4 ປະເທດອາຊຽນສະໜັບ ສະໜູນໃຊ້ເງິນທ້ອງຖິ່ນ
ສຳນັກຂ່າວຣອຍເຕີ ລາຍງານໃນວັນທີ 3 ເມສາວ່າ: ທະນາຄານກາງຂອງໄທ, ອິນໂດເນເຊຍ, ມາເລເຊຍ ແລະ ຟີລິບປິນ ກຽມລົງນາມສະແດງເຈດຕະນາກ່ຽວກັບຂອບການເຮັດວຽກການຊຳລະເງິນສະກຸນທ້ອງຖິ່ນລະຫວ່າງກອງປະຊຸມຜູ້ນຳທະນາຄານກາງສະມາຄົມປະຊາຊົນແຫ່ງອາຊີຕາເວັນອອກສຽງໃຕ້ (ອາຊຽນ) ຢູ່ຈັງຫວັດຊຽງໃໝ່ ປະເທດໄທ ໃນວັນທີ 5 ເມສານີ້ ເພື່ອສົ່ງເສີມການຄ້າ ແລະ ການລົງທຶນດ້ວຍສະກຸນເງິນທ້ອງຖິ່ນ.
ການໃຊ້ເງິນທ້ອງຖິ່ນໃນປະເທດສະມາຊິກອາຊຽນຈະຊ່ວຍປະຢັດຕົ້ນທຶນການເຮັດທຸລະກຳແລກປ່ຽນເງິນຕາຕ່າງປະເທດສຳລັບຂະແໜງທຸລະກິດ ທ່າມກາງຄວາມປັ່ນປ່ວນທີ່ສະກຸນເງິນໃນບັນດາເສດຖະກິດກ້າວໜ້າກຳລັງຜະເຊີນ. ຂະນະທີ່ເສດຖະກິດເກີດໃໝ່ຫລາຍແຫ່ງຜະເຊີນກັບຕະຫລາດເງິນທີ່ບອບບາງຂຶ້ນ ແລະ ລັດທິປົກປ້ອງການຄ້າທີ່ຂະຫຍາຍວົງກວ້າງ ເຊັ່ນດຽວກັບກະແສເງິນທຶນໄຫລອອກ.
