ປະຊາຊົນເຂດບ້ານຈັດສັນເຂື່ອນໄຟຟ້ານ້ຳທາ 1 ໄດ້ຮັບການຟື້ນຟູຊີວິດການເປັນຢູ່ດີຂຶ້ນ
ປັດຈຸບັນ, ປະຊາຊົນທີ່ຖືກຜົນກະທົບຈາກໂຄງການເຂື່ອນໄຟຟ້ານໍ້າທາ 1 ຈໍານວນ 37 ບ້ານຢູ່ເມືອງຜາອຸດົມແຂວງບໍ່ແກ້ວ ແລະ ເມືອງນາແລ, ແຂວງຫລວງນ້ຳທາ ລວມມີ 1.735 ຄອບຄົວ ໄດ້ຮັບການຍົກຍ້າຍໄປຢູ່ເຂດບ້ານຈັດສັນໃໝ່ ເພື່ອຟື້ນຟູຊີວິດການເປັນຢູ່ດີຂຶ້ນ, ໂດຍໄດ້ຈັດສັນເນື້ອທີ່ການຜະລິດ, ໄຟຟ້າ, ນ້ຳໃຊ້ສະດວກສະບາຍ, ມີສຸກສາລາ, ໂຮງຮຽນປະຖົມ ແລະ ມັດທະຍົມຕອນຕົ້ນ, ເສັ້ນທາງໄປມາລະຫວ່າງບ້ານຕໍ່ບ້ານກໍສະດວກສະບາຍດີຂຶ້ນ.
ທ່ານນາຍບ້ານບ້ານເພັງ, ເມືອງຜາອຸດົມແຂວງບໍ່ແກ້ວ ໃຫ້ສຳພາດຕໍ່ສື່ມວນຊົນວ່າ: ບ້ານເພັງແມ່ນ 1 ໃນ 37 ບ້ານທີ່ຖືຍົກຍ້າຍຈາກຜົນກະທົບຂອງເຂື່ອນໄຟຟ້ານໍ້າທາ 1 ແລະ ໄດ້ຮັບການຈັດສັນບ້ານຢູ່ ແລະ ບ່ອນທໍາມາຫາກິນປັບປຸງຊີວິດການເປັນຢູ່ຂອງຕົນດີຂຶ້ນ, ແຕ່ແນວໃດກໍດີ, ປັດຈຸບັນປະຊາຊົນເຂດນັ້ນຍັງຕ້ອງການແນວພັນພືດ, ໂດຍສະເພາະແມ່ນໝາກເດືອຍ ແລະ ແນວພັນເຂົ້າທີ່ໃຫ້ຜົນຜະລິດສູງ.
ເຂື່ອນໄຟຟ້ານ້ຳທາ 1 ແມ່ນໂຄງການຮ່ວມມືລາວ-ຈີນຕາມແຜນຍຸດທະສາດໜຶ່ງແລວໜຶ່ງເສັ້ນທາງ, ເປັນໂຄງການຮ່ວມທຶນລະຫວ່າງບໍລິສັດຕາຂ່າຍໄຟຟ້າພາກໃຕ້ສາກົນຈຳກັດ ສປຈີນ ແລະ ລັດວິສາຫະກິດໄຟຟ້າລາວໃນຮູບແບບບີໂອທີ (BOT) ຕັ້ງຢູ່ສາຍນ້ຳທາ, ເມືອງຜາອຸດົມແຂວງບໍ່ແກ້ວ, ມີກໍາລັງຕິດຕັ້ງ 168 ເມກາວັດ ໃນມູນຄ່າການລົງທຶນທັງໜົດ 447 ລ້ານໂດລາສະຫະ
ລັດ ແລະ ຄາດວ່າແຕ່ລະປີຈະສາມາດຜະລິດພະລັງງານໄຟຟ້າໄດ້ບໍ່ຕໍ່າກວ່າ 760 ລ້ານກິໂລວັດໂມງ, ໂດຍເລີ່ມຜະລິດໄຟຟ້າແລ້ວມາແຕ່ທ້າຍປີ 2018 ຜ່ານມາ.
