ເຈົ້າໜ້າທີ່ວາງມາດຕະການເຂັ້ມງວດປ້ອງກັນອຸປະຕິເຫດໃນໄລຍະ ບຸນປີໃໝ່ລາວ
ເພື່ອສະກັດກັ້ນການ ເກີດອຸປະຕິເຫດ ໃນໄລຍະບຸນປີໃໝ່ລາວ ພສ 2562 ທີ່ຈະມາເຖິງນີ້, ໃຫ້ມີຄວາມສະຫງົບ, ປອດໄພ, ເຮັດໃຫ້ການສະ ເຫລີມສະຫຼອງວັນບຸນສຳຄັນດັ່ງກ່າວມີຄວາມເບີກບານມ່ວນຊື່ນ ແລະ ເປັນລະບຽບຮຽບຮ້ອຍ, ດັ່ງນັ້ນ ກົມຕຳຫລວດ ຈະລາຈອນ ກະຊວງປ້ອງກັນຄວາມສະຫງົບ ຈຶ່ງໄດ້ອອກແຈ້ງການ ໃຫ້ສັງຄົມເພີ່ມທະວີຄວາມມີສະຕິປະຕິບັດກົດລະບຽບ ຈະລາຈອນໃຫ້ເຂັ້ມງວດຄື: ທຸກຄັ້ງ ກ່ອນຈະນຳໃຊ້ລົດ ເພື່ອເດີນທາງຕ້ອງກວດກາສະພາບເຕັກນິກ ແລະ ຄວາມພ້ອມຂອງລົດ ໃຫ້ຮັບປະກັນເປັນຢ່າງດີ ແລະ ຜູ້ຂັບຂີ່ລົດກໍຕ້ອງເອົາໃຈຂໃສ່ປະຕິບັດລະບຽບການຈະລາຈອນ ຢ່າງເຂັ້ມງວດ, ຫ້າມນຳໃຊ້ລົດຂົນສົ່ງໂດຍສານ, ບັນທຸກສິນຄ້າ, ບັນທຸກຜູ້ໂດຍສານເກີນກຳນົດ ແລະ ຊ່ວງຊິງເອົາຜູ້ໂດຍສານຢ່າງເດັດຂາດ, ລົດຂົນສົ່ງໂດຍສານທາງໄກ ຕ້ອງມີໂຊເຟີຂັບສຳຮອງ, ຜູ້ຂັບຂີ່ລົດໃຫຍ່ ຕ້ອງຮັດສາຍແອວນິລະໄພ ເພື່ອຮັບປະກັນຄວາມປອດໄພ, ຫ້າມໃຊ້ລົດ ກະບະ ບັນທຸກຄົນໂດຍສານໃສ່ກະບະ ຫລື ນັ່ງທ້າຍລົດຢ່າງເດັດຂາດ, ຫ້າມຂັບຂີ່ລົດໄວ ເກີນກົດໝາຍກຳນົດ, ( ສຳລັບ ລົດໂດຍສານຫ້າມແລ່ນໄວເກີນ 80km/h ຕາມເສັ້ນທາງຫລວງຢູ່ເຂດນອກເມືອງ), ຜູ້ດື່ມສິ່ງມຶນເມົາຫ້າມຂັບລົດຢ່າງເດັດຂາດ (ຖ້າກວດພົບເຫັນ ເຈົ້າໜ້າທີ່ຈະລາຈອນ ຈະໄດ້ກັກໄວ້ ຊ່ວງເມົາແລ້ວຈຶ່ງອະນຸຍາດໃຫ້ໄປ ຫລື ໃຫ້ຍາດພີ່ນ້ອງ ຫມູ່ຄູ່ມາຮັບເອົາເພື່ອຄວາມປອດໄພ), ຫ້າມເອົາຖັງນ້ຳໃສ່ລົດຫົດ ຫລື ສາດໃສ່ກັນໃນເວລາສັນຈອນຕາມຖະໜົນຫົນທາງ ແລະ ຫ້າມເອົານ້ຳກ້ອນໃສ່ຖົງຢາງ ແລ້ວແກ່ວງໃສ່ກັນ ໃນເວລາລົດສັນຈອນຢ່າງເດັດຂາດ, ເພື່ອຫລີກລ່ຽງການເກີດອຸປະຕິເຫດ ແລະ ບາດເຈັບ, ຫ້າມຫລີ້ນນ້ຳຢູ່ຕາມເສັ້ນທາງ ຫລື ລັດລົດຫົດນ້ຳຕາມທາງຢ່າງເດັດຂາດ, ຜູ້ຂັບຂີ່ ແລະ ຜູ້ຊ້ອນທ້າຍຕ້ອງໃສ່ໝວກກັນກະທົບ ເພື່ອຄວາມປອດໄພ( ຖ້າກວດພົບເຫັນຜູ້ລະເມີດຈະໄດ້ກັກລົດໄວ້ ແລະ ປັບໃໝຕາມລະບຽບການ) ເພື່ອຄວາມປອດໄພຂອງທ່ານ, ຫ້າມເດັກທີ່ອາຍຸບໍ່ເຖິງກະສຽນຂັບຂີ່ລົດຈັກ ຫລື ລົດໃຫຍ່ເດັດຂາດ, ຖ້າບຸກຄົນໃດ ລະເມີດຈະຖືກສຶກສາອົບຮົມ, ປັບໃໝ ແລະ ປະຕິບັດຕາມລະບຽບກົດໝາຍ.
ກົມຕຳຫລວດຈະລາຈອນ ໃຫ້ຮູ້ວ່າ: ໃນປີຜ່ານມາ ທົ່ວປະເທດ ມີອຸປະຕິເຫດເກີດຂຶ້ນ 5 ພັນກ່ວາກໍລະນີ, ສົ່ງຜົນໃຫ້ມີຜູ້ເສຍຊີວິດ 995 ຄົນ, ສະເພາະໄລຍະປີໃໝ່ລາວ 2561 ມີອຸປະຕິເຫດເກີດຂຶ້ນ 287 ກໍລະນີ, ມີຜູ້ເສຍຊີວິດ 39 ຄົນ.
