ໂຮງໝໍມິດຕະພາບ ກຽມຄວາມພ້ອມສູງສຸດ ເພື່ອຮອງຮັບຄົນເຈັບສຸກເສີນໃນໄລະບຸນປີໃໝ່
ໃນວັນທີ 9 ເມສານີ້, ທ່ານ ດຣ ຫວັງນະຄອນ ດິດຕະພົງ ຮອງອໍານວຍການໂຮງໝໍມິດຕະພາບ (150 ຕຽງ) ຮັບຜິດຊອບການແພດສຸກເສີນ ໄດ້ໃຫ້ສໍາພາດວ່າ: ເພື່ອຮອງຮັບຄົນເຈັບຈາກອຸປະຕິເຫດ ໃນໄລຍະການສະເຫລີມສະຫລອງບຸນປີໃໝ່ລາວນີ້, ຕາມທິດຊີ້ນໍາຂອງກະຊວງສາທາລະນະສຸກ ໂຮງໝໍຂອງຕົນ ໂດຍສະເພາະອານຸກໍາມະການຕອບໂຕ້ພາວະສຸກ ໄດ້ກະກຽມຄວາມພ້ອມດ້ານບຸກຄະລາກອນ (ທ່ານໝໍ, ພະຍາບານ ແລະ ທີມແພດ), ເຊິ່ງນອກຈາກທີມແພດປະຈໍາການປົກກະຕິແລ້ວ ຍັງໄດ້ແຕ່ງຕັ້ງທີມແພດສໍາຮອງຂຶ້ນຕື່ມອີກ ຖ້າຫາກມີເຫດການຄົນເຈັບມາເພີ່ມຂຶ້ນ ກໍຈະໃຊ້ທີມເສີມເຂົ້າມາຊ່ວຍ, ນອກນີ້, ຍັງມີນັກສຶກສາຈາກມະຫາວິທະຍາໄລ ວິທະຍາສາດ ສຸຂະພາບຈໍານວນໜຶ່ງ ມາຊ່ວຍໃຫ້ບໍລິການໃນຊ່ວງໄລຍະສະຫລອງບຸນປີໃໝ່ນີ້. ພ້ອມຍັງໄດ້ກະກຽມ ອຸປະກອນການແພດທີ່ຈໍາເປັນ ຕ່າງໆຄື: ລໍ້, ຕຽງນອນ, ຜ້າປູຕຽງ, ຫ້ອງນອນຄົນເຈັບ, ຢາປົວພະຍາດ ແລະ ອື່ນໆ. ແລະ ສະເພາະ ພະແນກສຸກເສີນໂຮງໝໍດັ່ງກ່າວ ໄດ້ແບ່ງເປັນສອງຟາກ ຄື: ຫ້ອງສຸກເສີນສະເພາະກະທົບດ້ວຍອຸປະຕິເຫດ ແລະ ສຸກເສີນພາຍໃນ. ພ້ອມໄດ້ກະກຽມລະບົບຫ້ອງຜ່າຕັດໃຫ້ຮັບປະກັນ ແລະ ຈະໄດ້ເພີ່ມທະວີການ ປະສານງານ ເຮັດວຽກຮ່ວມກັນລະຫວ່າງໂຮງໝໍສູນກາງ, ໂຮງໝໍມິດຕະພາບ, ມະໂຫສົດ ແລະ ໂຮງໝໍເສດຖາທິຣາດ ເຊິ່ງແຕ່ລະໂຮງໝໍດັ່ງກ່າວໄດ້ກະກຽມທີມແພດສຸກເສີນຂອງຕົນໄວ້ເປັນຢ່າງດີ. ສໍາລັບການນໍາສົ່ງຄົນເຈັບທີ່ມີອາການຂັ້ນວິກິດ ໂຮງໝໍໃດໃກ້ທີ່ສຸດໃຫ້ນໍາສົ່ງໂຮງໝໍນັ້ນ. ພ້ອມຍັງມີການປະສານງານຫາໂຮງໝໍ 103 ແລະ 5 ເມສາ ໂດຍປະສານກັນໜ່ວຍກູ້ໄພທີ່ກຽມໃຫ້ບໍລິການໃນໄລຍະບຸນປີໃໝ່ ທົ່ວນະຄອນຫລວງວຽງຈັນ ມີທັງໝົດ 22 ຈຸດ.
ຮອງຜູ້ອໍານວຍການໂຮງໝໍດັ່ງກ່າວ ໃຫ້ຮູ້ອີກວ່າ: ນອກຈາກ, ບຸກຄະລາກອນ, ອຸປະກອບການແພດ ແລະ ສະຖານທີ່ບໍລິການແລ້ວ ເຊິ່ງສິ່ງຕ້ອງໄດ້ກະກຽມຫລາຍທີ່ສຸດກໍຄືເລືອດ, ເພາະຄົນເຈັບປະເພດກະທົບ, ເລືອດໄຫລ ແລະ ຜ່າຕັດດ່ວນ ແມ່ນໄດ້ໃຊ້ຫລາຍ, ດັ່ງນັ້ນ ຈຶ່ງຂໍຝາກຄວາມເປັນຫ່ວງເປັນໄຍນໍາຜູ້ໃຊ້ລົດໃຊ້ຖະໜົນ ໃນການສະເຫລີມສະຫລອງບຸນດັັ່ງກ່າວ ໃຫ້ມີຄວາມລະມັດລະວັງ , ເມົາບໍ່ຂັບ ເພື່ອຫລຸດຜ່ອຍການເກີດອຸປະຕິເຫດ ຄື: ໃນໄລຍະການສະເຫລີມສະຫລອງບຸນປີໃໝ່ລາວຜ່ານມາ, ໄດ້ມີຄົນເຈັບມາບໍລິການຢູ່ສຸກເສີນຂອງໂຮງໝໍມິດຕະພາບ ຈໍານວນ 1 ພັນກວ່າຄົນ, ໃນນັ້ນ, ຄົນເຈັບຖືກະທົບ 589 ຄົນ, ຄົນເຈັບອຸປະຕິເຫດຕາມທ້ອງຖະໜົນມີ 447 ຄົນ, ໃນນັ້ນ, ມີຄົນເຈັບຂັ້ນສາຫັດ 23 ຄົນ, ເສຍຊີວິດຢູ່ສຸກເສີນ 3 ຄົນ.
