ເຫດການໃຊ້ຄວາມຮຸນແຮງຕໍ່ຄົນໃຊ້ຢ່າງ ໂຫດຮ້າຍສາມານຢູ່ບາງປະເທດອາຊີເຮົາ
ອີງຕາມແຫລ່ງຂ່າວ vnexpress ໃນວັນທີ 26 ມີນານີ້ ໃຫ້ຮູ້ວ່າ: ຄົນໃຊ້ຖືກໃຫ້ອົດເຂົ້າ, ຖືກທຸບຕີທໍລະມານດ້ວຍຄ້ອນຕີ ແລະ ບັງຄັບໃຫ້ນອນຢູ່ຄອກໝາ. ນັ້ນຄືສະພາບຂອງຄົນໃຊ້ຢູ່ຮົງກົງ, ສິງກະໂປ ແລະ ມາເລເຊຍ.
ມີຜົວເມຍຄູ່ໜຶ່ງຄົນສິງກະໂປ ໄດ້ຮັບໂທດຂໍ້ຫາ ບັງຄັບໃຫ້ຄົນໃຊ້ກິນຮາກຂອງຕົນ ແລະ ຂົ່ມຂູ່ວ່າຈະຈ້າງຄົນໄປຂ້າທັງໝົດຄອບຄົວຂອງເຂົາຢູ່ທີ່ມຽນມາ ຖ້າຫາກເລື່ອງນີ້ຖືກເປີດເຜີຍອອກໄປ (ອ້າງອີງຕາມ SCMP).
ຜົວເມຍຄູ່ນີ້ຍັງໃຊ້ໄມ້ຄ້ອນທຸບຕີ ແລະ ເຕະນາງ Moe Moe Than ຢ່າງທໍລະມານ ແລະ ຮ້າຍແຮງໄປກວ່ານັ້ນ ພວກເຂົາຍັງບັງຄັບໃຫ້ຜູ້ຍິງອາຍຸ 32 ປີ ຄົນນີ້ເຮັດວຽກເຮືອນຢ່າງບໍ່ມີຍາມຢຸດເຊົາຈົນເຫລືອພຽງແຕ່ໂສ້ງຊັ້ນໃນປົກຮ່າງຄີງເທົ່ານັ້ນ.
ຜູ້ເປັນເມຍມີຊື່ວ່າ: Chia Yun Linh ຖືກສານຕັດສິນລົງໂທດຈຳຄຸກ 47 ເດືອນ ພ້ອມປັບໃໝ 3.000 ໂດລາສະຫະລັດ ແລະ ທົດແທນໃຫ້ຜູ້ເຄາະຮ້າຍ 5.000 ໂດລາ. ໃນຂະນະດຽວກັນ ຜູ້ເປັນຜົວຊື່ວ່າ: Tay Wee Kiat ອາຍຸ 41 ປີ ຖືກສານຕັດສິນຈຳຄຸກ 24 ເດືອນ ແລະ ທົດແທນໃຫ້ຜູ້ເສຍຫາຍຫລາຍກວ່າ 2.000 ໂດລາສະຫະລັດ.
ເຫດການທໍລະມານຄົນໃຊ້ສ່ວນຫລາຍແມ່ນເກີດຂຶ້ນຢູ່ຮົງກົງ, ສິງກະໂປ ແລະ ມາເລເຊຍໃນຊຸມປີມໍ່ໆມານີ້.
ຜົວເມຍຄູ່ໜຶ່ງຄົນມາເລເຊຍຖືກຂໍ້ຫາບັງຄັບໃຫ້ຄົນໃຊ້ຊາວອິນໂດເນເຊຍອົດເຂົ້າເມື່ອເດືອນມິຖຸນາ 2011 ຜ່ານມາ ຜົວຊື່ Fong Kong Meng ທັງສອງຜົວເມຍມີອາຍຸຫລາຍກວ່າ 50 ປີແລ້ວ. ພວກເຂົາບໍ່ມີຄວາມຮັບຜິດຊອບເບິ່ງແຍງລ້ຽງດູຄົນໃຊ້ນາງ Isti Komariya ປະປ່ອຍໃຫ້ເຂົາເກີດເປັນພະຍາດເຈັບປ່ວຍຢ່າງທຸກທໍລະມານຕະຫລອດ 3 ປີທີ່ເປັນຄົນໃຊ້ໃຫ້ຄູ່ຜົວເມຍນີ້. ນີ້ຄືຂໍ້ອ້າງອີງຂອງສານສູງມາເລເຊຍ ຈົນເຮັດໃຫ້ນາງໃນໄວ 26 ປີ ຈ່ອຍຜອມລົງມີນ້ຳໜັກບໍ່ເຖິງ 26 ກິໂລ, ເຂົາໄດ້ເສຍຊີວິດລົງໃນຂະນະທີ່ກຳລັງນຳສົ່ງໄປໂຮງໝໍທີ່ນະຄອນຫລວງກົວລາລຳເປີ. ຕາມກະແສຂ່າວໃຫ້ຮູ້ວ່າ: ກ່ອນໜ້າຈະເຂົ້າໄປເປັນຄົນໃຊ້ຢູ່ໃນຄອບຄົວຂອງຜົວເມຍຄູ່ນີ້ ເຂົາມີນ້ຳໜັກ 46 ກິໂລ.
Fong Kong Meng ກັບເມຍ, ໃນເບື້ອງຕົ້ນນັ້ນຖືກສານຕັດສິນປະຫານຊີວິດດ້ວຍການແຂວນຄໍ ດ້ວຍຂໍ້ຫາມີເຈຕະນາຂ້າຄົນ ແຕ່ສານເຂດໄດ້ຫລຸດໂທດລົງໃຫ້ຈຳຄຸກ 20 ປີ.
ອັນນີ້ບໍ່ແມ່ນກໍລະນີພິເສດໜຶ່ງດຽວທີ່ບັງຄັບໃຫ້ຄົນໃຊ້ຕ້ອງອົດອາຫານຢູ່ໃນປະເທດມາເລເຊຍ ຄືປີ 2015 ຜ່ານມາ ໄດ້ມີຜົວເມຍຄູ່ໜຶ່ງອີກທີ່ມີອາຊີບຄ້າຂາຍເຄື່ອງອຸປະກອນປະກອບຄອມພິວເຕີ ກໍຖືກສານຕັດສິນລົງໂທດດ້ວຍຂໍ້ຫາບັງຄັບໃຫ້ຄົນໃຊ້ກຳປູເຈຍຕ້ອງອົດອາຫານຈົນເຖິງຂັ້ນຕາຍ. Mey Sichan ໄດ້ເສຍຊີວິດລົງໃນກະໂຕຮ້ານຂາຍເຄື່ອງຂອງຜົວເມຍຄູ່ນີ້. ເວລາເສຍຊີວິດ ຄົນໃຊ້ຄົນນີ້ມີອາຍຸ 24 ປີ ມີນ້ຳໜັກພຽງແຕ່ 26 ກິໂລ. ສານເຂດຂອງມາເລເຊຍໄດ້ຕັດສິນລົງໂທດຈຳຄຸກ 10 ປີ.
Erwiana ສັນຊາດອິນໂດເນເຊຍ ຖືກນາຍຈ້າງຄົນຮົງກົງທໍລະມານແຕ່ເດືອນພຶດສະພາ 2013 ຫາເດືອນມັງກອນ 2014. ນາງສາວອາຍຸ 23 ປີຜູ້ນີ້ ພາຍຫລັງທີ່ໄດ້ກັບຄືນບ້ານເກີດທີ່ Java ເມື່ອເດືອນມັງກອນປີນີ້ ເຂົາກໍຖືກນຳສົ່ງໄປໂຮງໝໍທັນທີໃນສະພາບການທີ່ຂັບຂັນ.
ອີງຕາມການບັນທຶກຂອງສານໄດ້ເຜີຍວ່າ: ຮີມສົບຂອງນາງ Erwiana ຖືກຈີກ ຍ້ອນນາຍຈ້າງເອົາຄັນເຫລັກຂອງເຄື່ອງດູດຝຸ່ນທັ່ງເຂົ້າປາກຂອງນາງ ແລະ ຮ້າຍແຮງໄປກວ່ານັ້ນ ນາງສາວຄົນນີ້ຍັງຖືກໃຫ້ແກ້ເຄື່ອງເປືອຍໂຕເອົານ້ຳເຢັນຖອກໃສ່ ແລ້ວໃຫ້ຢືນຕາກພັດລົມເປັນເວລາ 2 ຊົ່ວໂມງ.
ນາຍຈ້າງຂອງ Erwiana ແມ່ນ Wang-tung ອາຍຸ 41 ປີ ຖືກສານຕັດສິນລົງໂທດຈຳຄຸກ 6 ປີ ໃນປີ 2015 ດ້ວຍ 18 ຂໍ້ຫາໃນຈຳນວນທັງໝົດ 20 ຂໍ້ຫາ, ໃນນັ້ນ ລວມມີທັງໂທດທໍລະມານ ແລະ ຂົ່ມຂູ່ນາງ Erwiana ແລະ ຜູ້ຍິງຊ່ວຍວຽກອີກຄົນໜຶ່ງຊາວອິນໂດເນເຊຍ.
ນາງ Law ຫາກໍໄດ້ພົ້ນໂທດອອກຈາກຄຸກມາ ພາຍຫລັງເຂົ້າຄຸກໄດ້ 3 ປີ. ປັດຈຸບັນບໍ່ມີໃຜຮູ້ເງື່ອນງຳຂອງຜູ້ຍິງຄົນນີ້ເລີຍ ທັງໆທີ່ເຂົາກໍຍັງບໍ່ທັນໄດ້ທົດແທນຜົນເສຍຫາຍໃຫ້ແກ່ຜູ້ຍິງເຄາະຮ້າຍທັງສອງຄົນນັ້ນຕາມຄຳຕັດສິນຂອງສານເລີຍ. Erwiana ພາຍຫລັງເຂົາໄດ້ພົ້ນອອກຈາກລາງຮ້າຍແຫ່ງຊີວິດແລ້ວ, ປີກາຍນີ້ ເຂົາກໍໄດ້ຮຽນຈົບມະຫາວິທະຍາໄລໃນສາຂາວິຊາຄຸ້ມຄອງເສດຖະກິດ. ປັດຈຸບັນເຂົາກຳລັງພັກດັນໃຫ້ລັດຖະບານອິນໂດເນເຊຍສ້າງກົດໝາຍປົກປ້ອງສິດທິຂອງຜູ້ເປັນແມ່ບ້ານ (ຄົນໃຊ້) ຢູ່ຕ່າງປະເທດ.
ມີຄູ່ຜົວເມຍຄົນສິງກະໂປຄູ່ໜຶ່ງກໍຖືກສານຕັດສິນໂທດຈຳຄຸກແຕ່ເດືອນມິຖຸນາເຖິງເດືອນທັນວາຂອງປີ 2012 ຜ່ານມາ ໃນຂໍ້ຫາທຳຮ້າຍຮ່າງກາຍແມ່ບ້ານຊາວອິນໂດເນເຊຍ Khanifah ດ້ວຍການເອົາຄ້ອນຕີທຸບຫົວຫ້າບາດ, ຕີປາກສອງບາດຈົນແຂ້ວເຂົາແຕກຫັກ.
ກໍລະນີໜຶ່ງອີກຄື Adelina Lisao ຍິງສາວຄົນອິນໂດເນເຊຍຖືກນາຍຈ້າງຄົນມາເລເຊຍບັງຄັບໃຫ້ຍິງສາວອາຍຸ 21 ປີຄົນນີ້ຕ້ອງນອນຢູ່ນອກເຮືອນ ພ້ອມກັບໝາເຝົ້າເຮືອນຂອງເຂົາ. ຕາມການໃຫ້ການຂອງຊາວບ້ານໃຫ້ຮູ້ວ່າ: ຄອບຄົວຂອງເຂົາຢູ່ Pedang ເຂົາໄດ້ທຳຮ້າຍ Lisao ເປັນເວລາໜຶ່ງເດືອນມາແລ້ວກ່ອນຈະຮູ້ໄດ້. ຢູ່ເທິງລຳແຂນຂອງເຂົາເຕັມໄປດ້ວຍບາດແຜ, ໜ້າກໍບວມຊ້ຳໄປໝົດ. ມີພົນລະເມືອງດີຄົນໜຶ່ງທີ່ໄດ້ເຂົ້າຮ່ວມການກອບກູ້ເອົາຍິງສາວຄົນນັ້ນເປີດເຜີຍຕໍ່ສຳນັກຂ່າວ Reuters ວ່າ: ຍິງສາວຄົນນັ້ນເຂົາຢ້ານຈົນເຖິງຂັ້ນວ່າ: ປາກບໍ່ອອກສຽງເລີຍ ມີແຕ່ແກວ່ງຫົວເປັນໃຫຍ່. Lisao ເຂົາເສຍຊີວິດຫລັງຈາກກອບກູ້ເອົາເຂົາອອກມາໄດ້ ຍ້ອນຮ່າງກາຍໄດ້ຮັບການກະທົບຮ້າຍແຮງ. ແມ່ເຖົ້າ Ambika ອາຍຸ 60 ປີ ຖືກຮ້ອງຟ້ອງຂໍ້ຫາໂທດຂ້າຄົນຕາມປະມວນກົດໝາຍອາຍາ, ສ່ວນວ່າຍິງສາວອາຍຸ 32 ປີນັ້ນ ຖືກຂໍ້ຫາວ່າຈ້າງແຮງງານຕ່າງປະເທດຜິດກົດໝາຍ.
