ຮູ້ທັນເພື່ອຫລີກເວັ້ນມະເຮັງປາກມົດລູກ

     ຄວາມຈິງແລ້ວ ຄວາມເຈັບປ່ວຍອັນຕະລາຍຮ້າຍແຮງຂອງແມ່ຍິງໂດຍສະເພາະກໍມີບໍ່ເທົ່າໃດພະຍາດ ໜຶ່ງໃນນັ້ນກໍແມ່ນມະເຮັງປາກມົດລູກທີ່ຫລາຍໆຄົນອາດສົງໄສວ່າໂຕເອງກໍາລັງສ່ຽງ ຫລື ກຳລັງຈະເປັນມະເຮັງປາກມົດລູກຫລືບໍ່, ເວລາເຈັບທ້ອງປະຈຳເດືອນແຮງໆ ຖືວ່າເປັນສັນຍານເຕືອນພະຍາດນີ້ຫລືບໍ່ ? ເຊິ່ງມື້ນີ້ພວກເຮົາມີຄຳຕອບມາໃຫ້ຮຽບຮ້ອຍແລ້ວ ດັ່ງນີ້ :

     – ອາການມະເຮັງປາກມົດລູກ :

     1. ມີເລືອດອອກຈາກຊ່ອງຄອດຢ່າງບໍ່ຮູ້ສາເຫດ ເຊັ່ນ : ຂະນະ ຫລື ຫລັງມີເພດສຳພັນ, ຫລັງກວດພາຍໃນ.

     2. ຍັງຄົງມີເລືອດອອກຈາກຊ່ອງຄອດຫລັງໝົດປະຈຳເດືອນແລ້ວ ຫລື ປະຈຳເດືອນອອກມາໜ້ອຍຜິດປົກກະຕິ.

     3. ມີລົງຂາວຢ່າງເຫັນໄດ້ຈະແຈ້ງ ແລະ ອາດມີເລືອດປົນ.

     4. ມີອາການເຈັບຂະນະມີເພດສຳພັນ.

     5. ມີນຳ້ເມືອກອອກຈາກຊ່ອງຄອດຫລາຍຜິດປົກກະຕິ ຫລື ອາດປົນເລືອດ.

     6. ຍ່ຽວຫລາຍເທື່ອ ຫລື ອາດປວດບວມ ຍ່ຽວບໍ່ອອກ.

     7. ອ່ອນເພຍ, ບໍ່ມີແຮງ.

     8. ເບື່ອອາຫານ, ຈ່ອຍ, ນຳ້ໜັກລົງຢ່າງບໍ່ຮູ້ສາເຫດ.

     9. ເຈັບທ້ອງນ້ອຍ.

     10. ຫາກອາການຮຸນແຮງຂຶ້ນອາດຈະມີອາການອື່ນໆຮ່ວມນຳ ເຊັ່ນ : ຂາບວມ, ປວດຫລັງ, ຍ່ຽວມີເລືອດ ເປັນຕົ້ນ.

     ຈະເຫັນວ່າອາການທີ່ເຫັນໄດ້ຈະແຈ້ງຄືມີເລືອດອອກຈາກຊ່ອງຄອດໃນຂະນະ ຫລື ຫລັງມີເພດສຳພັນ ລວມໄປເຖິງອາການລົງຂາວທ່ີອາດມີເລືອດປົນນຳ ຫາກພົບອາການດັ່ງກ່າວບວກກັບອາການໃນຂໍ້ອື່ນໆນຳ ຂໍໃຫ້ໄປໂຮງໝໍໂດຍໄວ ເພາະຫາກເປັນມະເຮັງປາກມົດລູກກໍໍຍັງມີວິທີປ້ອງກັນ.

     ຈາກຂໍ້ມູນໜຶ່ງທີ່ມີຄວາມໜ້າສົນໃຈ ໂດຍເປັນຂໍ້ມູນທີ່ມາຈາກການສຳຫລວດສະຖິຕິທົ່ວໂລກພົບວ່າ : ມະເຮັງປາກມົດລູກນັ້ນເປັນພະຍາດມະເຮັງອັນດັບ 2 ທີ່ຈະພົບໄດ້ໃນແມ່ຍິງ ຮອງລົງມາຈາກມະເຮັງເຕົ້ານົມ. ມະເຮັງປາກມົດລູກເປັນພະຍາດທີ່ມັກເກີດຂຶ້ນໃນແມ່ຍິງອາຍຸ 30 – 70 ປີ ພົບຫລາຍໃນຊ່ວງອາຍຸ 45 – 55 ປີ ແຕ່ກໍບໍ່ໄດ້ມີການກວດພົບໃນແມ່ຍິງທີ່ອາຍຸຕໍ່າກ່ວາ 30 ປິລົງໄປ ແລະ ຜູ້ເຖົ້າທີ່ມີອາຍຸຫລາຍກ່ວາ 70 ປີ ຂຶ້ນໄປ.

      ສ່ວນຄວາມສ່ຽງຂອງມະເຮັງປາກມົດລູກແມ່ນເກີດຈາກ :

     – ເລີ່ມມີເພດສຳພັນເປັນເທື່ອທຳອິດໃນໄວບ່າວສາວ.

     – ມີຄູ່ນອນຫລາຍຄົນ.

     – ສູບຢາ.

     – ແມ່ໃຊ້ຢາໄດເອດທິນສະຕິນເບສຕຣອນໃນລະຫ່ວາງທີ່ກຳລັງຖືພາ.

     – ມີພູມຕ້ານທານທີ່ບົກພ່ອງ.

     ສ່ວນວິທີປ້ອງກັນມະເຮັງປາກມົດລູກມີຄື :

     1. ກວດສຸຂະພາບ ຫາມະເຮັງປາກມົດລູກປີລະເທື່ອ ໂດຍສະເພາະເມື່ອອາຍຸ 30 ປີຂຶ້ນໄປ.

     2. ແມ່ຍິງທີ່ໃຊ້ວິທີຄຸມກຳເນີດດ້ວຍຮໍໂມນ ເຊັ່ນ : ຢາເມັດຄຸມກຳເນີດ ຄວນກວດຫາມະເຮັງປາກມົດລູກທຸກ 6 ເດືອນ.

     3. ຫລຸດການດື່ມອານກໍຮໍໍ ແລະ ສູບຢາ.

     4. ດູແລຮັກສາສຸຂະພາບໃຫ້ແຂງແຮງ, ໝັ່ນສັງເກດອາການຜິດປົກກະຕິຂອງຮ່າງກາຍຢູ່ສະເໝີ.

     5. ຂ່າວດີຄືມີວັກແຊັງປ້ອງກັນມະເຮັງປາກມົດລູກ ສາມາດຕິດຕໍ່ໂຮງໝໍເພື່ອຂໍສັກສັກວັກແຊັງນີ້ໄດ້.