ລິເວີພູລ ວາງແຜນຂະຫຍາຍສະໜາມແອນຟິລ
ປີເຕີ ມົວ ຜູ້ບໍລິຫານ ລິເວີພູລ ກ່າວວ່າ: ຕອນນີ້ກຳລັງພິຈາລະນາແຜນການຂະຫຍາຍບ່ອນນັ່ງຂອງສະໜາມ ແອນຟິວ ເພີ່ມອີກ 6.000 ບ່ອນນັ່ງ ເຊິ່ງຈະເຮັດໃຫ້ ລິເວີພູລ ເປັນສະໂມສອນທີ່ມີສະໜາມໃຫຍ່ທີ່ສຸດເປັນອັນດັບ 3 ຂອງອັງກິດທັນທີ.
ປີເຕີ ມົວ ປະທານບໍລິຫານ ລິເວີພູລ ຍອດສະໂມສອນແຫ່ງເວທີ ພຣີເມຍລີກ ອັງກິດ ເປີດເຜີຍວ່າ: ພວກເຂົາກຳລັງພິຈາລະນາຈະຂະຫຍາຍບ່ອນນັ່ງຂອງສະໜາມ ແອນຟິລ ສະໜາມມາຢາມຂອງທີມໃຫ້ເປັນ 60.074 ບ່ອນນັ່ງ ຈາກທີ່ມີຢູ່ 54.074 ບ່ອນນັ່ງ.
ກ່ອນເລີ່ມລະດູການ 2016-17 ລິເວີພູລ ເຄີຍຂະຫຍາຍຂະໜາດສະໜາມ ເມນ ສະແຕນ ຂອງພວກເຂົາໃຫ້ມີບ່ອນນັ່ງເພີ່ມອີກ 8.500 ບ່ອນນັ່ງ ເຊິ່ງສົ່ງຜົນດີຕໍ່ການເງິນຂອງທີມ ຫລັງຈາກພວກເຂົາສ້າງລາຍໄດ້ຈາກວັນທີ່ມີການແຂ່ງຂັນໃນບ້ານສູງເຖິງ 74 ລ້ານປອນ ໂດຍຖືວ່າເພີ່ມຂຶ້ນຈາກລະດູການກ່ອນໜ້ານັ້ນປະມານ 11 ລ້ານປອນ ທັງທີ່ໃນລະດູການ 2016-17 ພວກເຂົາໄດ້ຫລິ້ນໃນສະໜາມ ແອນຟິລ ລວມທຸກລາຍການ 24 ເກມ ໜ້ອຍກວ່າໃນລະດູການ 2015-16 ເຖິງ 7 ນັດ.
ຫລ້າສຸດ ປີເຕີ ມົວ ເປີດເຜີຍວ່າ: ຕອນນີ້ພວກເຂົາກຳລັງສຶກສາເຖິງຄວາມເປັນໄປໄດ້ໃນການເພີ່ມບ່ອນນັ່ງໃນສະໜາມ ແອນຟິລ ໂຣດ ເອັນ ອີກເຖິງ 6.000 ບ່ອນນັ່ງ ໂດຍລາວບອກວ່າ: ຖ້າເກີດມີການເດີນໜ້າແຜນການສ້ອມແປງສະໜາມແທ້ ຈະເກີດຂຶ້ນໃນໄລຍະເວລາທີ່ເໝາະສົມເທົ່ານັ້ນ.
ຖ້າ ລິເວີພູລ ມີການສ້ອມແປງສະໜາມຈົນມີບ່ອນນັ່ງ 60.074 ບ່ອນນັ່ງແທ້, ສະໜາມ ແອນຟິລ ຈະກາຍເປັນສະໜາມໃນລະດັບສະໂມສອນໃຫຍ່ທີ່ສຸດເປັນອັນດັບ 3 ຂອງອັງກິດ, ເປັນຮອງພຽງສະໜາມ ໂອລ ແທຣັບຟອດ ຂອງແມນເຊັສເຕີ ຢູໄນເຕັດ ທີ່ບັນຈຸໄດ້ 75.643 ຄົນ ກັບ ທ໊ອດແນ່ມ ຮ໊ອດສະເປີ ສະເຕດ້ຽມ ສະໜາມແຫ່ງໃໝ່ຂອງ ສະເປີ ເຊິ່ງບັນຈຸໄດ້ 62.062 ບ່ອນນັ່ງເທົ່ານັ້ນ.
