ອຸນຫະພູມຢູ່ອົດສະຕຣາລີເພີ່ມຂຶ້ນ ເປັນປະຫວັດສາດມາ 4 ເດືອນຕິດຕໍ່ກັນ
ອົດສະຕຣາລີຍັງຜະເຊີນກັບຄວາມຮ້ອນອົບເອົ້າຕໍ່ເນື່ອງເປັນປະຫວັດສາດໃນເດືອນມີນາ, ຂະນະທີ່ສະພາບອາກາດທົ່ວໂລກອຸ່ນຂຶ້ນເປັນບັນຫາຮ້ອນໃນການຫາສຽງເລືອກຕັ້ງທີ່ເຫລືອເວລາອີກບໍ່ເທົ່າໃດອາທິດ.
ກົມອຸຕຸນິຍົມວິທະຍາອົດສະຕຣາລີ ຖະແຫລງວ່າ: ອົດສະຕຣາລີຜະເຊີນກັບອາກາດຮ້ອນທີ່ສຸດເປັນປະຫວັດສາດໃນເດືອນມີນາ ເຊິ່ງເກີນກວ່າຄ່າສະເລ່ຍທົ່ວໂລກໃນຫລາຍພື້ນທີ່ ໂດຍອຸນຫະພູມສະເລ່ຍທົ່ວປະເທດເພີ່ມຂຶ້ນ 2,13 ອົງສາເໜືອກວ່າຄ່າສະເລ່ຍໃນເດືອນມີນາ. ຖືເປັນເດືອນທີ 4 ຕິດຕໍ່ກັນແລ້ວທີ່ອົດສະຕຣາລີມີອາກາດຮ້ອນອົບເອົ້າເປັນປະຫວັດສາດ ໂດຍໃນເດືອນມັງກອນຖືເປັນເດືອນຮ້ອນທີ່ສຸດຢູ່ອົດສະຕຣາລີແບບບໍ່ເຄີຍມີມາກ່ອນ. ອຸນຫະພູມສະເລ່ຍທົ່ວປະເທດເກີນ 30 ອົງສາ ເປັນຄັ້ງທຳອິດ. ເຖິງຢ່າງໃດກໍຕາມ, ສະພາບໄພແຫ້ງແລ້ງແກ່ຍາວຢູ່ບາງພື້ນທີ່ບັນເທົາລົງເລັກໜ້ອຍຈາກພາຍຸໄຊໂຄນສອງຫົວພັດຖະຫລົ່ມທາງເໜືອ ແລະ ຕາເວັນຕົກຂອງປະເທດ ເຊິ່ງເປັນພື້ນທີ່ແຫ້ງແລ້ງທີ່ສຸດໃນເດືອນມີນາຜ່ານມາ, ບັນຫາສະພາບອາກາດປ່ຽນແປງເປັນບັນຫາສຳຄັນໃນການຫາສຽງເລືອກຕັ້ງຢູ່ອົດສະຕຣາລີກາງເດືອນພຶດສະພານີ້. ລັດຖະບານພັດອະນຸລັກນິຍົມຂອງນາຍົກລັດຖະມົນຕີ ສະກອດ ມໍຣິສັນ ຍັງບໍ່ກ້າດຳເນີນນະໂຍບາຍຈຳກັດແກັສເຮືອນແກ້ວ ເຊິ່ງຈະສົ່ງຜົນກະທົບຕໍ່ການເຕີບໃຫຍ່ໃນຂະແໜງອຸດສາຫະກຳ, ແຕ່ພັກແຮງງານ ເຊິ່ງເປັນຝ່າຍຄ້ານ ແລະ ມີຄະແນນນຳຝ່າຍອະນຸລັກນິຍົມໃນການສຳຫລວດຄະແນນນິຍົມທີ່ເປີດເຜີຍວັນທີ 1 ເມສາ ມີນະໂຍບາຍຫລຸດການປ່ອຍແກັສເຮືອນແກ້ວ, ສົ່ງເສີມພະລັງງານທົດແທນ ແລະ ລົດໄຟຟ້າ.
