ຮັກຄວາມສະອາດ ຊາດຈຶ່ງຈະເລີນ

- advert banner 728 90 728x90 - ຮັກຄວາມສະອາດ ຊາດຈຶ່ງຈະເລີນ

ໂດຍ: ມຶກບໍ່ແຫ້ງ

- lattana 1 - ຮັກຄວາມສະອາດ ຊາດຈຶ່ງຈະເລີນ

ຄວາມສະອາດຂອງບ້ານເມືອງ ເປັນເຄື່ອງວັດແທກໜຶ່ງຂອງຄວາມຈະເລີນ ແຕ່ການຖິ້ມຂີ້ເຫຍື້ອຊະຊາຍ, ການລະບາຍນໍ້າເສຍທີ່ສົ່ງກິ່ນເໝັນ ຍັງເຫັນຢູ່ທົ່ວໄປ.

ບາງຄັ້ງ ກະແສສັງຄົມຜ່ານທາງອອນລາຍ (online) ກໍສະມາດເຮັດໃຫ້ການປ່ຽນແປງທີ່ດີ ຄືດັ່ງການແຂ່ງຂັນກັນເກັບຂີ້ເຫຍື້ອຕາມສະຖານທີ່ຕ່າງໆ ແລ້ວຖ່າຍຮູບລົງເຟສບຸກ (facebook) ທີ່ເຮັດໃຫ້ຫລາຍກຸ່ມຄົນເຮັດຕໍ່ກັນໄປ.

ການຖິ້ມຂີ້ເຫຍື້ອຊະຊາຍ ເປັນບັນຫາໜຶ່ງທີ່ຍັງບໍ່ສາມາດແກ້ໄຂໄດ້ຢ່າງເຕັມສ່ວນ. ພວກເຮົາ ມັກຈະເຫັນການ ຖິ້ມຂີ້ເຫຍື້ອ ຂອງບຸກຄົນ ຢ່າງຂາດຄວາມຮັບຜິດຊອບຕໍ່ສາທາລະນະ ຕາມສາຍທາງຕ່າງໆ ບໍ່ວ່າເໜືອ ຫຼື ໃຕ້  ເຊິ່ງເກີດມີຜົນເສຍຫລາຍຢ່າງ ເຊັ່ນ ການສ້າງມົນລະພິດ ໂດຍສະເພາະເຂດທີ່ໃກ້ກັບສາຍນໍ້າ, ຫ້ວຍຮ່ອງ, ຄອງ, ບຶງ, ນອກນັ້ນ ເມື່ອຊາວຕ່າງດ້າວທ້າວຕ່າງແດນທີ່ມາທ່ອງທ່ຽວປະເທດເຮົາຖ້າເຂົາເຫັນເຊັ່ນນັ້ນແລ້ວ, ພວກເຮົາກໍຈິນຕະນາການໄດ້ວ່າ ບໍ່ເປັນເລື່ອງດີຕໍ່ກັບການທ່ອງທ່ຽວ ແລະທັດສະນະຂອງເຂົາເຈົ້າທີ່ມີຕໍ່ຄົນລາວກໍຈະປ່ຽນ ໄປແນ່ນອນ.

ແລ້ວເປັນຫຍັງຄົນສ່ວນຫລວງຫລາຍຈຶ່ງຍັງສືບຕໍ່ຖິ້ມຂີ້ເຫຍື້ອຊະຊາຍຄືດັ່ງກ່າວ ເຊິ່ງກໍອາດມີຫລາຍເຫດຜົນ ແຕ່ໜຶ່ງໃນນັ້ນກໍອາດຮວມມີຄວາມມັກງ່າຍ, ເຫັນແກ່ໂຕ ແລະ ໄຮ້ຈິດສຳນຶກຂອງກຸ່ມບຸກຄົນທີ່ບໍ່ຄິດເຖິງສ່ວນລວມ, ນອກນັ້ນ ກໍອາດຍັງ ຮວມໄປເຖິງລະບົບ ການຈັດການ-ຄຸ້ມຄອງ ສິ່ງເສດເຫລືອ ຂອງພວກເຮົາຍັງ ອ່ອນນ້ອຍ ກໍເປັນໄດ້.

ການເກີດມີກະແສ ການກຳຈັດຂີ້ເຫຍື້ອຕາມສະຖານທີ່ຕ່າງໆແລ້ວຖ່າຍຮູບ ເພື່ອເຜີຍແຜ່ ຜ່ານທາງອອນລາຍນັ້ນໄດ້ກາຍເປັນຂະບວນການໜຶ່ງທີ່ເປັນການສົ່ງເສີມ ໂດຍສະເພາະ ກຸ່ມຜູ້ໃຊ້ສື່ອອນລາຍ  (ເຟສບຸກ) ເກັບຂີ້ເຫຍື້ອກວ້າງຂວາງກວ່າເກົ່າ ແລະເປັນການສ້າງຈິດ ສຳນຶກແນວໜຶ່ງ ໃຫ້ຄົນຮັກຄວາມສະອາດ, ຫລາຍຄົນກໍເວົ້າວ່າຂໍ້ໃຫ້ມີຂະບວນການ ແບບນີ້ແຜ່ລາມໄປຫລາຍໆແດ່ຂີ້ເຫຍື້ອທົ່ວປະເທດຈຶ່ງຈະໝົດເຮັດໃຫ້ບ້ານເຮົາສະອາດງາມ ຕາຂຶ້ນກວ່າເກົ່າ.

- 1 1 - ຮັກຄວາມສະອາດ ຊາດຈຶ່ງຈະເລີນ
- Tiger Head 728x90 - ຮັກຄວາມສະອາດ ຊາດຈຶ່ງຈະເລີນ

ແນວໃດກໍຕາມ, ຂະບວນການເກັບຂີ້ເຫຍື້ອ ເພື່ອແກ້ໄຂບັນຫາ ການຖິ້ມຂີ້ເຫຍື້ອຊະຊາຍ ນັ້ນອາດບໍ່ແມ່ນທາງອອກທີ່ຍືນຍົງ ເພາະເປັນການແກ້ໄຂບັນຫາທີ່ປາຍເຫດ, ຂີ້ເຫຍື້ອຈະໝົດ ໄປໄດ້ແນວໃດ ຖ້າຫາກຄົນຈຳນວນຫລາຍຍັງສືບຕໍ່ ຖິ້ມຂີ້ເຫຍື້ອແບບຊະຊາຍ ເຖິງແມ່ນຈະມີການ ເກັບເປັນໄລຍະ ຂີ້ເຫຍື້ອກໍບໍ່ໝົດຈັກເທື່ອ.

ຍ້ອນແນວນັ້ນ ຫ້ອງການຄຸ້ມຄອງ ແລະບໍລິການຕົວເມືອງ ໂດຍສະເພາະ ນະຄອນຫລວງ ວຽງຈັນຄຽງຄູ່ກັບການຊຸກຍູ້ການເກັບຂີ້ເຫຍື້ອເປັນປະຈຳ ແຕ່ເພິ່ນຍັງຈະປັບໃໝ ຜູ້ທີ່ຖິ້ມຂີ້ເຫຍື້ອ ຊະຊາຍນຳອີກ ເຊິ່ງສິ່ງດັ່ງກ່າວ ແມ່ນອາໄສພໍ່ແມ່ປະຊາຊົນ ເປັນຫູເປັນຕາຊ່ວຍກັນ ເພື່ອປ້ອງກັນ ບໍ່ໃຫ້ພຶດຕິກຳທີ່ຂາດຄວາມຮັບຜິດຊອບແຜ່ລາມໄປທົ່ວ. ປະຊາຊົນທ່ານໃດພົບເຫັນ ແລະສາມາດ ແຈ້ງຫ້ອງການຄຸ້ມຄອງ ແລະບໍລິການຕົວເມືອງໄດ້ໂລດ, ສຳລັບນະຄອນຫລວງວຽງຈັນ ແມ່ນໂທ: 020 56621164 ໂດຍບອກບຸກຄົນ, ຫຼື ທະບຽນ, ສີ ແລະຍີ່ຫໍ້ຂອງລົດທີ່ຖິ້ມຂີ້ເຫຍື້ອ.

ການພັດທະນາ ຕ້ອງຄຽງຄູ່ກັບການຮັກສາສິ່ງແວດລ້ອມ, ຮັກສາຄວາມສະອາດ ການເກີດມີຂະບວນການ ເກັບຂີ້ເຫຍື້ອ ແລະເຜີຍແຜ່ທາງສື່ອອນລາຍນັ້ນ ແມ່ນເປັນຜົນດີ ແຕ່ກໍຂໍໃຫ້ຂະບວນການນີ້ ກາຍເປັນສິ່ງສ້າງ ນິດໄສໃຫ້ຄົນລາວຮັກສາຄວາມສະອາດ ຊາດຈຶ່ງຈະເລີນ.

error: Content is protected !!