ຊີເມວ ຫາລືວຽກງານການສຶກສາເຂດຊົນນະບົດ-ຫ່າງໄກສອກຫຼີກ
ກອງປະຊຸມສາກົນວາງແຜນພັດທະນາໂຮງຮຽນໃກ້ຊາຍແດນ ລະຫວ່າງປະເທດສະມາຊິກຊີເມວ ພາຍໃນຫົວຂໍ້ “ສົ່ງເສີມການສຶກສາກ່ອນໄວຮຽນ ແລະ ເຂົ້າເຖິງການສຶກສາທີ່ມີຄຸນນະພາບ”, ເພື່ອປຶກສາຫາລືແລກປ່ຽນບົດຮຽນ ແລະ ການປະຕິບັດຕົວຈິງທີ່ດີ ກ່ຽວກັບການສຶກສາຢູ່ເຂດຊົນນະບົດ-ຫ່າງໄກສອກຫຼີກ. ໄດ້ມີຂຶ້ນໃນວັນທີ 2-3 ເມສານີ້, ຢູ່ນະຄອນຫຼວງວຽງຈັນ, ໂດຍການເປັນປະທານຮ່ວມຂອງທ່ານ ສີສະໝອນ ສິດທິຣາດວົງສາ ເຈົ້າໜ້າທີ່ລະດັບສູງອົງການ ລັດຖະມົນຕີສຶກສາອາຊີຕາເວັນອອກສ່ຽງໃຕ້ ຫົວໜ້າກົມພົວພັນຕ່າງປະເທດ ກະຊວງສຶກສາທິການ ແລະ ກິລາ ແລະ ທ່ານນາງ ເອເທວ ເອເຍສ ປາສກົວ ວາເລັຍຊູເອລາ ຜູ້ອໍານວຍການກອງເລຂາຊີເມວ, ມີຜູ້ອໍານວຍການສູນ, ສະຖາບັນ, ໂຮງຮຽນຕ່າງໆເຂົ້າຮ່ວມນໍາດ້ວຍ.
ກອງປະຊຸມຄັ້ງນີ້, ເພື່ອນໍາເອົາການຮ່ວມມືຈາກບັນດາສູນຊີເມວ ແລະ ບັນດາປະເທດຄູ່ຮ່ວມມືຕ່າງໆຂອງຊີເມວ, ຜູ້ຕັດສິນທາງດ້ານນະໂຍບາຍ, ຄູ່ຮ່ວມພັດທະນາ, ຜູ້ນໍາໂຮງຮຽນ, ເພື່ອມາແລກປ່ຽນບົດຮຽນ ແລະ ການປະຕິບັດຕົວຈິງທີ່ດີເລີດ ກ່ຽວກັບການສຶກສາຢູ່ເຂດຊົນນະບົດເຂດຫ່າງໄກສອກຫຼີກ ແລະ ວາງແຜນກິດຈະກໍາ 3 ປີຂອງໂຄງການຮ່ວມກັນ ເພື່ອປັບປຸງການເຂົ້າເຖິງການສຶກສາທີ່ມີຄຸນນະພາບຂອງໂຮງຮຽນ ແລະ ຊຸມຊົນໂຮງຮຽນຢູ່ໃກ້ຊາຍແດນປະເທດສະມາຊິກຊີເມວ .
ໃນກອງປະຊຸມດັ່ງກ່າວ, ໄດ້ມີການສະເໜີຄວາມໝາຍ ແລະ ສິ່ງທ້າທາຍຂອງການພັດທະນາການສຶກສາຢູ່ໂຮງຮຽນທີ່ໃກ້ຊາຍແດນຂອງລາວ; ການປະຕິບັດຕົວຈິງທີ່ດີເລີດຂອງບັນດາສູນຊີເມວຕ່າງໆ ໃນການສົ່ງເສີມການສຶກສາຮຽນຮ່ວມ ແລະ ການເຂົ້າເຖິງຄຸນນະພາບການສຶກສາຢູ່ເຂດຊົນນະບົດ ແລະ ເຂດຫ່າງໄກສອກຫຼີພາກພື້ນອາຊີຕາເວັນອອກສ່ຽງໃຕ້; ການລົງທຶນສໍາລັບການສຶກສາຂອງປະເທດອົດສະຕາລີ; ການຖອດຖອນບົດຮຽນ ແລະ ການວິເຄາະບັນຫາ ແລະ ຂົງເຂດໃນການແກ້ໄຂ ແລະ ການຮ່ວມມືກັນລະຫວ່າງສູນຕ່າງໆຂອງອົງການຊີເມວໃນໂຄງການພັດທະນາການສຶກສາຢູ່ໂຮງຮຽນ ທີ່ໃກ້ຊາຍແດນປະເທດສະມາຊິກຊີເມວໃນລາວ, ພ້ອມທັງເດີນທາງຢ້ຽມຢາມໂຮງຮຽນທີ່ຢູ່ໃກ້ຊາຍແດນ ລາວ-ໄທອີກດ້ວຍ ເພື່ອແນໃສ່ການຈໍາກັດບັນດາສິ່ງກີດຂວາງຕໍ່ການເຂົ້າເຖິງການສຶກສາ ແລະ ເຂົ້າເຖິງໂອກາດທາງການສຶກສາຂັ້ນພື້ນຖານສໍາລັບຜູ້ຮຽນຮູ້ ໂດຍຜ່ານການນໍາສົ່ງນະວັດຕະກໍາ ດ້ານການສຶກສາ ແລະ ຄຸ້ມຄອງບໍລິຫານ ໃຫ້ກຸ່ມທີ່ສາມາດເຂົ້າເຖິງການສຶກສາ ແລະ ກຸ່ມສ່ຽງຕ່າງໆ.
