໄຟລາວ-ຈີນຈາກຊາຍແດນຈີນເຖິງນະຄອນຫລວງວຽງຈັນຍາວ 400 ກວ່າກິໂລແມັດ ແລະ ຄາດວ່າຈະສໍາເລັດພາຍໃນປີ 2021 ເຊິ່ງທາງລົດໄຟດັ່ງກ່າວຈະສາມາດຜ່ານໄທ ແລະ ອອກສູ່ບັນດາປະເທດສະມາຊິກອາຊຽນ ລວມທັງປ່ຽນສະຖານະຂອງ ສປປ ລາວຈາກປະເທດບໍ່ຕິດຈອດກັບທະເລກາຍເປັນປະເທດທີ່ເຊື່ອມຈອດກັບບັນດາປະເທດອື່ນໆໃນພາກພື້ນ ແລະ ສາກົນໃນເວລາອັນໄກ້ນີ້.