ໂຮງງານອຸດສາຫະກຳໂຕໂຢລາວຈຳກັດຜູ້ດຽວ ເປັນໂຮງງານຜະລິດທໍ່ ທີ່ທັນສະໄໝທີ່ສຸດໃນ ລາວ
ປະຈຸບັນຫຼາຍຄົນກໍ່ອາດຈະຮູ້ດີເຖິງ ບໍລິສັດກຸ່ມໄຊຍະວົງ ຈຳກັດຜູ້ດຽວ, ເພິ່ນສ້າງຕັ້ງຂື້ນໃນປີ 2001, ກຸ່ມໄຊຍະວົງ ມີຊື່ສຽງໃນການສັງລວມເອົາແຫຼ່ງວັດຖຸອຸປະກອນທໍ່ນໍ້າທີ່ໄດ້ມາດຕະຖານສາກົນ ຈາກທົ່ວທຸກມຸມໂລກ ເພື່ອຕອບສະໜອງຄວາມຕ້ອງການວັດສະດຸກໍ່ສ້າງລະບົບນໍ້າ ໃນລາຄາເໝາະສົມກັບເສດຖະກິດຂອງລາວ. ອີງໃສ່ທ່າແຮງທີ່ມີຢູ່ຕະຫຼອດໄລຍະ 15 ປີ ໃນຂະແໜງທໍ່ນໍ້າປະປາ ແລະ ເພື່ອຕອບສະໜອງໃນແນວທາງພັດທະນາ ຂອງພັກ-ລັດ ເພື່ອຂັບເຄື່ອນປະເທດໃຫ້ກາຍເປັນປະເທດອຸດສາຫະກຳ ແລະ ທັນສະໄໝ, ຮອດປີ 2016 ຄະນະອຳນວຍການ ບໍລິສັດກຸ່ມໄຊຍະວົງຈຳກັດຜູ້ດຽວ ຈິ່ງໄດ້ຕັດສິນໃຈສ້າງຕັ້ງໂຮງງານອຸດສາຫະກຳໂຕໂຢລາວຈຳກັດຜູ້ດຽວ (TOYO INDUSTRY LAO FACTORY CO., LTD.)
ເພື່ອຜະລິດ ແລະ ຈຳໜ່າຍທໍ່ນໍ້າຄົບວົງຈອນເຊັ່ນ: ທໍ່ພີວີຊີ (PVC), ທໍ່ເອັສດີພີອີ (HDPE), ທໍ່ພີພີອາ (PPR), ແອວດີພີອີ (LDPE) ແລະ ອື່ນໆ ເພື່ອຮັບໃຊ້ໃນຂະແໜງນໍ້າປະປາ, ທໍ່ຫຸ້ມສາຍໄຟຟ້າ, ທໍ່ຫຸ້ມສາຍໂທລະຄົມ ແລະ ທໍ່ນໍ້າກະເສດ ຄົບວົງຈອນ ພາຍໃຕ້ເຄື່ອງໝາຍການຄ້າໂຕໂຢ (TOYO BRAND) ທີ່ໄດ້ຄຸນນະພາບ ແລະ ສາມາດທົດແທນສິນຄ້ານໍາເຂົ້າຈາກຕ່າງປະເທດ. ຮອດປະຈຸບັນ ໂຮງງານທໍ່ໂຕໂຢ ໄດ້ຮັບໃບຢັ້ງຢືນຄຸນນະພາບມາດຕະຖານສາກົນ ISO 9001:2015 ແລະ ມາດຕະຖານແຫ່ງຊາດ ມລ 71:2009.
ດັ່ງທ່ານ ລັງກອນ ໄຊຍະວົງ ໃນນາມປະທານ ແລະ ຜູ້ສ້າງຕັ້ງ ກຸ່ມໄຊຍະວົງ ແລະ ໂຮງງານທໍ່ໂຕໂຢ ໄດ້ກ່າວໃຫ້ຮູ້ວ່າ ສຳລັບເມັດຢາງ ແລະ ວັດຖຸດິບ ແມ່ນວັດຖຸດິບສົດຮ້ອຍເປີເຊັນ ນໍາເຂົ້າຈາກຜູ້ສະໜອງທີ່ມີຊື່ສຽງໃນໂລກເຊັ່ນ: ຈາກຕາເວັກອອກກາງ, ເກົາຫຼີໃຕ້, ສິງກະໂປ, ໄຕຫວັນ ແລະ ໄທ ເປັນຕົ້ນ. ນອກນັ້ນ ຍັງມີທີມງານວິຊາການ ທີ່ຊ່ຽວຊານຫຼາຍກວ່າ 20 ປີ ແລະ ນໍາໃຊ້ເຕັກໂນໂລຊີທີ່ທັນສະໄໝຫລ້າສຸດ ຈາກໂຢໂຣບ ແລະ ອາຊີ ເຂົ້າໃນການຜະລິດທໍ່. ປະຈຸບັນກຳລັງຜະລິດຂອງໂຮງງານປະມານ 50ພັນໂຕນຕໍ່ປີ. ໂຮງງານທໍ່ໂຕໂຢດຳເນີນການຜະລິດທໍ່ໂດຍນໍາໃຊ້ວັດຖຸດິບທີ່ສະອາດ, ເຄື່ອງຈັກທີ່ທັນສະໄໝ ແລະ ທີມງານວິຊາການທີ່ເປັນມືອາຊີບ, ສະນັ້ນ ທຸກໆຜະລິດຕະພັນຂອງໂຮງງານທໍ່ນໍ້າໂຕໂຢ (TOYO PIPE) ຈິ່ງຮັບປະກັນທາງດ້ານເຕັກນິກ ແລະ ຮັບປະກັນທາງດ້ານຄວາມສະອາດ ແລະ ໄດ້ຮັບຄວາມນິຍົມໃຊ້ໃນໂຄງການກໍ່ສ້າງລະບົບນໍ້າທີ່ສຳຄັນຕ່າງໆຂອງຊາດ ເຊັ່ນວ່າ: ໂຄງການກໍ່ສ້າງລະບົບນໍ້າປະປາຕົວເມືອງ, ນໍ້າປະປາຊຸມຊົນ, ນໍ້າລິນ, ນໍ້າບາດານ, ຊົນລະປະທານ, ທໍ່ນໍ້າກະເສດ, ໂຄງການກໍ່ສ້າງເຂື່ອນ, ຂຸດຄົ້ນບໍ່ແຮ່ ແລະ ໂຄງການກໍ່ສ້າງອາຄານເຄຫະສະຖານຕ່າງໆໃນຕົວເມືອງ. ນອກຈາກຜະລິດທໍ່ທີ່ໄດ້ມາດຕະຖານແລ້ວ ໂຮງງານທໍ່ໂຕໂຢ ຍັງໄດ້ໄຈ້ແຍກ ລະຫັດສະເພາະຂອງທໍ່ແຕ່ລະປະເພດໃຫ້ແທດເໝາະກັບການໃຊ້ງານຂອງທີ່ແຕ່ລະປະເພດເຊັ່ນ: (1) ທໍ່ເອັສດີພີອີ (HDPE) ກ່ານສີຟ້າໃຊ້ສຳລັບທໍ່ນໍ້າປະປາ, ກ່ານສີແດງ ສຳລັບທໍ່ຫຸ້ມສາຍໄຟຟ້າ, ກ່ານສີເຫຼືອງ ສຳລັບທໍ່ຫຸ້ມສາຍໂທລະຄົມ ແລະ ທໍ່ກ່ານສີຂຽວໃບໄມ້ ສຳລັບທໍ່ກະເສດ; (2) ສຳລັບທໍ່ພີວີຊີ (PVC) ສີຟ້າສຳລັບນໍ້າປະປາ, ສີເຫຼືອງສຳລັບທໍ່ຫຸ້ມສາຍໄຟໃນອາຄານ ແລະ ສີຂາວ ສຳລັບທໍ່ຫຸ້ມສາຍກ້ອງວົງຈອນ, ສາຍອິນເຕີເນັດ ແລະ ອື່ນໆໃນອາຄານ; (3) ທໍ່ພີພີອາ (PPR) ກ່ານຟ້າ ສຳລັບທໍ່ນໍ້າປະປາ, ກ່ານແດງສຳລັບນໍ້າຮ້ອນໃນອາຄານ. ການແຍກສີດັ່ງກ່າວແມ່ນເພື່ອໃຫ້ມີຄວາມສະດວກໃນການຄຸ້ມຄອງ, ນໍາໃຊ້ ແລະ ສ້ອມແປງລະບົບສາຍທໍ່ໃນອະນາຄົດ ເພື່ອປ້ອງກັນບໍ່ໃຫ້ມີການເຂົ້າໃຈພິດ ຫຼົງໄປເຈາະທໍ່ຫຸ້ມສາຍໄຟຟ້າເພື່ອຕໍ່ນໍ້າເຂົ້າເຮືອນປະຊາຊົນ ແລ້ວເກີດອຸບັດຕິເຫດ.
ເນື່ອງໃນໂອກາດນີ້ ທ່ານ ລັງກອນ ໄຊຍະວົງ ຍັງໄດ້ຝາກເຖິງລູກຄ້າ ແລະ ຜູ້ຊົມໃຊ້ ຈົ່ງມີຄວາມໝັ້ນໃຈໃນທຸກຜະລິດຕະພັນຂອງໂຮງງານທໍ່ໂຕໂຢ, ຂໍຝາກຄຳຂວັນ ແລະ ເຈດຈໍານົງຂອງທໍ່ນໍ້າໂຕໂຢ “ເລືອກນໍ້າສະອາດ ເລືອກທໍ່ນໍ້າໂຕໂຢ ເພື່ອຄົນທີ່ທ່ານຮັກໄດ້ໃຊ້ນໍ້າສະອາດ” ແລະ ຂໍ່ວິງວອນໃຫ້ທົ່ວທັງສັງຄົມລາວ ຫັນມາອຸດໜຸນ ແລະ ສົ່ງເສີມສິນຄ້າລາວ ຄຸນນະພາບສູງ (HIGH QUALITY PRODUCTS MADE IN LAOS) ເພື່ອຮັກສາເງິນຕາບໍ່ໃຫ້ຮົ່ວໄຫຼໄປຕ່າງປະເທດ ແລະ ຂໍຝາກເຖິງພັກລັດ ຈົ່ງສົ່ງເສີມອຳນວຍຄວາມສະດວກຕ່າງໆ ເພື່ອສົ່ງເສີມການຜະລິດພາຍໃນ ໃຫ້ນັບມື້ນັບເຕີບໃຫຍ່ເຂັ້ມແຂງ ແລະ ສາມາດແຂ່ງຂັນກັບສິນຄ້າຕ່າງຊາດ.
——————————————
