ເຜີຍແຜ່ການປັບປຸງລະບຽບຂໍອະນຸຍາດປຸກສ້າງ
ກະຊວງໂຍທາທິການ ແລະ ຂົນສົ່ງ ຮ່ວມກັບ ສະພາການຄ້າ ແລະ ອຸດສາຫະກໍາແຫ່ງຊາດ ໄດ້ຈັດປະຊຸມເຜີຍແຜ່ການປັບປຸງດ້ານລະບຽບການກ່ຽວກັບ ການຂໍອະນຸຍາດປຸກສ້າງ ຂຶ້ນໃນວັນທີ 9 ເມສານີ້ ທີ່ນະຄອນຫລວງວຽງຈັນ, ໂດຍການເຂົ້າຮ່ວມຂອງທ່ານ ຄໍາທະວີ ໄທພະຈັນ ຫົວໜ້າກົມເຄຫາ ແລະ ຜັງເມືອງ ແລະ ທ່ານ ນາງ ຈັນທະຈອນ ວົງໄຊ ຮອງປະທານ ສະພາການຄ້າ ແລະ ອຸດສາຫະກໍາແຫ່ງຊາດ.
ກອງປະຊຸມດັ່ງກ່າວເປັນສ່ວນໜຶ່ງທີ່ສໍາຄັນໃນການປັບປຸງສະພາບແວດລ້ອມການດໍາເນີນທຸລະກິດໃນລາວ ແລະ ເປັນການຊຸກຍູ້ໃຫ້ພາກເອກະຊົນມີສ່ວນຮ່ວມກັບພາກລັດໃນການຮຽນຮູ້-ເຂົ້າໃຈກ່ຽວກັບຕົວຊີ້ວັດການຂໍອະນຸຍາດປຸກສ້າງເພື່ອຊ່ວຍປັບປຸງສະພາບແວດລ້ອມການດໍາເນີນທຸລະກິດໃຫ້ມີຄວາມສະດວກ.
ທ່ານຫົວໜ້າກົມເຄຫາ ແລະ ຜັງເມືອງ ໄດ້ມີຄໍາເຫັນໃນກອງປະຊຸມວ່າ: ແມ່ນເປັນໂອກາດອັນດີ ເພື່ອຄວາມເຂົ້າໃຈເຖິງບົດບາດ ແລະ ລະບຽບການຂໍອະນຸຍາດປຸກສ້າງ ເພື່ອການດໍາເນີນທຸລະກິດ, ພາຍຫລັງເຫັນວ່າລາວຢູ່ໃນ ອັນດັບທີ 154 ໃນຈໍານວນ 190 ປະເທດ ທີ່ມີຄວາມສະດວກໃນການຂໍອະນຸ ຍາດດໍາເນີນທຸລະກິດຕາມການປະມານຂອງທະນາຄານໂລກ ປະຈໍາປີ 2019 ໂດຍອີງໃສ່ 10 ຕົວຊີ້ວັດດ້ວຍກັນ ເຊິ່ງການຂໍອຸນະຍາດປຸກສ້າງ ກໍເປັນຕົວຊີ້ວັດໜຶ່ງ. ໃນປະຈຸບັນເຖິງວ່າການກໍ່ສ້າງຢູ່ປະເທດເຮົາມີການຂະຫຍາຍຕົວດີຂຶ້ນ ແຕ່ຢ່າງໃດກໍຕາມ ລັດຖະບານລາວ ຍັງຈໍາເປັນຈະຕ້ອງໄດ້ມີການປັບປຸງທາງດ້ານການໃຫ້ບໍລິການ ໂດຍການຫລຸດຜ່ອນຈໍານວນຂັ້ນຕອນ, ເວລາ ແລະ ຄ່າໃຊ້ຈ່າຍໃນການຂໍອະນຸຍາດປຸກສ້າງລົງໄປພ້ອມໆກັບການເພີ່ມທະວີຄຸນນະພາບຂອງການປູກສ້າງໃຫ້ດີຂຶ້ນ. ນອກຈາກຈະເປັນການປະກອບສ່ວນເຂົ້າໃນການປັບປຸງອັນດັບທີຂອງລາວຢູ່ໃນບົດລາຍການດໍາເນີນທຸລະກິດແລ້ວ, ລະບຽບການກ່ຽວກັບການປຸກສ້າງທີ່ດີຍັງຈະຊ່ວຍເພີ່ມທະວີຄວາມປອດໄພ ແລະ ຄວາມຍືນຍົງສໍາລັບຂະແໜງການກໍ່ສ້າງ ແລະ ເສດຖະກິດອີກດ້ວຍ.
