ສະຖານນີລົດໂດຍສານສາຍໃຕ້ເພີ່ມຈຳນວນລົດຕື່ມອີກຫລາຍກວ່າ 30 ຄັນເພື່ອຮອງຮັບຜູ້ໂດຍສານໄລຍະປີໃໝ່
ປັດຈຸບັນ, ຈຳນວນປະຊາຊົນທີ່ຈະເດີນທາງກັບບ້ານເພື່ອຮ່ວມສະຫລອງບຸນປີໃໝ່ກຳລັງຄືກຄື້ນ, ໂດຍສະເພາະຢູ່ສະຖານີໂດຍສານສາຍໃຕ້ໄດ້ແຫນ້ນອັ່ງໄປດ້ວຍມວນຊົນເພື່ອໄປຢາມໝູ່ເພື່ອນມິດສະຫາຍ ແລະ ກັບບ້ານເກີດເມືອງນອນຂອງຕົນ ເພື່ອຮ່ວມສະຫລອງບຸນປີໃໝ່ປະຈໍາຊາດຂອງຕົນໃຫ້ມີບັນຍາກາດເບີກບານມ່ວນຊື່ນ, ຕໍ່ສະພາບດັ່ງກ່າວ ເຈົ້າຂອງສະຖານີສາຍໃຕ້ໄດ້ອອກມາຢືນຢັນວ່າ: ຕົນໄດ້ເພີ່ມຈໍານວນລົດຕື່ມອີກຫລາຍກວ່າ 30 ຄັນ, ພ້ອມດຽວກັນນັ້ນ ກໍໄດ້ເພີ່ມມາດຕະການເຂັ້ມງວດຫ້າມບໍ່ໃຫ້ລົດໂດຍສານຂອງຕົນຮັບເອົາຜູ້ໂດຍສານຕາມເສັ້ນທາງຕ່າງໆ ແລະ ຢືນຢັນບໍ່ປັບຂຶ້ນລາຄາຜູ້ໂດຍສານຢ່າງເດັດຂາດ ເພື່ອອຳນວຍຄວາມສະດວກແກ່ມວນຊົນໄດ້ໄປມາສະດວກສະບາຍ, ດັ່ງທ່ານ ວັນເພັນ ສີສຸກ ຜູ້ອຳນວຍການສະຖານີດັ່ງກ່າວໄດ້ຊີ້ແຈງຕໍ່ສື່ມວນຊົນ ໃນວັນທີ 8 ເມສານີ້ວ່າ: ໃນໄລຍະບຸນປີໃໝ່ລາວນີ້, ສະຖານນີໂດຍສານຂອງຕົນໄດ້ເພີ່ມຖ້ຽວລົດຈາກປົກກະຕິ 60 ຄັນເພີ່ມເປັນ 90 ຄັນຕໍ່ວັນ, ພ້ອມດຽວກັນກໍໄດ້ມີການຂະຫຍາຍເວລາບໍລິການຕື່ມອີກຈາກ 4 ໂມງເຊົ້າຫາ 22 ໂມງກາງຄືນ ແລະ ຫ້າມບໍ່ໃຫ້ມີການສວຍໂອກາດຂຶ້ນລາຄາຄ່າໂດຍສານຢ່າງເດັດຂາດ ແລະ ລົດໂດຍສານທຸກຄັນຕ້ອງມີຄົນຂັບສອງຄົນ, ເພື່ອຮັບປະກັນໃຫ້ການເດີນທາງມີຄວາມປອດໄພສູງ.
ຜູ້ອຳນວຍການສະຖານີດັ່ງກ່າວໃຫ້ຮູ້ອີກວ່າ: ໃນໄລຍະປີໃໝ່ລາວຈະມີຜູ້ໂດຍສານມາໃຊ້ບໍລິການເປັນຈຳນວນຫລາຍ, ໂດຍສະເພາະນັບແຕ່ງວັນທີ 10 ຫາ 13 ເມສາ, ຊຶ່ງໃນປີຜ່ານມາມີຜູ້ໂດຍສານກ່ວາ 9 ພັນຄົນມາໃຊ້ບໍລິການ ແລະ ໃນປີນີ້ຈຳນວນກໍອາດຈະເພີ່ມຂຶ້ນ ເນື່ອງຈາກມີວັນພັກຫລາຍມື້, ຂະນະດຽວກັນ ກໍຂໍຝາກເຖິງຜູ້ໂດຍສານທຸກຄົນຈົ່ງໃຫ້ຄວາມຮ່ວມມືກັບພະນັກງານ, ໂດຍສະເພາະຫ້າມອອກລັດລົດໂດຍສານຕາມແຄມທາງ ເນື່ອງຈາກອາດເກີດຄວາມອັນຕະລາຍ ແລະ ຈະຕົກເປັນໂອກາດໃຫ້ຄົນຂັບລົດໂດຍສານນັ້ນສວຍໂອກາດເກັບຄ່າໂດຍສານເກີນລາຄາກໍອາດເປັນໄດ້.
ສຳລັບລາຄາໂດຍສານສາຍໃຕ້ຄື: ວຽງຈັນ-ທ່າແຂກ ລົດທຳມະດາ 60.000 ກີບ, ລົດພິເສດ 80.000 ກີບ, ວຽງຈັນ-ສະຫວັນນະເຂດ ລົດທຳມະດາ 75.000 ກີບ, ລົດພິເສດ 120.000 ກີບ, ວຽງຈັນ ສາລະວັນ ລົດທຳມະດາ 130.000 ກີບ, ລົດພິເສດ 190.000 ກີບ, ວຽງຈັນ-ປາກເຊ ລົດທຳມະດາ 110.000 ກີບ, ລົດພິເສດ 170.000 ກີບ ແລະ ວຽງຈັນ-ອັດຕະປື ລົດທຳມະດາ 140.000 ກີບ, ລົດພິເສດ 220.000 ກີບ.
