ລະດູຝົນມາຮອດແລ້ວ ສູນໄຂ້ຍຸງເນັ້ນປະຕິບັດ 5 ປ ໃນການສະກັດກັ້ນການລະບາດຂອງໄຂ້ເລືອດອອກ
ສູນໄຂ້ຍຸງ, ແມ່ກາຝາກ ແລະ ແມງໄມ້ ໄດ້ໃຫ້ສໍາພາດຕໍ່ນັກຂ່າວ ລາວພັດທະນາພວກເຮົາໃນວັນທີ 8 ເມສານີ້ວ່າ: ລະດູຝົນໄດ້ກ້າວເຂົ້າມາແລ້ວ, ເຊິ່ງອາດມີຄວາມສ່ຽງສູງກໍ່ໃຫ້ເກີດການລະບາດຂອງພະຍາດໄຂ້ຍຸງລາຍ ດັ່ງ ນັ້ນການເລັ່ງໃສ່ສະກັດກັ້ນຍຸງລາຍ ເຊິ່ງເປັນຕົວນໍາເຊື້ອຂອງການແຜ່ລະບາດ ພະຍາດດັ່ງກ່າວຈື່ງມີຄວາມຈໍາເປັນສູງ ໂດຍຈະຕ້ອງໄດ້ສຸມໃສ່ໂຄສະນາສຸຂະສຶກສາໃຫ້ປະຊາຊົນໃນຂອບເຂດທົ່ວປະເທດໄດ້ຮັບຮູ້ຢ່າງທົ່ວເຖິງ ແລະ ພ້ອມກັນຈັດຕັ້ງປະຕິບັດຢ່າງເປັນປົກກະຕິ ໂດຍສະເພາະແຜນການປະຕິບັດຄໍາຂວັນ 5 ປ ຄື: 1). ປິດພາຊະນະທີ່ບັນຈຸນໍ້າສະອາດຢູ່ໃນເຮືອນ ແລະ ນອກເຮືອນ ເພື່ອບໍ່ໃຫ້ຍຸງມາໄຂໃສ່, 2). ປ່ຽນນໍ້າ ພ້ອມທັງຜັດຖູທຸກໆພາຊະນະເປັນຕົ້ນແມ່ນ ເຕົ້າດອກໄມ້, ນໍ້າຮອງຕີນຕູ້, ຖານຮອງຈອກ ແລະ ອື່ນໆອີກ, 3). ປ່ອຍປາຫາງນົກຍຸງໃສ່ພາຊະນະຕ່າງໆ ເພື່ອໃຫ້ມັນກິນໜອນນໍ້າຍຸງລາຍ, 4). ປັບປຸງສະພາບແວດລ້ອມພາຍໃນເຮືອນ ແລະ ນອກເຮືອນ ເພື່ອບໍ່ໃຫ້ນໍ້າຂັງຄ້າງເປັນບ່ອນເພາະພັນຂອງຍຸງລາຍ ແລະ 5). ປະຕິບັດໃຫ້ເປັນປະຈໍາທຸກໆອາທິດ. ສູນໄຂ້ຍຸງດັ່ງກ່າວເນັ້ນສ່າ: ການກໍາຈັດຍຸງລາຍ ແລະ ໜອນນໍ້າຕ້ອງໄດ້ປະຕິບັດຄື: ຕ້ອງໄດ້ນໍາໃຊ້ສານຊາຍອາເບດ ແລະ BTI (ຈຸລິນຊີຈາກທໍາມະຊາດ) ເພື່ອຂ້າໜອນນໍ້າຍຸງລາຍ, ໂດຍສະເພາະພາຊະນະເກັບກັກນໍ້າຂະໜາດໃຫຍ່ ທີ່ບໍ່ສາມາດອະນາໄມຜັດລ້າງໃນແຕ່ລະທິດໄດ້ ຕ້ອງໄດ້ນໍາໃຊ້ສານດັ່ງ ກ່າວຕາມປະລິມານຢາ ແລະ ນໍ້າຕາມຂໍ້ແນະນໍາ ຄື: ປະລິມານຢາ 1 ກລາມຕໍ່ນໍ້າ 10 ລິດ ( ຢາດັ່ງກ່າວສາມາດຂ້າໜອນນໍ້າໄດ້ເຖິງ 3 ເດືອນ), ການລ້ຽງປາຕາມຄົວເຮືອນຕ່າງໆ ກໍເປັນວິທີໜຶ່ງທີ່ໄດ້ຜົນດີໃນການກໍາຈັດໜອນນໍ້າຍຸງລາຍ ແລະ ທໍາລາຍແຫລ່ງເພາະພັນຂອງຍຸງລາຍໃນແຕ່ລະຄົວເຮືອນໃຫ້ເປັນປະຈໍາທຸກໆທິດຢ່າງຕໍ່ເນື່ອງ ເພື່ອສາມາດຫລິກລ້ຽງບໍ່ໃຫ້ເກີດມີພະຍາດໄຂ້ຍຸງລາຍລະບາດ ແລະ ຮຽກຮ້ອງໃຫ້ປະຊົນຊົນໃນຂອບເຂດທົ່ວປະເທດ ເປັນເຈົ້າການ ແລະ ມີສ່ວນຮ່ວມໃນການຈັດຕັ້ງປະຕິບັດວຽກງານດັ່ງກ່າວຢ່າງເປັນປະຈໍາ (ອາທິດລະຄັ້ງ) ຈຶ່ງຈະມີປະສິດທິຜົນ.
