ຮອງນາຍົກລັດຖະມົນຕີເນັ້ນໃຫ້ຂະແໜງ ປທສ ສືບຕໍ່ຍົກສູງຄວາມອາດສາມາດການຄຸ້ມຄອງມະຫາພາກໃຫ້ດີ.
ໃນວັນທີ 2 ເມສານີ້, ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ໃຫ້ກຽດພົບປະໂອ້ລົມກອງປະຊຸມຂະແໜງການໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ປະຈໍາປີ 2018,ໂດຍທ່ານໄດ້ເນັ້ນໃຫ້ສືບຕໍ່ຍົກສູງພາລະບົດບາດການຄຸ້ມຄອງມະຫາພາກ ແລະ ຄຸ້ມຄອງໂຄງລ່າງເຕັກນິກ, ໄປພ້ອມກັບການເອົາໃຈໃສ່ເປັນພິ ເສດໃນການສ້າງບຸກຄະລາກອນໃຫ້ມີຄວາມຮູ້ໃນການນໍາໃຊ້ອຸປະກອນເອເລັກໂຕຣນິກໃຫ້ທັນກັບການຂະຫຍາຍຕົວຂອງວຽກງານເຕັກໂນໂລຊີການສື່ສານຂໍ້ມູນຂ່າວສານ (ICT) ແລະ ເປັນເຈົ້າການໃນການໂຄສະນາເຜີຍແຜ່ ວິທີນຳໃຊ້ສື່ສັງຄົມອອນລາຍໃຫ້ເປັນປະໂຫຍດ, ຄຽງຄູ່ກັບມາດຕະການແກ້ໄຂປະກົດການຫຍໍ້ທໍ້ຕ່າງໆ, ພ້ອມນັ້ນທ່ານຮອງນາຍົກກໍໄດ້ສະແດງຄວາມຍ້ອງຍໍຊົມເຊີຍຕໍ່ຂະແໜງການດັ່ງກ່າວທີ່ໄດ້ສຸມໃສ່ຈັດຕັ້ງປະຕິບັດແຜນພັດທະນາຂະແໜງ ປທສ 5 ປີຂອງຕົນ ດ້ວຍບັນຍາກາດຄຶກຄື້ນ ແລະ ມີຜົນສຳເລັດຢ່າງໜ້າເພິ່ງພໍໃຈຫລາຍປະການ, ພ້ອມໄດ້ເນັ້ນໃຫ້ຂະແໜງການ ປທສ ສືບຕໍ່ຈັດຕັ້ງຜັນຂະຫຍາຍວິໄສທັດຮອດປີ 2030 ໃຫ້ບັນລຸຕາມຄາດໝາຍທີ່ວາງໃວ້ ແລະ ສືບຕໍ່ສ້າງ ແລະ ປັບປຸງພື້ນຖານໂຄງລ່າງເຕັກນິກໃຫ້ສະຖຽນ, ມີຄວາມໄວສູງ ແລະ ປອດໄພ, ໂດຍສາມາດຮອງຮັບເຕັກໂນໂລຊີໃໝ່ ເພື່ອກະຕຸ້ນການນຳໃຊ້ທີ່ເປັນປະໂຫຍດໃຫ້ກວ້າງຂວາງ ແລະ ທົ່ວເຖິງ ແຕ່ສູນກາງຮອດທ້ອງຖິ່ນ, ລວມໄປເຖິງເຂດຫ່າງໄກສອກຫລີກ, ຄຸ້ມຄອງຄື້ນຄວາມຖີ່ວິທະຍຸສື່ສານໃຫ້ເຂັ້ມງວດ ແລະ ເອົາໃຈໃສ່ຊຸກຍູ້ບັນດາບໍລິສັດລັດວິສາຫະກິດຍົກລະດັບ, ຂະຫຍາຍເຄືອຂ່າຍເຕັກນິກ, ລະບົບການບໍລິການ ທີ່ມີຄວາມອາດສາມາດແຂ່ງຂັນກັນສູງໃຫ້ສາມາດເຊື່ອມໂຍງກັບສາ ກົນໄດ້ພ້ອມໄດ້ເນັ້ນໃຫ້ບັນດາຜູ້ປະກອບການ (ບໍລິສັດ, ລັດວິສາຫະກິດ) ເອົາໃຈໃສ່ປະຕິບັດກົດໝາຍ ແລະ ລະບຽບການຕ່າງໆ ຢ່າງເຂັ້ມງວດ ເປັນ ຕົ້ນການປະຕິບັດພັນທະຕໍ່ລັດຖະບານ, ການຂະຫຍາຍເຄືອຂ່າຍຄວບຄຸມໄປສູ່ເຂດຊົນນະບົດ ຕາມທິດຊີ້ນຳຂອງລັດຖະບານ, ສ້າງເງື່ອນໄຂຫັນເປັນທັນສະໄໝດ້ວຍມາດຕະຖານສູງ ເພື່ອໃຫ້ການບໍລິການແກ່ສັງຄົມສະດວກ, ວ່ອງໄວ, ປອດໄພ, ທົ່ວເຖິງ, ມີຄຸນນະພາບສູງ ແລະ ລາຄາສົມເຫດສົມຜົນ.
