ເຈົ້າໜ້າທີ່ຈະລາຈອນກຽມຄວາມພ້ອມຮັບມືເທສະການປີໃໝ່ລາວ
ໃນວັນທີ 9 ເມສານີ້, ປກສ ນະຄອນຫລວງວຽງຈັນ, ໄດ້ຈັດກອງປະຊຸມກະກຽມຄວາມພ້ອມໃນການສະກັດກັ້ນອຸປະຕິເຫດ ແລະ ປະກົດການຫຍໍ້ທໍ້ຕ່າງໆ ໃນໂອກາດບຸນປີໃໝ່ລາວ ພສ 2562, ໂດຍການເຂົ້າຮ່ວມຂອງທ່ານພັນເອກ ທົງສະຫວັດ ຫລວງຈັນດາ ຮອງຫົວໜ້າກອງບັນຊາການ ປກສ ນະຄອນຫລວງວຽງຈັນ. ໃນໂອກາດນີ້, ທ່ານພັນໂທ ຢຸດຕະພົງ ສຸວັນນະສິງ ຮອງຫົວໜ້າຫ້ອງຕຳຫລວດ ຜູ້ຊີ້ນຳວຽກງານຈະລາຈອນນະຄອນຫລວງວຽງຈັນ ໃຫ້ຮູ້ວ່າ: ໃນໄລຍະການສະຫລອງບຸນປີໃໝ່ລາວນີ້, ນະຄອນຫລວງໄດ້ຈັດກຳລັງເຈົ້າໜ້າທີ່ຫລາຍກວ່າ 600 ສະຫາຍເຂົ້າປະຈໍາການຢູ່ຈຸດຫລໍ່ແຫລມຕ່າງໆ, ພ້ອມໄດ້ອອກຂໍ້ຫ້າມຕ່າງໆຄື: ຫ້າມຂາຍສິນຄ້າ ແລະ ອຸປະກອນທີ່ກໍ່ໃຫ້ເກີດສຽງແຕກທຸກປະເພດ, ບໍ່ໃຫ້ຈູດໝາກກະໂພກ, ບັ້ງໄຟດອກທຸກຊະນິດ, ບໍ່ໃຫ້ນຳ ໃຊ້ທາດລະເບີດ, ທາດເບື່ອເຄມີ ແລະ ວັດ ຖຸອອກລິດຕໍ່ສຸຂະພາບຈິດທີ່ ເປັນຜົນລົບຕໍ່ຄວາມສະຫງົບ, ຄວາມເປັນ ລະບຽບຮຽບຮ້ອຍທາງສັງຄົມ; ຫ້າມໃຊ້ນ້ຳເປື້ອນ, ນ້ຳສີ, ນ້ຳຄັນຄາຍ, ນ້ຳກ້ອນໃສ່ຖົງຢາງຫົດ ຫລື ແກວ່ງໃສ່ກັນ, ບໍ່ໃຫ້ນຸ່ງເຄື່ອງຍົ້ວຍວນ, ສັ້ນເຂີນ, ຫລິ້ນການພະນັນ ແລະ ທ່ຽວຫລິ້ນແບບລາມົກອານາຈານຢ່າງເດັດ ຂາດ;ຫ້າມລົງຫລິ້ນຢູ່ຫາດຊາຍ ທີ່ບໍ່ໄດ້ຮັບອະນຸຍາດຈາກທາງການ ຫລື ສະ ຖານທີ່ບໍ່ມີເຈົ້າໜ້າທີ່ປ້ອງກັນຮັກ ສາຄວາມປອດໄພ, ເພື່ອເປັນການຫລີກເວັ້ນ ຕໍ່ສິ່ງທີ່ບໍ່ເພິ່ງປາຖະໜາອາດຈະ ເກີດຂຶ້ນ; ຫ້າມຂີ່ລົດເປັນພືງເປັນແພ, ແລ່ນລົດ ໄວເກີນຂອບເຂດ, ເວລາ ຂັບຂີ່ພາຫະນະທຸກຊະນິດແມ່ນ: ຫ້າມດື່ມສິ່ງມຶນເມົາ ແລະ ການຂັບຂີ່ພາ ຫະນະທຸກປະເພດໃຫ້ປະຕິບັດ ຕາມປ້າຍສັນຍານຈະລາ ຈອນຢ່າງເຄັ່ງຄັດ; ຫ້າມໃຊ້ທໍ່ຢາງຕໍ່ນ້ຳອອກມາຈາກເຮືອນ ເພື່ອຫົດນ້ຳຕາມ ທ້ອງຖະໜົນຢ່າງເດັດຂາດເພາະຈະສ້າງຄວາມແອອັດ, ກີດຂວາງການສັນຈອນ ແລະ ຫ້າມ ຫົດນ້ຳໃສ່ເຈົ້າໜ້າທີ່ໆກຳລັງປະຕິບັດໜ້າທີ່ຈັດ, ສັນຄວາມເປັນລະ ບຽບຮຽບ ຮ້ອຍຕາມເສັ້ນທາງ ແລະ ສະຖານທີ່ຕ່າງໆ. ດັ່ງນັ້ນ ຈຶ່ງຮຽກຮ້ອງ ໃຫ້ທຸກ ພາກສ່ວນຕ້ອງ ມີສະຕິລະວັງຕົວຕໍ່ທຸກສະພາບການ, ລວມໄປເຖິງການ ແກ້ໄຂ ປາກົດການຫຍໍ້ທໍ້ຕ່າງໆໃນສັງຄົມໃຫ້ຫລຸດລົງຮັບປະກັນ ຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມ, ຮັບປະກັນຄວາມປອດໄພ ແລະ ສິ່ງທີ່ສຳຄັນ ຈົ່ງຊ່ວຍກັນໂຄສະນາປຸກລະດົມມວນຊົນເຂົ້າຮ່ວມຂະ ບວນ ວຽກງານປ້ອງກັນຊາດ-ປ້ອງກັນຄວາມສະຫງົບ, ຕື່ນຕົວປະຕິບັດຄຳສັ່ງ ແນະນຳ ແລະ ທຸກຂໍ້ກຳນົດຂອງການຫລິ້ນບຸນປີໃໝ່ລາວ, ທີ່ທາງການໄດ້ ອອກແຈ້ງ ການຢ່າງເຂັ້ມງວດ. ຖ້າຫາກມີຜູ້ລະເມີດຂໍ້ຫ້າມທີ່ກ່າວມາຂ້າງເທິງນີ້ ຈະຖືກກ່າວເຕືອນ ຫລື ດຳເນີນມາດຕະການທາງກົດໝາຍຕໍ່ຜູ້ລະເມີດຝ່າຝືນໃຫ້ເຂັດຫລາບ.
