ສະຫລອງວັນສາກົນໂຄສະນາເພື່ອຕ້ານລະເບີດບໍ່ທັນແຕກ 2019

   ຄະນະກໍາມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກ (ຄຊກລ) ແລະ ອົງການສະຫະປະຊາຊາດ ເພື່ອການພັດທະນາ (UNDP) ໄດ້ຈັດພິທີສະເຫລີມສະຫລອງວັນສາ ກົນໂຄສະນາ ເພື່ອຕ້ານລະເບີດບໍ່ທັນແຕກ/ມິນ ຢູ່ແຂວງຄຳມ່ວນຂຶ້ນໃນວັນທີ 4 ເມສານີ້ ເພື່ອຕ້ານລະເບີດບໍ່ທັນແຕກ/ມິນ ແລະ ຊ່ວຍ ເຫລືອການດໍາເນີນງານ ເພື່ອແກ້ໄຂບັນຫາມິນ.ສຳລັບກິດຈະກຳຕ່າງໆ, ໂດຍສະເພາະແມ່ນເພື່ອຍົກໃຫ້ເຫັນວ່າສິ່ງເສດເຫລືອຈາກສົງຄາມໄດ້ສົ່ງຜົນສະທ້ອນຕໍ່ກັບຊຸມຊົນ ແລະ ປະຊາຊົນ ເຂົ້າຮ່ວມງານດັ່ງກ່າວ, ມີທ່ານ ຄໍາແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ທັງເປັນປະທານ ຄຊກລ, ທ່ານ ນາງ ຄາຣີນາ ອິມໂມເນັນ ຜູ້ຕາງໜ້າອົງການ UNDP, ທ່ານ ຄຳສີ ອຸດທິວົງ ຮອງເຈົ້າແຂວງຄຳມ່ວນ, ຜູ້ຮັບຜິດຊອບວຽກງານລະເບີດບໍ່ທັນແຕກ, ປະທານຄະນະກຳມະການຄຸ້ມຄອງ ລບຕ ຂອງແຂວງ ແລະ ພາກສ່ວນກ່ຽວຂ້ອງຕ່າງໆເຂົ້າຮ່ວມເປັນຈໍານວນຫລາຍ.

  ພິທີສະເຫລີມສະຫລອງດັ່ງກ່າວ, ໄດ້ຈັດຂຶ້ນທີ່ໂຮງຮຽນປະຖົມບ້ານດ່າງ ເມືອງມະຫາໄຊ, ເຊິ່ງໄດ້ມີການມອບຮັບປຶ້ມຫລັກສູດກ່ຽວກັບລະເບີດບໍ່ທັນແຕກ ແລະ ເສື້ອຢືດທີ່ມີໂລໂກ້ເປົ້າໝາຍການພັດທະນາແບບຍືນຍົງທີ 18 ໃຫ້ນັກຮຽນ ແລະ ການສະແດງລະຄອນຫຸ່ນເພື່ອຫລີກລ້ຽງຄວາມສ່ຽງຂອງລະເບີດບໍ່ທັນແຕກ.  

  ໃນໂອກາດນີ້, ທ່ານລັດຖະມົນຕີ ຄໍາແພງ ໄຊສົມແພງ ໄດ້ກ່າວວ່າ: ໃນໄລຍະຊຸມປີທີ່ຜ່ານມາ, ຢູ່ແຂວງຄໍາມ່ວນ ມີອຸບັດເຫດຈາກ ລບຕ 46 ຄັ້ງ ເຮັດໃຫ້ມີຜູ້ບາດເຈັບ ແລະ ເສຍຊີວິດ 94 ຄົນ, ສະເພາະຢູ່ເມືອງມະຫາໄຊ ມີອຸປະຕິເຫດຈາກ ລບຕ 5 ຄັ້ງ ແລະ ມີຜູ້ບາດເຈັບ ແລະ ເສຍຊີວິດ 14 ຄົນ.

    ທ່ານນາງ ຄາຣີນາ ອິມໂມເນັນ ໄດ້ມີຄໍາເຫັນວ່າ: ກອງທຶນຕອບໂຕ້ສຸກເສີນແຫ່ງສະຫະປະຊາຊາດ (CERF) ໄດ້ສະໜອງທຶນຊ່ວຍເຫລືອລ້າ ຈຳນວນ 3,8 ລ້ານ ໂດລາສະຫະລັດແກ່ 4 ອົງການໃນເຄືອຂ່າຍ ສປຊ (WHO, WFP, FAO ແລະ UNDP) ເພື່ອໃຫ້ຮັກສາຊີວິດຂອງປະຊາ ຊົນ ພາຍຫລັງໄພນໍ້າຖ້ວມໃນປີ 2018. ທຶນດັ່ງກ່າວ, ແມ່ນມີເປົ້າໝາຍຊ່ວຍເຫລືອແຂວງຄຳມ່ວນ ແລະ ເຮັດໃຫ້ອົງການ UNDP ສາມາດສ້າງວຽກເຮັດງານທຳໄລຍະສັ້ນໃຫ້ປະຊາຊົນ 3.000 ຄົນ ເຊິ່ງພວກເຂົາໄດ້ສ້ອມແປງຖະໜົນຫົນທາງ ແລະ ພື້ນຖານໂຄງລ່າງອື່ນໆ ທີ່ໄດ້ຮັບຄວາມເສຍຫາຍຈາກນໍ້າຖ້ວມ.

    ບ້ານດ້າງ ແລະ ບ້ານອື່ນໆໃນເມືອງມະຫາໄຊ ໄດ້ຮັບຜົນກະທົບຢ່າງໜັກໜ່ວງຈາກໄພນໍ້າຖ້ວມໃນປີຜ່ານມາ ດ້ວຍເຫດນີ້, ການປູກຈິດສຳນຶກ ກ່ຽວກັບອັນຕະລາຍຂອງ (ລບຕ) ແກ່ເດັກນ້ອຍ ຈຶ່ງເປັນສິ່ງທີ່ສໍາຄັນຂອງວຽກງານຟື້ນຟູຫລັງໄພພິບັດ. ຫົວຂໍ້ວັນສາກົນ ເພື່ອຕ້ານລະເບີດບໍ່ທັນແຕກໃນປີນີ້ແມ່ນ “ອົງການສະຫະປະຊາຊາດສົ່ງເສີມເປົ້າໝາການພັດທະນາແບບຍືນຍົງ-ພື້ນທີ່ປອດໄພ-ບ້ານກໍປອດໄພ”, ເຊິ່ງສອດຄ່ອງກັບການສະເຫລີມ ສະຫລອງໃນມື້ນີ້.