ຄະນະຜູ້ແທນຂັ້ນສູງພັກແຮງງານເກົາຫລີ ຢ້ຽມຢາມ ສປປ ລາວ
ຄະນະຜູ້ແທນຂັ້ນສູງພັກແຮງງານເກົາຫລີ ນໍາໂດຍ ສະຫາຍ ລີຊູຢອງ, ຮອງປະທານພັກ, ກໍາມະການກົມການເມືອງສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກແຮງງານເກົາຫລີ, ພ້ອມດ້ວຍຄະນະ ໄດ້ມາເຄື່ອນໄຫວຢ້ຽມຢາມ ສປປ ລາວ ແຕ່ວັນທີ 27-31 ມີນາ 2019.
ໃນໄລຍະຢູ່ຢ້ຽມຢາມ, ຄະນະຜູ້ແທນຂັ້ນສູງພັກແຮງງານເກົາຫລີ ໄດ້ເຂົ້າຢ້ຽມຂ່ໍານັບ ສະຫາຍ ບຸນຍັງ ວໍລະຈິດ, ເລຂາທິການໃຫຍ່ ຄະນະບໍລິຫານງານສູນກາງພັກ ປປ ລາວ, ປະທານປະເທດແຫ່ງ ສປປ ລາວ ແລະ ພົບປະເຮັດວຽກກັບ ສະຫາຍ ພັນຄໍາ ວິພາວັນ ກໍາມະການກົມການເມືອງສູນກາງພັກ, ຜູ້ປະຈໍາການຄະນະເລຂາທິການສູນກາງພັກ. ໃນການພົບປະດັ່ງກ່າວ, ການນໍາຂັ້ນສູງຂອງ ພັກ-ລັດ ສປປ ລາວ ໄດ້ຕີລາຄາສູງຕໍ່ການມາຢ້ຽມຢາມ ສປປ ລາວ ຂອງຄະນະຜູ້ແທນຂັ້ນສູງພັກແຮງງານເກົາຫລີ ໃນຄັ້ງນີ້, ເຊິ່ງເປັນການປະກອບສ່ວນອັນສຳຄັນ ເຂົ້າໃນການເພີ່ມພູນຄູນສ້າງສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອ ທີ່ມີມາແຕ່ດົນນານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ສປປ ລາວ-ສປປ ເກົາຫລີ; ໄດ້ແຈ້ງສະພາບການທີ່ພົ້ນເດັ່ນ ຂອງ ສປປ ລາວ ໃນໄລຍະມໍ່ໆມານີ້ ໃຫ້ຄະນະຊາບ, ໂດຍສະເພາະແມ່ນ ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ການຈັດຕັ້ງປະຕິບັດແຜນການພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ VIII; ສະແດງຄວາມຊົມເຊີຍຕໍ່ຜົນສຳເລັດ ໃນການຈັດຕັ້ງຜັນຂະຫຍາຍບັນດາມະຕິກອງປະຊຸມໃຫຍ່ ຄັ້ງທີ VII ຂອງພັກແຮງງານເກົາຫລີ ແລະ ເຊື່ອໝັ້ນວ່າ ພາຍໃຕ້ການຊີ້ນຳນຳພາອັນໜັກແໜ້ນ, ເຂັ້ມແຂງ ຂອງ ພັກແຮງງານເກົາຫລີ ອັນມີ ສະຫາຍ ກິມເຈິງອຸນ, ຜູ້ນຳສູງສຸດຂອງ ສປປ ເກົາຫລີ ເປັນຜູ້ນໍາໜ້ານັ້ນ, ພັກ, ລັດຖະບານ ແລະ ປະຊາຊົນ ສປປ ເກົາຫລີ ຈະສືບຕໍ່ຍາດໄດ້ໄຊຊະນະໃໝ່ໃຫຍ່ຫລວງກວ່າເກົ່າ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດ ສປປ ເກົາຫລີ. ນອກຈາກນັ້ນ, ສອງຝ່າຍຍັງໄດ້ແລກປ່ຽນທັດສະນະຕໍ່ສະພາບການພາກພື້ນ ແລະ ສາກົນຈຳນວນໜື່ງ ທີ່ສອງຝ່າຍມີຄວາມສົນໃຈ.
ສະຫາຍ ລີຊູຢອງ ໄດ້ສະແດງຄວາມຂອບໃຈຢ່າງສູງ ຕໍ່ການຕ້ອນຮັບອັນອົບອຸ່ນ, ສະໜິດສະໜົມຂອງ ສະຫາຍ ເລຂາທິການໃຫຍ່ ບຸນຍັງ ວໍລະຈິດ ແລະ ບັນດາການນໍາຂັ້ນສູງຂອງລາວ ພ້ອມທັງໄດ້ນຳເອົາຄວາມຢ້ຽມຢາມຖາມຂ່າວອັນອົບອຸ່ນ ຈາກ ສະຫາຍ ກິມເຈິງອູນ, ປະທານພັກແຮງງານເກົາຫລີ, ປະທານຄະນະກຳມາທິການກິດຈະການແຫ່ງລັດແຫ່ງ ສປປ ເກົາຫລີ, ຜູ້ບັນຊາການສູງສຸດຂອງ ກອງທັບ ສປປ ເກົາຫລີ ມາຍັງ ສະຫາຍ ບຸນຍັງ ວໍລະຈິດ ແລະ ການນຳຂອງພັກ, ລັດລາວ; ສະຫາຍ ຫົວໜ້າຄະນະຜູ້ແທນພັກແຮງງານເກົາຫລີ ໄດ້ສະແດງຄວາມຊົມເຊີຍຕໍ່ຜົນສຳເລັດອັນໃຫຍ່ຫລວງຮອບດ້ານ ທີ່ປະຊາຊົນລາວ ຍາດມາໄດ້ຕະຫລອດໄລຍະ 3 ປີທີ່ຜ່ານມາ ໃນການຈັດຕັ້ງຜັນຂະຫຍາຍມະຕິກອງປະຊຸມໃຫ່ຍຄັ້ງທີ X ຂອງພັກ ປປ ລາວ ແລະ ແຜນການພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII ແລະ ສະແດງຄວາມເຊື່ອໝັ້ນວ່າ ພາຍໃຕ້ການນຳພາອັນສະຫລາດສ່ອງໃສຂອງພັກ ປປ ລາວ ອັນມີ ສະຫາຍ ບຸນຍັງ ວໍລະຈິດ ເປັນຜູ້ນຳໜ້ານັ້ນ, ປະຊາຊົນລາວ ຈະສາມາດຍາດໄດ້ຜົນສຳເລັດອັນໃໝ່ໃຫຍ່ຫລວງກວ່າເກົ່າ ໃນພາລະກິດແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດໃຫ້ມີຄວາມມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີຄວາມປອງດອງ, ປະຊາທິປະໄຕ, ຍຸດຕິທໍາ ແລະ ສີວິໄລ.
ສອງຝ່າຍໄດ້ສະແດງຄວາມປິຕິຍິນດີ ທີ່ເຫັນວ່າ ສາຍພົວພັນມິດຕະພາບ ແລະ ການຮ່ວມມື ອັນເປັນມູນເຊື້ອ ທີ່ມີມາແຕ່ດົນນານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ສປປ ລາວ-ສປປ ເກົາຫລີ ທີ່ ປະທານ ໄກສອນ ພົມວິຫານ ແລະ ປະທານ ກິມອິນຊຸງ ໄດ້ຮ່ວມກັນສ້າງຂຶ້ນມາແຕ່ດົນນານນັ້ນ ສືບຕໍ່ໄດ້ຮັບການເພີ່ມພູນຄູນສ້າງ ແລະ ເສີມຂະຫຍາຍຢ່າງບໍ່ຢຸດຢັ້ງ ເພື່ອຜົນປະໂຫຍດຂອງ ປະຊາຊົນສອງຊາດ ແລະ ທັງເປັນການປະກອບສ່ວນເຂົ້າໃນພາລະກິດປົກປັກຮັກສາສັນຕິພາບ, ມິດຕະພາບ ແລະ ການຮ່ວມມືຢູ່ໃນພາກພື້ນ ແລະ ໃນໂລກ.
ເຂົ້າຮ່ວມໃນການຢ້ຽມຂໍ່ານັບ ແລະ ພົບປະຄັ້ງນີ້, ຍັງມີ ສະຫາຍ ລີຢອງຊອນ, ເອກອັກຄະລັດຖະທູດ ແຫ່ງ ສປປ ເກົາຫລີ ປະຈຳ ສປປ ລາວ ແລະ ພະນັກງານຫລັກແຫລ່ງ ທີ່ກ່ຽວຂ້ອງຈຳນວນໜຶ່ງຂອງ ພັກ ປປ ລາວ.
