ທາງເພ ເສດຖະກິດກໍເລີຍເຍ້

- advert banner 728 90 728x90 - ທາງເພ ເສດຖະກິດກໍເລີຍເຍ້

ໂດຍ: ມຶກບໍ່ແຫ້ງ

- lattana 1 - ທາງເພ ເສດຖະກິດກໍເລີຍເຍ້

ເສັ້ນທາງມີບົດບາດສຳຄັນຢ່າງຍິ່ງຕໍ່ການພັດທະນາເສດຖະກິດ-ສັງຄົມຂອງຊາດ, ເມື່ອເສັ້ນທາງຂາດການຕະຫລາດກໍບໍ່ກ້າວໜ້າຈຶ່ງພາໃຫ້ເສດຖະກິດອ່ອນໂຕລົງ. ເສັ້ນທາງປຽບເໝືອນເສັ້ນເລືອດທີ່ຫລໍ່ລ້ຽງຮ່າງກາຍເຮົາ, ເມື່ອໃດເສັ້ນເລືອດອຸດຕັນເມື່ອນັ້ນສະພາວະຮ່າງກາຍກໍບໍ່ສາມາດເຮັດວຽກຢ່າງປົກກະຕິ, ຮ້າຍແຮງໄປກວ່ານັ້ນກໍເຖິງຂັ້ນເສຍຊີວິດໄດ້, ດັ່ງດຽວກັນນັ້ນສັງຄົມເຮົາຕ້ອງການຂັບເຄື່ອນໄປມາຫາສູ່ກັນ, ການຂົນສົ່ງສິນຄ້າທີ່ແລກປ່ຽນກັນ ເພື່ອເສີມສ້າງທາງດ້ານເສດຖະກິດໃຫ້ເຂັ້ມແຂງ ເຊິ່ງທັງໝົດນັ້ນຕ້ອງການເສັ້ນທາງທີ່ດີ ແລະ ພຽງພໍ.

ແຕ່ເຖິງປານນັ້ນການກໍ່ສ້າງ ແລະ ບູລະນະເສັ້ນທາງຢູ່ ປະເທດເຮົາຍັງມີສິ່ງທ້າທາຍຢ່າງຫຼວງຫຼາຍ. ເມື່ອຫລາຍປີຜ່ານມາ ພວກເຮົາພົບພໍ້ບັນຫາທີວ່າເສັ້ນທາງລາຄາສູງກາຍເຫດ ແຕ່ຄຸນນະພາບກົງກັນຂ້າມກັບລາຄາ, ແບບວ່າເມັດງາບໍ່ສົມເມັດເຂົ້າ ທຳນອງນັ້ນລະ. ຈຶ່ງເຮັດໃຫ້ຫລາຍເສັ້ນທາງ ເມື່ອສ້າງສຳເລັດແລ້ວນໍາໃຊ້ບໍ່ພໍເທົ່າໃດກໍເປ່ເພເສຍຫາຍບໍ່ເປັນທ່າ.

ນອກນັ້ນ ການກໍ່ສ້າງມີຄວາມຫລ້າຊ້າ, ຜູ້ຂຽນບໍ່ອາດລົງເລິກວ່າດ້ວຍເຫດຜົນໃດດອກ ແຕ່ຜົນອອກມາປັດຈຸບັນກໍຄືຫຼາຍເສັ້ນທາງຫລ້າຊ້າເກີນກວ່າແຜນ, ເຮັດໃຫ້ປະຊາຊົນພົບພໍ້ກັບຄວາມຫຍຸ້ງຍາກໃນການໄປມາຍົກຕົວຢ່າງເສັ້ນທາງ ແຕ່ຕານມີໄຊຊອດໃສ່ເສັ້ນທາງເລກທີ 13 ເໜືອຄ້າງຄາມາດົນສົມຄວນແລ້ວ ເຊິ່ງ ໂດຍພື້ນຖານແລ້ວເສັ້ນ ທາງດັ່ງກ່າວແມ່ນມີບົດບາດ ສຳຄັນຫລາຍທາງດ້ານເສດຖະກິດ ເພາະເນັ່ງມາຈາກສາງທ່ານາແລ້ງຜ່ານທາງ 450 ປີ ຊອດໃສ່ເສັ້ນທາງເລກທີ 13 ເມືອພາກເໜືອຂອງລາວນັບວ່າເປັນເສັ້ນທາງການຈໍລະຈອນສິນຄ້າທີ່ສຳຄັນ. ແຕ່ການກໍ່ສ້າງຊັກຊ້າ ເຮັດໃຫ້ເຮົາເສຍໂອກາດຢ່າງຫຼວງຫຼາຍທາງດ້ານເສດຖະກິດ, ພ້ອມນັ້ນພວກເຮົາກໍຍັງເຫັນປະຊາຊົນອອກມາຈົ່ມເລື້ອຍໆວ່າພວກເຂົາຫຍຸ້ງຍາກພຽງໃດທີ່ຕ້ອງທົນທຸກກັບການດົມຂີ້ຝຸ່ນມາເປັນເວລາດົນ, ເຮືອນຊານບ້ານຊ່ອງ, ຫ້າງຮ້ານຕາມແຄມທາງບໍ່ເປັນເອົາ ແລະ ອີກຢ່າງໜຶ່ງພວກເຮົາກໍຮູ້ວ່າ ຂີ້ຝຸ່ນຈາກ ເສັ້ນທາງນັ້ນກໍມີອົງປະກອບ ຂອງຝຸ່ນລະອອງຂະໜາດນ້ອຍ (PM2.5) ເຊັ່ນກັນທີ່ເປັນອັນຕະລາຍຕໍ່ສຸຂະພາບ ຢ່າງຍິ່ງ.

ນອກນັ້ນ, ເມື່ອເສັ້ນທາງເປ່ເພການບູລະນະ ຫລື ສ້ອມແປງຄືນຍັງຊັກຊ້າ. ຕົວຢ່າງ ເມື່ອລະດູຝົນຜ່ານມາ ຍ້ອນຝົນ ຕົກໜັກ ແລະນໍ້າຖ້ວມເຮັດໃຫ ເສັ້ນທາງຂອບເຂດທົ່ວປະເທດໂດຍສະເພາະ ເສັ້ນທາງຫລວງ ເລກທີ 13 ທັງໃຕ້ ແລະເໜືອເປ່ເພຫລາຍເຮັດໃຫ້ການສັນຈອນໄປມາຊັກຊ້າ ແລະ ມັກເກີດອຸປະຕິເຫດ, ລົດເປ່ເພ ແຕ່ການສ້ອມແປງແມ່ນຍັງຊັກຊ້າ ທຽບໃສ່ຄວາມຕ້ອງການ.

- 1 1 - ທາງເພ ເສດຖະກິດກໍເລີຍເຍ້

ສິ່ງດັ່ງກ່າວມັນສ້າງຜົນ ເສຍຫາຍຕໍ່ເສດຖະກິດໂດຍກົງ. ການເກັບລາຍຮັບທີ່ຫລຸດຄາດໝາຍຂອງແຂວງຄຳມ່ວນ ເມື່ອສົກປີຜ່ານມາກໍເປັນຕົວຢ່າງໜຶ່ງ. ຜ່ານການໃຫ້ສຳພາດຂອງທ່ານ ສົມຈິນດາ ຫົວໜ້າພາສີ (ອ້າງອີງຈາກໜັງສືພິມວຽງຈັນທາມ) ຢູ່ ດ່ານຂົວມິດຕະພາບລາວ-ໄທແຫ່ງທີ 3 ແຂວງຄຳມ່ວນໄດ້ກ່າວວ່າ “ສິ່ງທ້າທາຍທີ່ເປັນອຸ ປະສັກໃນການເກັບລາຍຮັບຢູ່ດ່ານຂົວມິດຕະພາບລາວ-ໄທແຫ່ງທີ 3 ແມ່ນບັນຫາພື້ນຖານໂຄງລ່າງ ໂດຍສະເພາະແມ່ນ ເສັ້ນທາງເລກທີ 12 ຢູ່ເຂດນາພ້າວ ເຊິ່ງມີໄລຍະທາງ 15 ກິ ໂລແມັດ. ເຂດດັ່ງກ່າວ ເສັ້ນທາງເປ່ເພກໍ່ໃຫ້ເກີດອຸປະຕິເຫດ ແລະ ການຂົນສົ່ງສິນຄ້າຊັກຊ້າຫຼາຍ”.

ເພາະສະນັ້ນ, ເລື່ອງເສັ້ນທາງເຮົາຕ້ອງສ້າງໃຫ້ມັນດີກວ່ານີ້ ແລະ ມີງົບປະມານແຮໄວ້ເພື່ອການສ້ອມແປງ. ທັງໝົດນັ້ນ ເຖິງວ່າມັນຈະມີສິ່ງທ້າທາຍຫລາຍຢ່າງ ແຕ່ມັນຂຶ້ນກັບເຮົາເລືອກ. ເຮົາຈະເລືອກເອົາບໍລິສັດທີ່ລົງທຶນລາຄາສູງຄຸນນະພາບຕໍ່າບໍ່? ຫລື ເຮົາຈະເລືອກເອົາຜົນປະໂຫຍດລວມຂອງຊາດ ?