ນະຄອນຫລວງວຽງຈັນ ເອົາໃຈໃສ່ຄວບຄຸມລາຄາສິນຄ້າ ໄລຍະປີໃໝ່ລາວ
ພະແນກອຸດສາຫະກຳ ແລະ ການຄ້າ ນະຄອນຫລວງວຽງຈັນ ໃຫ້ຮູ້ວ່າ: ເພື່ອເຮັດໃຫ້ ການສະເຫລີມສະຫລອງບຸນປີໃໝ່ລາວ ພສ 2562 ທີ່ຈະມາເຖິງນີ້ ດຳເນີນໄປດ້ວຍຄວາມເບີກບານມ່ວນຊື່ນ ພ້ອມກັບການຊົມໃຊ້ສິນ ຄ້າທີ່ມີລາຄາຍຸຕິທຳບົນພື້ນ ຖານກົນໄກຕະຫລາດ ຫລີກເວັ້ນການເອົາລັດເອົາປຽບກັນລະຫວ່າງຜູ້ຊື້ ແລະ ຜູ້ຂາຍ ທັງເປັນການຮັບປະກັນໃຫ້ລາຄາສິນຄ້າຢູ່ໃນເກນປົກກະຕິ, ພະແນກອຸດສາຫະກຳ ແລະ ການຄ້າ ຈະໄດ້ເອົາໃຈໃສ່ ແລະ ເພີ່ມທະວີການຄວບຄຸມລາຄາສິນຄ້າຢ່າງຈິງຈັງ ໂດຍໄດ້ກຳນົດລາຄາໃຫ້ຜູ້ປະກອບການຕາມກົດເກນ ແລະ ກົນໄກຕະຫລາດ, ຫ້າມກັກຕຸນສິນຄ້າ ຫລື ສວຍໂອກາດຂຶ້ນ ລາຄາສິນຄ້າໂດຍລຳພັງ ພ້ອມທັງຫ້າມນຳເອົາໝາກກະໂພກມາວາງຈຳໜ່າຍຢ່າງເດັດຂາດ.
ສຳລັບສິນຄ້າບໍລິໂພກທີ່ລັດຄວບຄຸມໃຫ້ປະຕິບັດ ຄືລາຄາໝູເປັນ 18 ພັນກີບຕໍ່ກິໂລ ຫລື ແພງສຸດບໍ່ເກີນ 20.000 ກີບຕໍ່ກິໂລ, ໝູທັງໂຕທີ່ຂ້າຄົວແລ້ວໃຫ້ຂາຍໃນລາຄາ 20-25 ພັນກີບຕໍ່ກິໂລ. ສຳລັບລາຄາຂາຍຍ່ອຍໃຫ້ແກ່ຜູ້ບໍລິໂພກແພງສຸດບໍ່ໃຫ້ກາຍ 35 ພັນກີບຕໍ່ກິໂລ.ນອກຈາກນັ້ນ ລາຄາປາກະຊັງ (ປານິນ) ໃຫ້ຂາຍໃນລາຄາ 16 ພັນກີບຕໍ່ກິໂລ ແລະ ແພງສຸດບໍ່ໃຫ້ເກີນ 18 ຫາ 19 ພັນກີບຕໍ່ກິໂລ,ສ່ວນລາຄາຂາຍຍ່ອຍໃຫ້ຜູ້ບໍລິໂພກແພງສຸດບໍ່ໃຫ້ເກີນ 23 ພັນກີບຕໍ່ກິໂລ, ສ່ວນລາຄາຊີ້ນງົວ, ຄວາຍນັ້ນຍັງບໍ່ສາມາດຄິດໄລ່ລາຄາໄດ້ ເນື່ອງຈາກປະເທດເຮົາສ່ວນຫລາຍແມ່ນລ້ຽງງົວ,ຄວາຍຕາມທຳມະຊາດການຕອບສະໜອງຄວາມຕ້ອງການຂອງຕະຫລາດຍັງບໍ່ພຽງພໍຈຶ່ງຕ້ອງໄດ້ນຳເຂົ້າຊີ້ນ ງົວ,ຄວາຍຈາກປະເທດໃກ້ຄຽງ
ທີ່ມີລາຄາແພງ ຈຶ່ງເຮັດໃຫ້ລາຄາຊີ້ນດັ່ງກ່າວແພງຜິດປົກກະຕິ. ດັ່ງນັ້ນເພື່ອສາມາດຄວບຄຸມລາຄາຊີ້ນງົວກໍຄືການສະໜອງໃຫ້ພຽງພໍກັບຄວາມຕ້ອງການຂອງຕະຫລາດ,ພະແນກອຸດ ສາຫະກຳກໍໄດ້ປະສານກັບຜູ້ປະ ກອບການ ເພື່ອເຮັດແນວໃດໃຫ້ມີຊີ້ນງົວ-ຄວາຍສະໜອງຕະຫລາດໄດ້ພຽງພໍໂດຍໃຊ້ມາດຕະການຫ້າມການກັກຕຸນເພື່ອໃຫ້ສະ ໜອງໄດ້ປົກກະຕິ ແລະ ສຳລັບລາຄາພືດຜັກເປັນສິນຄ້າຕາມລະ ດູການທີ່ບໍ່ໄດ້ກຳນົດລາຄາ ພຽງແຕ່ຕິດຕາມຄວບຄຸມໃຫ້ໃກ້ຊິດຕື່ມ, ສ່ວນລາຄາເຂົ້າທີ່ມີການເໜັງຕີງຂຶ້ນໃນໄລຍະນີ້ ເຫັນໄດ້ວ່າເປັນພຽງບາງເມືອງເທົ່ານັ້ນ, ໂດຍມອບໃຫ້ອຸດສາຫະກຳ- ການຄ້າຕິດຕາມກວດກາຊອກຫາສາເຫດ ແລະ ຊອກຫາວິທີແກ້ໄຂແລ້ວ ແລະ ເບື້ອງກະຊວງການຄ້າກໍໄດ້ອະນຸມັດໃຫ້ມີຄັງແຮເຂົ້າ ເພື່ອແຊກຄຸມລາຄາໃຫ້ໄດ້. ພ້ອມນັ້ນ ກໍໄດ້ອອກແຈ້ງການໃຫ້ບັນ ດາບໍລິສັດລັດ, ວິສາຫະກິດ, ຮ້ານຄ້າ ແລະ ຊາວຄ້າຂາຍຈົ່ງເປັນເຈົ້າການຮ່ວມກັນຄວບຄຸມລາຄາສິນຄ້າໃຫ້ໝັ້ນທ່ຽງ ໂດຍສະເພາະບັນດາຫ້ອງການອຸດສາຫະກຳການຄ້າເມືອງໃຫ້ລົງຕິດຕາມກວດກາລາຄາສິນຄ້າຢູ່ຕະຫລາດຕ່າງໆພາຍໃນເມືອງຂອງຕົນໃນໄລຍະປີໃໝ່ນີ້ໃຫ້ເຂັ້ມງວດ, ຖ້າບຸກຄົນ ຫລື ນິຕິບຸກ ຄົນໃດລ່ວງລະເມີດກໍຈະຖືກກ່າວເຕືອນປັບໄໝ ແລະ ດຳເນີນຄະດີຕາມລະ ບຽບການກົດໝາຍ ແລະ ຖ້າໃຜພົບເຫັນກໍລະນີຂຶ້ນລາຄາສິນຄ້າໂດຍລຳ ພັງ ຫລື ການກັກຕຸນສູນຄ້າໃດໆກໍສາມາດແຈ້ງໃຫ້ຄະນະຈັດສັນຕະຫລາດ ຫລື ຫ້ອງການອຸດສາ ຫະກຳການຄ້າເມືອງ ກໍຄືເຈົ້າໜ້າທີ່ທີ່ກວດກາພະແນກອຸດສາຫະ ກຳການຄ້າ ລົງກວດກາ ໃຫ້ທ່ວງທັນເວລາ.
ແນວໃດກໍດີ ໃນວັນທີ 2 ເມສາ ນີ້, ນັກຂ່າວໜັງສືພິມລາວພັດທະນາ ໄດ້ລົງຕິດຕາມລາຄາສິນຄ້າໃນທ້ອງຕະຫລາດຄື: ຕະຫລາດໜອງຈັນ, ທາດຫລວງ ແລະ ອື່ນໆ ໄດ້ເຫັນວ່າ: ລາຄາສິນຄ້າມີການເຫນັງຕີງບາງຢ່າງ, ໂດຍສະເພາະແມ່ນປະເພດຊີ້ນໝູ ໄດ້ເພີ່ມຂຶ້ນຈາກ ກິໂລລະ 33.000 ກີບ ມາເປັນ 36.000 ກີບຕໍ່ກີບໂລ, ລວມທັງສິນຄ້າປະເພດອື່ນເຊັ່ນ: ປານິນ, ຜັກ, ໝາກເຜັດ ກໍມີການເຫນັງຕີງຂຶ້ນ, ຊຶ່ງຜູ້ຈັດສັນຕະຫລາດໜອງຈັນ ໃຫ້ຮູ້ວ່າ: ສາເຫດຂອງລາຄາ ຊີ້ນຫມູເພີ່ມຂຶ້ນ ເນື່ອງມາຈາກການຫ້າມນຳເຂົ້າຊີ້ນຫມູຈາກປະເທດເພື່ອນບ້ານ ເພື່ອປ້ອງກັນພະຍາດອະຫິວາຫມູອາຟຣິກກາ, ເຮັດໃຫ້ການຕອບສະຫນອງຊີ້ນຫມູສັງຄົມບໍ່ພຽງພໍ ແລະ ແມ່ຄ້າບາງຄົນກໍມີການສວຍໂອກາດຂຶ້ນລາຄາສິນຄ້າໂດຍລຳພັງ, ແນວໃດກໍຕາມ ຄະນະຈັດສັນຕະຫລາດພວກເຮົາ ກໍໄດ້ລົງກວດກາ ແລະ ແຈ້ງເຕືອນໃຫ້ແມ່ຄ້າ-ຊາວຂາຍຫ້າມຂຶ້ນລາຄາສິນຄ້າໂດຍລຳພັງຢ່າງເດັດຂາດ, ພ້ອມທັງຕິດຕັ້ງຊິງກາງ ໃຫ້ມີຫລາຍຈຸດ ເພື່ອປົກປ້ອງກັນຜູ້ບໍລິໂພກບໍ່ໃຫ້ຖືກເອົາປຽບ.
