ອິນເຕີ ກຽມຟ້ອງ ເບັກແຮມ ຂໍ້ຫາຕັ້ງຊື່ທີມຄ້າຍຄືກັນ
ເຖິງວ່າ ເດວິດ ເບັກແຮມ ຈະລໍຖ້າໃຫ້ທີມຂອງລາວຢູ່ອາເມລິກາ ລົງຫລິ້ນຢ່າງໃຈຈົດໃຈຈໍ່ ແຕ່ຫລ້າສຸດມີຂ່າວຮ້າຍເມື່ອ ກັລໂຊ່ແມຄາໂຕ້ ສື່ຂອງອີຕາລີ ລາຍງານວ່າ: ອິນເຕີ ມິລານ ຄິດຈະເອົາຜິດລາວຢູ່ ຂໍ້ຫາຕັ້ງຊື່ຄ້າຍຄືກັບທີມຂອງພວກເຂົາ ໂດຍຕອນນີ້ຕ້ອງລໍຖ້າໃຫ້ໜ່ວຍງານປ້ອງກັນການຝ່າຝືນເຄື່ອງໝາຍການຄ້າຕັດສິນກ່ອນວ່າຈະອະນຸມັດການຟ້ອງຮ້ອງ ຫລື ບໍ່.
ອິນເຕີ ມິລານ ສະໂມສອນຊັ້ນນຳແຫ່ງເວທີ ກັລໂຊ ເຊເຣຍ ອາ ອີຕາລີ ເລັ່ງຈະດຳເນີນມາດຕະການທາງກົດໝາຍຕໍ່ ເດວິດ ເບັກແຮມ ຕຳນານມິດຟິລຊາວອັງກິດ ຈາກກໍລະນີ ເບັກແຮມ ຕັ້ງຊື່ທີມໃນ ເມເຈີລີກ ຊອກເກີ (MLS) ອາເມລິກາ ທີ່ລາວເປັນເຈົ້າຂອງຮ່ວມວ່າ ອິນເຕີ ໄມອາມີ່.
ຫລັງຈາກວາງແຜນກັນຢູ່ດົນ ໃນທີ່ສຸດທີມຂອງ ເບັກແຮມ ກໍໄດ້ຮັບການປະກາດໃຫ້ໄດ້ສິດເຂົ້າແຂ່ງຂັນ MLS ນັບແຕ່ລະດູການ 2020 ເປັນຕົ້ນໄປຢ່າງເປັນທາງການ ໃນເດືອນມັງກອນປີກ່ອນ ແລະ ໃນເດືອນກັນຍາຂອງປີກ່ອນກໍມີການບອກວ່າ: ທີມຂອງລາວຈະໃຊ້ຊື່ ຄລັບ ອິນເຕີນາຊິອອງນາລ ເດ ບານເຕະ ໄມອາມີ່ ຫລື ເອີ້ນຫຍໍ້ວ່າ: ອິນເຕີ ໄມອາມີ່ ເອັຟຊີ.
ທັງນີ້ ກັລໂຊແມຄາໂຕ້ ບອກວ່າເລື່ອງດັ່ງກ່າວເຮັດໃຫ້ຜູ້ບໍລິຫານຂອງ ອິນເຕີ ບໍ່ພໍໃຈ ເພາະມັນຄ້າຍຄືກັບຊື່ທີມຂອງພວກເຂົາ ໂດຍວ່າກັນວ່າຕາມກົດແລ້ວຍີ່ຫໍ້ຊື່ “ອິນເຕີ” ສາມາດໃຊ້ໄດ້ກັບທີມດຽວເທົ່ານັ້ນ ເຊິ່ງນັ້ນຄື “ເນຣັຊຊູຣີ” ແລະ ຕອນນີ້ທີມດັງຂອງອີຕາລີໄດ້ຍື່ນເລື່ອງຟ້ອງຮ້ອງຕໍ່ໜ່ວຍງານປ້ອງກັນການຝ່າຝືນເຄື່ອງໝາຍການຄ້າແລ້ວ.
ຂັ້ນຕອນຕໍ່ຈາກນີ້ ຄືການຖ້າເບິ່ງວ່າຄະນະກຳມະການຂອງໜ່ວຍງານປ້ອງກັນການຝ່າຝືນເຄື່ອງໝາຍການຄ້າຈະເຫັນພ້ອມຕໍ່ຄຳຟ້ອງຂອງ ອິນເຕີ ຫລື ບໍ່ ເຊິ່ງຖ້າພວກເຂົາເບິ່ງວ່າ ເບັກແຮມ ຜິດແທ້ ອິນເຕີ ຈະສາມາດໄປຟ້ອງສານແບບເປັນທາງການໄດ້ຕໍ່ໄປ.
