ລາວຂະຫຍາຍເວລາຊໍາລະຄ່າທາງປີ 2019 ໄປຮອດເດືອນມິຖຸນາ

ໃນວັນທີ 1 ເມສານີ້, ກະຊວງການເງິນໄດ້ອອກແຈ້ງການເລື່ອນໄລຍະເວລາຂອງການຊໍາລະຄ່າທໍານຽມທາງປະຈໍາປີ 2019 ໄປຮອດວັນທີ 30 ມິຖຸນາ ໂດຍລະບຸວ່າ: ເຖິງບຸກຄົນ, ນິຕິບຸກຄົນ ແລະ ການຈັດຕັ້ງ ທີ່ເປັນເຈົ້າຂອງພາຫະນະທຸກປະເພດໃນຂອບເຂດທົ່ວປະເທດ ຊາບວ່າ: ໄລຍະເວລາປົກກະຕິຂອງການຊໍາລະຄ່າທໍານຽມທາງປະຈໍາປີ 2019 ໄດ້ເລື່ອນຈາກມື້ສຸດທ້າຍວັນທີ 31 ມີນາ ມາເປັນ ວັນທີ 30 ມິຖຸນາ, ຖ້າກາຍກໍານົດດັ່ງກ່າວ ແມ່ນຈະຖືກປັບໃໝໃນອັດຕາ 0,1% ຕໍ່ມື້ຂອງມູນຄ່າທີ່ຕ້ອງເສຍຄ່າທໍານຽມທາງປະຈໍາປີ. ການຂະຫຍາຍເວລາອອກໄປຄືດັ່ງກ່າວ ກໍເພື່ອເຮັດໃຫ້ການເກັບຄ່າທໍານຽມທາງຖືກປະຕິບັດຢ່າງເປັນຂະບວນການກວ້າງຂວາງ ແລະ ເປັນເອກະພາບໃນທົ່ວປະເທດ.