ຊາລາ-ຟານໄດ ລຸ້ນສ້າງສະຖິຕິຮອບ 8 ປີໃຫ້ ລິເວີພູລ
ໂມ ຊາລາ ແລະ ເຟີກິລ ຟານ ໄດ ມີລຸ້ນເປັນນັກເຕະເອົາຟິລ ລິເວີພູລ ທີ່ລົງຫລິ້ນໃນລີກທຸກນັດ ຫລັງນັດສຸດທ້າຍຕ້ອງຢືນໄປເຖິງ ມາຣຕິນ ສະເຄີເທລ ໃນລະດູການ 2010-11.
ໂມຮາເໝັດ ຊາລາ ແລະ ເຟີກິລ ຟານ ໄດ ສອງດາວເຕະ ລິເວີພູລ ມີໂອກາດຈະສ້າງສະຖິຕິໃນຮອບ 8 ປີໃຫ້ ລິເວີພູລ ຫາກລົງສະໜາມໃນ ພຣີເມຍລີກ ອັງກິດ ລະດູການນີ້ ຄົບ 38 ເກມ.
ໃນໄລຍະ 8 ປີຜ່ານມາ ຍັງບໍ່ມີນັກເຕະເອົາຟິລ (ທຸກຕຳແໜ່ງໃນສະໜາມຍົກເວັ້ນຜູ້ຮັກສາປະຕູ) ຂອງ ລິເວີພູລ ລົງຫລິ້ນໃນລີກຄົບທຸກນັດ ຫລັງ ມາຕິນ ສະເຄີເທລ ປາການຫລັງຈອມເກັ່ງເປັນຄົນສຸດທ້າຍທີ່ເຮັດໄວ້ນັບແຕ່ລະດູການ 2010-11 ເປັນຕົ້ນມາ.
ໃນເວລານີ້ ທັງ ຊາລາ ແລະ ຟານ ໄດ ລົງຫລິ້ນເກມ ພຣີເມຍລີກ ຄົບ 31 ນັດ ເຮັດໃຫ້ມີລຸ້ນສ້າງສະຖິຕິຂອງ ສະເຄີເທລ ໂດຍລະດູການຜ່ານມາ ໂຣແບໂຕ້ ຟີມີໂນ່ ເກືອບເຮັດໄດ້ ແຕ່ພາດລົງຫລິ້ນໄປພຽງນັດດຽວ ເຊັ່ນດຽວກັບ ນາທາເນຍ ໄຄ ໃນລະດູການ 2016-17.
