ຈີນ ແລະ ອີຢູ ຈະຢຶດໝັ້ນໃນພາຫຸພາຄີ ແລະ ສົ່ງເສີມການຄ້າຮ່ວມກັນ
ຈີນ ແລະ ສະຫະພາບເອີຣົບ (EU) ໄດ້ບັນລຸຂໍ້ຕົກລົງຄັ້ງສຳຄັນໃນດ້ານທະວີພາຄີ, ການຮ່ວມມືໃນອະນາຄົດ ແລະ ການສະໜັບສະໜູນແນວທາງພະຫຸພາຄີຕໍ່ໄປ ໃນລະຫວ່າງກອງປະຊຸມປະຈຳປີ ຢູ່ນະຄອນຫລວງບຣຸກແຊນ ຂອງແບນຊິກ.
ນາຍົກລັດຖະມົນຕີ ຫລີ ເຄີ້ສຽງ ຂອງຈີນ, ທ່ານ ໂດນັລ ທຸສ ປະທານສະພາເອີຣົບ ແລະ ທ່ານ ມອງ ໂຄ໊ດ ຍຸງເກີ ປະທານຄະນະກຳມາທິການເອີຣົບ ເປັນປະທານຮ່ວມໃນກອງປະຊຸມ ຈີນ-ອີຢູ ຄັ້ງທີ 21, ທັງສອງຝ່າຍຕົກລົງຈະຂະຫຍາຍການຮ່ວມມືໃນຜົນປະໂຫຍດທີ່ມີຮ່ວມກັນໃຫ້ຫລາຍຂຶ້ນ ເພື່ອນຳໄປສູ່ການຮ່ວມມືທີ່ໄດ້ປະໂຫຍດຮ່ວມກັນທຸກຝ່າຍ, ສົ່ງເສີມເສດຖະກິດໂລກ ແລະ ພາຫຸພາຄີທາງການຄ້າ ລວມທັງຕໍ່ຕ້ານນະໂຍບາຍກີດກັ້ນທາງການຄ້າ ແລະ ການດຳເນີນນະໂຍບາຍແຕ່ພຽງຝ່າຍດຽວ ເພື່ອຍົກລະດັບການບໍລິຫານໂລກໃນການຮັກສາໄວ້ເຊິ່ງສັນຕິພາບ ແລະ ສະຖຽນລະພາບທົ່ວໂລກ. ໃນການດ້ານຄ້າ ຈີນ ແລະ ອີຢູ ສັນຍາວ່າຈະເປີດຕະຫລາດໃຫ້ຫລາຍຂຶ້ນ ແລະ ສະໜັບສະໜູນລະບົບການຄ້າພະຫຸພາຄີຕາມລະບຽບອົງການການຄ້າໂລກ. ທັງສອງຝ່າຍຍັງຕົກລົງສະໜັບສະໜູນໂຄງການເສັ້ນທາງສາຍໄໝໃໝ່ຂອງຈີນ ແລະ ກົນລະຍຸດຂອງອີຢູໃນນະໂຍບາຍເຊື່ອມຕໍ່ເອີຣົບ ແລະ ອາຊີ.
