ສະພາແຫ່ງຊາດລາວ-ກຳປູເຈຍ-ມຽນມາ ແລະ ຫວຽດນາມ ຮ່ວມສໍາມະນາຄວາມ ເຂັ້ມແຂງຂອງການກວດກາງົບປະມານແຫ່ງລັດ
ກອງປະຊຸມສໍາມະນາຮ່ວມຂອງກຳມາທິການງົບປະມານສະພາແຫ່ງຊາດລາວ, ກຳປູເຈຍ, ມຽນມາ ແລະ ຫວຽດນາມ ຄັ້ງທີ 8 ພາຍໃຕ້ຫົວຂໍ້: “ສ້າງຄວາມເຂັ້ມແຂງໃຫ້ແກ່ກໍາມາທິການໃນການຕິດຕາມກວດກາການຈັດຕັ້ງປະຕິບັດງົບປະມານແຫ່ງລັດ” ໂດຍການເປັນປະທານຂອງທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດ, ເຊິ່ງມີບັນດາທ່ານກໍາມາທິການແຜນການ, ການເງິນ ແລະ ການກວດສອບ ຈາກສະພາແຫ່ງຊາດແຫ່ງລາຊະອານາຈັກກໍາປູເຈຍ, ສະຫະພາບມຽນມາ, ສສ.ຫວຽດນາມ ແລະ ສະມາຊິກສະພາແຫ່ງຊາດໃນເຂດເລືອກຕັ້ງຕ່າງໆເຂົ້າຮ່ວມນໍາດ້ວຍ.
ທ່ານປະທານສະພາແຫ່ງຊາດລາວໄດ້ມີຄໍາເຫັນກ່າວເປີດກອງປະຊຸມວ່າ: ກອງປະຊຸມສໍາມະນາຮ່ວມຂອງກໍາມາທິການງົບປະມານສະພາແຫ່ງຊາດກໍາປູເຈຍ, ມຽນມາ, ຫວຽດນາມ ແລະ ລາວ ແຕ່ລະຄັ້ງ ລ້ວນແຕ່ເປັນເວທີປຶກສາຫາລືທີ່ມີຄວາມໝາຍ, ຄວາມສຳຄັນຍິ່ງສໍາລັບລັດຖະສະພາຂອງບັນດາປະເທດ CLMV ເຊິ່ງເປັນສະມາຊິກອາຊຽນ ແລະ ເຊື່ອໝັ້ນວ່າກອງປະຊຸມຄັ້ງນີ້ ກໍຈະເປັນຂີດໝາຍສໍາຄັນອີກອັນໜຶ່ງຕໍ່ຂະບວນການເຊື່ອມໂຍງປະຊາຄົມເສດຖະກິດອາຊຽນ (AEC), ວຽກງານຕິດຕາມກວດກາຂອງສະພາແຫ່ງຊາດ ແມ່ນໜຶ່ງໃນບົດບາດໜ້າທີ່ໆສຳຄັນຂອງອົງການຕົວແທນປະຊາຊົນ, ມັນບໍ່ພຽງແຕ່ເປັນເງື່ອນໄຂເພື່ອຮັບປະກັນໃຫ້ແກ່ການຕົກລົງບັນຫາພື້ນຖານສຳຄັນຂອງຊາດເທົ່ານັ້ນ, ຫາກຍັງເປັນບ່ອນອີງໃຫ້ສະພາແຫ່ງຊາດອອກຂໍ້ຕົກລົງທີ່ມີລັກສະນະຊັດເຈນ ແລະ ປັບປຸງກົດໝາຍໃຫ້ເປັນລະບົບຄົບຖ້ວນດີຂຶ້ນ, ກໍດັ່ງໄດ້ຮັບຮູ້ນໍາກັນແລ້ວວ່າ: ກໍາມາທິການງົບປະມານ ແມ່ນກົງຈັກເສນາທິການທີ່ສໍາຄັນຂອງສະພາແຫ່ງຊາດ ໃນການປະຕິບັດພາລະບົດບາດຕິດຕາມກວດກາການຈັດຕັ້ງປະຕິບັດລັດຖະທໍາມະນູນ, ກົດໝາຍ, ກໍຄືມະຕິກອງປະຊຸມສະພາແຫ່ງຊາດກ່ຽວກັບແຜນພັດທະນາເສດຖະກິດ-ສັງຄົມ ແລະ ງົບປະມານແຫ່ງລັດ, ເຊິ່ງການຈັດຕັ້ງປະຕິບັດພາລະບົດບາດດັ່ງກ່າວໃນໄລຍະຜ່ານມາເຫັນວ່າມີຜົນສໍາເລັດຫລາຍດ້ານສາມາດປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງແຕ່ລະປະເທດ, ສາມາດຫັນວຽກງານດັ່ງກ່າວເຂົ້າສູ່ກົດໝາຍ, ຮັບປະກັນຄວາມໂປ່ງໃສ ແລະ ສາມາດກວດສອບໄດ້, ເພີ່ມທະວີການມີສ່ວນຮ່ວມຂອງປະຊາຊົນເຂົ້າໃນການຕິດຕາມກວດກາ, ຮັບປະກັນການບໍລິຫານ ແລະ ນໍາໃຊ້ງົບປະມານເຂົ້າໃນການພັດທະນາດ້ານຕ່າງໆຢ່າງມີຄຸນນະພາບ ແນໃສ່ຍົກສູງຊີວິດການເປັນຢູ່ຂອງປະຊາຊົນໃຫ້ດີຂຶ້ນເທື່ອລະກ້າວ, ແຕ່ຄຽງຄູ່ກັບຜົນສໍາເລັດດັ່ງກ່າວ, ພວກເຮົາຍັງສັງເກດເຫັນວ່າມີບາງດ້ານຍັງເປັນສິ່ງທ້າທາຍໃນການຈັດຕັ້ງປະຕິບັດພາລະບົດບາດການຕິດຕາມກວດກາວຽກງານງົບປະມານ, ການເງິນ ແລະການກວດສອບ ໂດຍສະເພາະການສ້າງ, ປັບປຸງກົດໝາຍ ແລະ ນິຕິກໍາໃຕ້ກົດໝາຍ ໃນຂົງເຂດວຽກງານການເງິນ, ງົບປະມານ ແລະ ການກວດສອບ ຍັງບໍ່ທັນເປັນລະບົບຄົບຊຸດເທົ່າທີ່ຄວນ, ໂດຍສະເພາະກົດໝາຍທີ່ຕິດພັນ ກັບການຈັດເກັບລາຍຮັບ ແລະ ການຄຸ້ມຄອງລາຍຈ່າຍງົບປະມານ. ສະ ນັ້ນ, ກອງປະຊຸມໃນຄັ້ງນີ້ ຖືເປັນໂອກາດອັນດີທີ່ພວກເຮົາຈະໄດ້ຮ່ວມກັນຄົ້ນຄວ້າ, ປຶກສາຫາລື, ແລກປ່ຽນຄວາມຄິດເຫັນ, ຖອດຖອນບົດຮຽນ, ຊອກຫາກົນໄກ, ວິທີການ ແລະ ມາດຕະການທີ່ ເໝາະສົມບົນພື້ນຖານກົດໝາຍ ແລະ ນິຕິກໍາໃຕ້ກົດໝາຍທີ່ກ່ຽວຂ້ອງ ເພຶ່ອຍົກສູງພາລະບົດບາດ ຂອງກໍາມາທິການງົບປະມານໃນການປະກອບສ່ວນແກ້ໄຂສິ່ງທ້າທາຍ ແລະ ຂໍ້ຄົງຄ້າງທີ່ກ່າວມານັ້ນ ໃຫ້ມີປະສິດທິພາບ ແລະ ມີປະສິດທິຜົນ ດີຂຶ້ນກວ່າເກົ່າ.
ໃນນີ້, ທ່ານ ນາງ ປານີ ຢາທໍ່ຕູ້ ຍັງກ່າວຕື່ມວ່າ: ເພື່ອເຮັດໃຫ້ກອງປະຊຸມສໍາມະນາຮ່ວມຄັ້ງນີ້ປະສົບຜົນສໍາເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້, ຂໍສະເໜີມາຍັງບັນດາທ່ານ ຜູ້ແທນ ຈົ່ງໄດ້ເອົາໃຈໃສ່ປຶກສາຫາລື ແລະ ພິຈາລະນາວິທີການ ແລະ ມາດຕະການໃນການສ້າງຄວາມເຂັ້ມແຂງໃຫ້ແກ່ວຽກງານຕິດຕາມກວດກາງົບປະມານແຫ່ງຊາດຂອງລັດຖະບານ ແລະ ບັນຫາຕ່າງໆດ້ວຍຄວາມຮັບຜິດຊອບ, ສ້າງສັນ ແລະ ຄວາມເປັນອາຊຽນ. ການປະກອບສ່ວນຂອງບັນດາທ່ານ ຈະເຮັດໃຫ້ກອງປະຊຸມສໍາມະນາຮ່ວມໃນຄັ້ງນີ້ ບັນລຸໄດ້ຜົນສໍາເລັດຕາມຈຸດປະສົງ ແລະ ຄາດໝາຍທີ່ວາງໄວ້ ເພື່ອຮັບໃຊ້ຜົນປະໂຫຍດລວມຂອງປະຊາຊົນ.
ໃນກອງປະຊຸມ, ທ່ານ ວິໄລວົງ ບຸດດາຄໍາ ປະທານກໍາມາທິການແຜນການ, ການເງິນ ແລະ ການກວດສອບ ໄດ້ມີຄໍາເຫັນກ່າວຕໍ່ກອງປະຊຸມ ເຊິ່ງມີເນື້ອໃນບາງຕອນວ່າ: ກອງປະຊຸມສໍາມະນາຮ່ວມ 4 ກໍາມາທິການສະພາແຫ່ງຊາດ ກໍາປູເຈຍ, ລາວ, ມຽນມາ ແລະ ຫວຽດນາມ ຈຸດປະສົງຕົ້ນຕໍ ແມ່ນຈະສຸມໃສ່ປຶກສາຫາລືແລກປ່ຽນຄຳຄິດຄຳເຫັນ ແລະ ຖອດຖອນບົດຮຽນຮ່ວມກັນດັ່ງນີ້: ສິ່ງທ້າທາຍໃໝ່ຂອງກໍາມາທິການແຜນການ, ການເງິນ, ງົບປະມານ ແລະ ການກວດສອບ ຕໍ່ກັບການປະເຊີນກັບການປ່ຽນແປງໃໝ່ໃນໂລກ; ບົດຮຽນທີ່ດີຂອງອົງການກວດສອບແຫ່ງລັດ ໃນການສະໜັບສະໜູນ ກໍາມາທິການ; ບົດຮຽນທີ່ດີຂອງກະຊວງການເງິນໃນການສະໜັບສະໜູນກໍາມາທິການ; ທົບທວນຄືນ ຜົນສໍາເລັດໃນການຈັດຕັ້ງປະຕິບັດ ເນື້ອໃນກອງປະຊຸມເທື່ອທີ 7 ທີ່ຈັດຂຶ້ນຢູ່ນະຄອນຫລວງພະນົມເປັນ, ລາຊະອານາຈັກກຳປູເຈຍ ແລະ ຈະໄດ້ພ້ອມກັນກຳນົດທິດທາງແຜນການຮ່ວມມື ໃນຕໍ່ໜ້າຮອດປີ 2021 ໂດຍການເຊັນບົດບັນທຶກຄວາມຊ່ວຍຈຳ (MOU) ໃນທ້າຍກອງປະຊຸມ.
ໃນວັນດຽວກັນ, ກ່ອນຈະເຂົ້າຮ່ວມກອງປະຊຸມສຳມະນາຄັ້ງນີ້, ບັນດາຄະນະຜູ້ແທນຂອງ 4 ປະເທດ ຍັງໄດ້ເຂົ້າຢ້ຽມຂໍ່ານັບທ່ານປະທານະສະພາແຫ່ງຊາດອີກດ້ວຍ.
(ສົມນຶກ ແກ້ວໄຊຍະຈັກ)
