ສັງຄົມເລີ່ມໃຫ້ຄວາມສຳຄັນໃນການຕ້ານການສໍ້ລາດບັງຫລວງ
ອົງການກວດກາລັດຖະບານຍອມຮັບວ່າ: ປັດຈຸບັນສັງຄົມເລີ່ມ ມີຄວາມຕື່ນໂຕ ແລະ ໃຫ້ຄວາມສຳຄັນໃນການຕ້ານການສໍ້ລາດບັງຫລວງ ເຊິ່ງໄດ້ສະແດງອອກຈາກການຮ້ອງຟ້ອງ, ຮ້ອງທຸກມາຫາພາກສ່ວນກ່ຽວ ຂ້ອງ ແລະ ສະພາແຫ່ງຊາດຫລາຍຂຶ້ນ. ຂະນະດຽວກັນ, ເນັ້ນໃຫ້ພາກ ສ່ວນກ່ຽວຂ້ອງ ເມື່ອກວດພົບມີການສໍ້ລາດບັງຫລວງຄວນຮີບຮ້ອນແກ້ໄຂໃຫ້ທັນການຕາມລະ ບຽບກົດໝາຍ ເພື່ອບໍ່ໃຫ້ເປັນແບບຢ່າງໃນຕໍ່ໜ້າ.
ອົງການກວດກາລັດຖະບານໃຫ້ຮູ້ວ່າ: ການສໍ້ລາດບັງຫລວງແມ່ນປາກົດການຫຍໍ້ທໍ້ໃນກົງຈັກລັດ ເປັນໄພຂົ່ມຂູ່ຕໍ່ຄວາມໝັ້ນຄົງຂອງປະເທດ. ໃນໄລຍະຜ່ານມາ, ຄະນະກວດກາສູນກາງພັກ, ອົງ ການກວດກາລັດ ຖະບານກໍໄດ້ອອກນິຕິກຳຈຳນວນໜຶ່ງເຊັ່ນ: ໄດ້ຄົ້ນຄວ້າຂໍ້ກຳນົດ, ແຈ້ງການ, ບົດແນະນຳ, ຮ່າງດຳລັດວ່າດ້ວຍການແຈ້ງຊັບສິນ-ລາຍຮັບ ແລະ ນະໂຍບາຍຕ່າງໆກ່ຽວກັບວຽກງານກວດກາ. ພ້ອມນັ້ນ ກໍໄດ້ດຳເນີນການປັບປຸງກົງຈັກການຈັດ ຕັ້ງຄະນະກວດກາຂັ້ນຕ່າງໆໃຫ້ມີຄວາມໜັກແໜ້ນເຂັ້ມແຂງ. ໃນ ຜ່ານມາ ຂະແຫນງການກ່ຽວຂ້ອງກໍໄດ້ຈັດເຝິກອົບຮົມວຽກງານກວດກາໃຫ້ພະນັກ ງານ-ລັດຖະກອນທີ່ເຮັດວຽກງານກວດກາຢ່າງເປັນປົກກະຕິ, ເຊິ່ງມີຜູ້ເຂົ້າຮ່ວມເຝິກອົບຮົມນັບຫລາຍພັນຄົນ, ໄດ້ປະສານສົມທົບກັບອົງການຈັດຕັ້ງທີ່ກ່ຽວຂ້ອງຈັດຕັ້ງສະເຫລີມສະຫລອງວັນຕ້ານການສໍ້ລາດບັງຫລວງສາກົນໃນ ທຸກໆປີ, ເພື່ອເປັນການສຶກສາອົບຮົມ, ໂຄສະນາເຜີຍແຜ່ໃຫ້ພະນັກງານ-ລັດຖະກອນ, ປະຊາຊົນບັນດາເຜົ່າ ແລະ ອົງການຈັດຕັ້ງຕ່າງໆຮັບຮູ້ ແລະ ເຫັນໄດ້ຜົນຮ້າຍຂອງການສໍ້ລາດບັງຫລວງ ແລະ ເຫັນໄດ້ຄວາມພະຍາຍາມຂອງລັດຖະບານທີ່ໃຫ້ການສະໜັບສະ ໜູນໃນການຈັດ ຕັ້ງປະຕິບັດນະ ໂຍບາຍ ເພື່ອສະກັດກັ້ນ ແລະ ຈຳກັດການສໍ້ລາດບັງຫລວງ. ຜ່ານພຶດຕິກຳດັ່ງ ກ່າວ, ພະນັກງານ-ລັດຖະກອນ, ທະຫານ, ຕຳຫລວດ ແລະ ປະຊາ ຊົນຈຳນວນບໍ່ໜ້ອຍໄດ້ມີການຫັນ ປ່ຽນ ທັດສະນະຄະຕິ, ແບບແຜນ ການເຮັດວຽກ ແລະ ການດຳລົງຊີວິດມີທ່າອ່ຽງດີຂຶ້ນ, ປະຊາຊົນໄດ້ມີຄວາມເປັນຫ່ວງເປັນໄຍ ແລະ ຕື່ນໂຕປະກອບສ່ວນໃນການຕິດຕາມ, ກວດກາປາກົດສິ່ງຫຍໍ້ທໍ້ດັ່ງກ່າວນັບມື້ຫລາຍຂຶ້ນ.
ໃນໜຶ່ງປີຜ່ານມາ, ອົງການກວດກາລັດຂັ້ນຕ່າງໆໄດ້ດຳເນີນການກວດກາຕາມແຜນການປົກກະຕິ, ກວດກາຕາມຄຳສັ່ງ ຫລື ຄຳສະເໜີ ແລະ ກວດກາແບບບັງເອີນ ຕໍ່ກັບແຕ່ລະເປົ້າໝາຍແມ່ນປະຕິບັດຕາມຂັ້ນຕອນ, ລະບຽບການ ແລະ ຫລັກການກວດກາທີ່ໄດ້ກຳນົດໄວ້ໃນກົດໝາຍວ່າດ້ວຍການກວດກາລັດ ແລະ ກົດໝາຍວ່າດ້ວຍການຕ້ານການສໍ້ລາດບັງຫລວງ, ການດຳເນີນການກວດກາບາງກໍລະນີ ແລະ ບາງເປົ້າໝາຍທີ່ກວດກາພົບເຫັນແລ້ວບໍ່ສາມາດແກ້ໄຂໄດ້ທັນການ ແລະ ບໍ່ໄປຕາມຂັ້ນຕອນຂອງກົດໝາຍ ຊຶ່ງຈະຕ້ອງໄດ້ເພີ່ມທະວີ ການປັບປຸງແກ້ໄຂເທື່ອລະກ້າວ.
ໃນກອງປະຊຸມວຽກງານກວດກາ ທົ່ວປະເທດ ເມື່ອບໍ່ດົນມານີ້, ໄດ້ຍົກໃຫ້ເຫັນວ່າ: ໃນປີ 2019 ຈະໄດ້ສຸມໃສ່ວຽກງານຕິດຕາມກວດກາ, ສະກັດກັ້ນ ແລະ ຕ້ານການສໍ້ລາດບັງຫລວງຢູ່ສູນກາງ ແລະ ທ້ອງຖິ່ນໃຫ້ມີຄວາມ ຕັ້ງໜ້າຫັນສູ່ທິດທີ່ດີກ່ວາເກົ່າ, ປະກອບສ່ວນເຮັດໃຫ້ການຄຸ້ມຄອງລັດດ້ວຍກົດໝາຍ ມີຄວາມສັກສິດ, ຕາມທິດທາງວຽກງານກວດສອບແຫ່ງລັດ ປະຈຳປີ 2019 ທີ່ຄະນະປະຈຳສະພາ ເຫັນດີໂດຍພຶ້ນຖານຈະດຳເນີນການກວດສອບ ຈຳນວນ 99 ເປົ້າໝາຍ, ທັງນີ້ ສະພາແຫ່ງຊາດຍັງສະ ເຫນີລັດຖະບານຊີ້ນຳຫົວໜ່ວຍງົບປະມານທີ່ຖືກກວດສອບມອບເງີນລາຍຮັບທີ່ເຫລືອຈາກການນຳໄປໃຊ້ຈ່າຍນອກແຜນປີ 2017 ຈໍານວນ 157 ຕື້ກ່ວາກີບ ເຂົ້າເປັນລາຍຮັບງົບປະມານ 2019 ເອົາລາຍຮັບວິຊາການ ແລະ ລາຍຮັບກອງທຶນ ຈຳນວນ 82 ຕື້ກ່ວາກີບ ນຳສະເຫນີກະຊວງການເງີນສັງລວມເຂົ້າໃນແຜນຈົດຮັບ-ຈົດຈ່າຍ ໃນປີ 2019.
