ປະທານ​ປະ​ເທດ​ ບຸນຍັງ ວໍລະຈິດ ອວຍພອນ​ປີ​ໃໝ່​ລາວ ພສ 2562

- advert banner 728 90 728x90 - ປະທານ​ປະ​ເທດ​ ບຸນຍັງ ວໍລະຈິດ ອວຍພອນ​ປີ​ໃໝ່​ລາວ ພສ 2562

ໃນວັນທີ 11 ເມສານີ້, ທ່ານ ບຸຸນຍັງ ວໍລະ​ຈິດ ປະທານ​ປະ​ເທດ​ແຫ່ງ ສປປ ລາວ ໄດ້ອ່ານສານອວພອນ​ ໃນ​​ໂອກາດ​ສົ່ງ​ທ້າຍ​ປີ​ເກົ່າ (ປີ​ຈໍ) ​ແລ​ະ ຕ້ອນຮັບ​ປີ​ໃໝ່ (ປີ​ກຸນ) ພ.​ສ 2562 ໂດຍມີເນື້ອໃນວ່າ: ​ເພື່ອເປັນການສືບທອດ​ຮີດຄອງ​ປະ​ເພນີ​ອັນດີງາມຂອງຊາດລາວເຮົາແຕ່​ບູຮານ​ນະ​ການ, ຂ້າພະ​ເຈົ້າຕາງໜ້າ​ການ​ນໍາ​ພັກ-ລັດ​ ຂໍ​ຖື​​ໂອກາດ​ອັນ​ເປັນ​ສິລິ​ມຸງຄຸນ​ນີ້ ຂໍ​​ເອົາ​ຄວາມ​ສາມັກຄີ​ອັນ​ອົບ​ອຸ່ນ, ຄວາມ​ເປັນ​ຫ່ວງ​ເປັນ​ໄຍອັນ​ບໍລິສຸດຜຸດຜ່ອງ, ຝາກຄວາມ​ຢື້​ຢາມ​ຖາມ​ຂ່າວ​ອັນ​ສະໜິດສະໜົມ ແລະ ສົ່ງ​ພອນ​ໄຊ​ອັນ​ປະ​ເສີດ​ມາ​ຍັງ​ປະຊາຊົນລາວບັນດາເຜົ່າທີ່​ຢູ່​ພາຍ​ໃນ ​ແລະ ຕ່າງປະ​ເທດ, ທັງຊາວ​ຕ່າງປະ​ເທດທີ່​ພວມດໍາລົງ​ຊີວິດ ​ແລະ​ ປະຕິບັດ​ພາລະກິດ​ຂອງ​ຕົນ​ຢູ່ລາວ ​​ແລະ ​ບັນດາ​ປະ​ເທດ​ເພື່ອ​ນມິດ​ສາກົນທັງຫຼາຍ ຂໍ​ໃຫ້​ທຸກ​ທ່ານຈົ່ງ​ມີ​ແຕ່​ຄວາມຜາສຸກເບີກບານ​ມ່ວນ​ຊື່ນ, ມີ​ສັນຕິພາບ, ມິດຕະພາບ ​ແລະ ​ມີຄວາມ​ຈະ​ເລີ​ນກ້າວໜ້າທຸກ​ປະການ.

- new3 - ປະທານ​ປະ​ເທດ​ ບຸນຍັງ ວໍລະຈິດ ອວຍພອນ​ປີ​ໃໝ່​ລາວ ພສ 2562

​    ຫວນຄືນຕະຫລອດ​ໄລຍະປີ ພ.ສ 2561 ທີ່​ຜ່ານ​ພົ້ນ​ໄປ​ ກໍ​ເປັນ​ອີກ​ປີ​ໜຶ່ງ​ທີ່​ປວງ​ຊົນ​ລາວ​ທັງ​ຊາດ​ມີ​ຄວາມ​ເອກອ້າງ​ທະ​ນົງ​ໃຈ, ​ທົ່ວ​ພັກ-ລັດ, ທົ່ວ​ກໍາລັງ​ປະກອບ​ອາວຸດ ​ແລະ​ ປວງ​ຊົນ​ລາວ​ທັງ​ຊາດ ​ໄດ້​ມີ​ຄວາມ​ສາມັກຄີຮ່ວມຈິດຮ່ວມໃຈ​ກັນ​ຈັດ​ຕັ້ງ​ປະຕິບັດ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ X ຂອງ​ພັກ ​ແລະ​ແຜນ​ພັດທະນາ​ເສດຖະກິດ-​ສັງຄົມ​ ​ແຫ່ງ​ຊາດ 5 ປີຄັ້ງ​ທີ VIII ​​ຢ່າ​ງ​ເປັນ​ຂະ​ບວນຟົດ​ຟື້ນ, ຮອບດ້ານ ​ແລະ ຕໍ່​ເນື່ອງ, ພ້ອມນັ້ນ ຍັງໄດ້ພ້ອມກັນຜ່ານ​ຜ່າທຸກ​ອຸປະສັກຄວາມ​ຫຍຸ້ງຍາກ​ນາໆ​ປະການທີ່ເກີດຂຶ້ນອັນ​ໄດ້​ປະກອບສ່ວນ​​ສໍາຄັນ​ ​ເຮັດ​ໃຫ້ປະ​ເທດ​ຊາດສືບຕໍ່​ມີ​ສະຖຽນ​ລະ​ພາບ​ທາງ​ດ້ານ​ການ​ເມືອງ​ຢ່າງ​ໜັກ​ແໜ້ນ, ສັງຄົມມີຄວາມສະຫງົບ​ໂດຍ​ພື້ນຖານ, ​ເສດຖະກິດ​ແຫ່ງ​ຊາດ​ຂະຫຍາຍ​ຕົວຢ່າງ​ຕໍ່​ເນື່ອງ, ຊີວິດ​ການ​ເປັນ​ຢູ່​ຂອງ​ປະຊາຊົນ​ລາວ​ບັນດາ​ເຜົ່າ​ໄດ້​ຮັບ​ການ​ປັບປຸງ​ ​ແລະ​ ຍົກ​ສູງ​ໃຫ້​ດີ​ຂຶ້ນ​ເລື້ອຍໆ,​ ອັນພິເສດ ​ໃນ​ປີ​ຜ່ານມາ ພວກ​ເຮົາໄດ້​ພ້ອມກັນ​ ສະ​ເຫຼີ​ມສະຫຼອງ​ວັນ​ສ້າງ​ຕັ້ງ​ເມືອງ ວຽງ​ໄຊ ຖານ​ທີ່​ໝັ້ນ​ຂອງ​ການ​ປະຕິວັດຄົບຮອບ 50 ປີ ​ແລະ ວັນ​ສ້າງ​ຕັ້ງ​ກອງທັບປະຊາຊົນ​ລາວ​ຄົບຮອບ 70 ປີຂຶ້ນ ຢ່າງ​ເປັນ​ຂະ​ບວນຟົດ​ຟື້ນ​ໃນ​ຂອບ​ເຂດ​ທົ່ວ​ປະ​ເທດ, ​ສ້າງ​ຄວາມ​ເຊື່ອ​ໝັ້ນ​ຂອງ​ປະຊາຊົນລາວບັນດາເຜົ່າ ຕໍ່​ການ​ນໍາພາ​ຂອງ​ພັກນັບ​ມື້​ນັບ​ຂະຫຍາຍຕົວ​ອອກ​ຢ່າງ​ກວ້າງຂວາງ ​ແລະ ​ເລິກ​ເຊິ່ງທັງ​ໄດ້​ຮັບ​ຄວາມ​ເຊື່ອ​ໝັ້ນ​ຈາກ​ເພື່ອນ​ມິດສາ​ກົນຫຼາຍຂຶ້ນ, ​ເຮັດ​ໃຫ້​ບົດບາດ​ຂອງ​ປະເທດພວກ​ເຮົາ​ໃນ​ເວທີ​ສາກົນ​ສູງ​ເດັ່ນ​ຂຶ້ນ;ປະກອບສ່ວນ ສ້າງ​ທ່ວງທ່າ ​ແລະ ​ບາດກ້າວ​ທີ່​ດີ​ໃຫ້​ແກ່​ການ​ກ້າວ​ເຂົ້າ​ສູ່ປີ​ກຸນ ພ.ສ 2562 ​ເຊິ່ງ​ເປັນ​ປີ​ທີ່​ມີ​ຄວາມ​ໝາຍ​ສໍາຄັນ​ຢ່າງ​ຍິ່ງ ມີທັງກາລະໂອກາດ ແລະ ສິ່ງທ້າທາຍ ​ເພາະວ່າເປັນສົກ​ປີ​ທ້າຍ​ສະ​ໄໝ​ຂອງ​ການຈັດ​ຕັ້ງປະຕິບັດມະ​ຕິກອງ​ປະຊຸມ​ໃຫຍ່ຄັ້ງ​ທີ X ຂອງ​ພັກ ​ແລະ​ ແຜນ​ພັດທະນາ​​ເສດຖະກິດ-ສັງຄົມ ​ແຫ່ງ​ຊາດ 5 ປີຄັ້ງ​ທີ VIII ຊຶ່ງ​ພວກ​ເຮົາ​ຈະ​​ໄດ້​ສຸມ​ໃສ່​ແກ້​ໄຂບັນຫາຕ່າງໆ​ເພື່ອເຮັດ​ໃຫ້​ປະຊາຊົນ​ຫລຸດ​ພົ້ນ​ອອກ​ຈາກ​ຄວາມທຸກ​ຍາກ ​ແລະ ​ສະພາວະ​ດ້ອຍ​ພັດທະນາ​ໃນ​ອະນາຄົດ​ອັນ​ໃກ້​ນີ້, ຄຽງຄູ່ກັນນັ້ນ ພວກເຮົາຍັງຈະໄດ້ສຸມໃສ່ສ້າງຂະບານການ​ກະກຽມ​ກອງ​ປະຊຸມ​ໃຫຍ່​ຄັ້ງ​ທີ XI ຂອງ​ພັກສ້າງບາດລ້ຽວໃໝ່, ສ້າງກໍາລັງແຮງໃໝ່ ແລະ ສ້າງປັດໃຈໃໝ່ທີ່ສໍາຄັນ ເພື່ອເສີມຂະຫຍາຍຜົນສໍາເລັດໃນໄລຍະຜ່ານມາ ສູ້ຊົນບຸກບືນ ສ້າງສາປະເທດຊາດພວກເຮົາໃຫ້ນັບມື້ຈະເລີນຮຸ່ງເຮືອງ, ດັ່ງທີ່ ປະທານ ໄກສອນ ພົມວິຫານ ໄດ້ເຄີຍຊີ້ທິດເຍືອງທາງໃຫ້ພວກເຮົາໄວ້ວ່າ “ສ້າງ ສປປ ລາວ ໃຫ້​ມັ່ງ​ຄັ່ງ, ​ເຂັ້ມ​ແຂງ, ປະຊາຊົນ​ຮັ່ງມີ​ຜາ​ສຸກ, ສັງຄົມ​ມີ​ຄວາມ​ສາມັກຄີ​ປອງ​ດອງ, ປະ​ຊາ​ທິປະ​ໄຕ, ຍຸຕິ​ທໍາ ​ແລະ​ສີວິ​ໄລ”.

ດັ່ງນັ້ນ,​ ຂໍ​ຖື​ໂອກາດ​ນີ້​ຮຽກຮ້ອງ​ມາ​ຍັງ​ພີ່ນ້ອງ​ຮ່ວມ​ຊາດ​ທຸກ​ເຜົ່າທຸກ​ຊັ້ນ​ຄົນ, ສະມາຊິກ​ພັກ, ພະນັກງານ, ທະຫານ, ຕໍາຫລວດຈົ່ງ​ພ້ອມ​ກັນ​ເພີ່ມ​ທະວີ​ຮັກສາ​ມູນ​ເຊື້ອ​ຄວາມ​ສາມັກຄີອັນ​ເປັນ​ປຶກ​ແຜ່ນ​ແໜ້ນ​ໜາ, ​ເຊີດ​ຊູ​ນໍ້າ​ໃຈ​ຮັກ​ຊາດ, ຕັ້ງໜ້າ​ເສີມ​ຂະຫຍາຍ​ມູນ​ເຊື້ອ​ອັນ​ດີງາມ​ຂອງ​ຊາດ​ລາວ-ຂອງ​ຄົນ​ລາວ​ເຮ​ົາ​ໃຫ້​ແຂງ​ແຮງ​ຂຶ້ນ​ກວ່າ​ເກົ່າແລະ​ຖື​ໂອກາດ​ນີ້​ເຊີນຊວນ​ ບັນດາປະເທດເພື່ອນມິດ, ນັກ​ທ່ອງ​ທ່ຽວ​ທັງ​ພາຍ​ໃນ ​ແລະ​ຕ່າງປະ​ເທດ ​​ເຂົ້າ​ມາ​ສໍາຜັດ​ກັບ​ແຫ​ລ່ງທ່ອງ​ທ່ຽວ​ທາງທໍາ​ມະ​ຊາດທີ່ສວຍງາມ, ແຫລ່ງທ່ອງທ່ຽວທາງປະຫວັດສາດອັນລໍ້າຄ່າທີ່ມີມາແຕ່ບູຮານນະການ, ມາ​ສໍາຜັດກັບ​ຮີດຄອງ​ປະ​ເພນີ​ວັດທະນະ​ທໍາ​ອັນ​ດີງາມຂອງ​ລາວ​ເຮົາ ​ໃຫ້ຫລາຍ​ຂຶ້ນ. ​    ໃນ​ໂອກາດ​ອັນ​ເປັນ​ສິລິ​ມຸງຄຸນ ​ແລະ​ ເບີກບານ​ມ່ວນ​ຊື່ນ​ນີ້, ອີກ​ເທື່ອ​ໜຶ່ງ​ຂ້າພະ​ເຈົ້າ​ຕາງໜ້າ​ໃຫ້​ຄະນະ​ບໍລິຫານ​ງານ​ສູນ​ກາງ​ພັກ ​ແລະ​ ລັດຖະບານ ຂໍ​ສົ່ງ​ພອນ​ໄຊ​ອັນ​ປະ​ເສີດມາ​ຍັງ​ພີ່ນ້ອງ​ຮ່ວມ​ຊາດ​ ພະນັກງານ, ທະຫານ, ຕໍາຫລວດ ພ້ອມດ້ວຍປະຊາ ຊົນລາວບັນດາເຜົ່າທັງໝົດ ​ຈົ່ງ​ມີພາລານາໄມສົມບູນ, ມີ​ແຕ່​ຄວາມ​ຜາ​ສຸກແລະ​ມີ​ຜົນ​ສໍາ​ເລັດ​ໃໝ່ໃຫຍ່ຫລວງກວ່າເກົ່າ ແລະ ​ຂໍ​ສົ່ງ​ຄວາມ​ຢ້ຽມຢາມ​ຖາມ​ຂ່າວ ​ແລະ ​ຄວາມ​ເປັນ​ຫ່ວງ​ເປັນ​ໄຍຂອງ​ການ​ນໍາ​ພັກ-ລັດ ​ໄປ​ຍັງ ປະຊາຊົນເມືອງສະໜາມໄຊ ແລະ ປະຊາຊົນ ເຂດທີ່ໄດ້ຮັບຜົນກະທົບ ຈາກໄພທໍາມະຊາດໃນປີຜ່ານມາ ຈົ່ງ​ເຂັ້ມ​ແຂງ, ມີຄວາມຜາສຸກ ພ້ອມກັນຜ່ານຜາທຸກຄວາມຫຍຸ້ງຍາກ ສ້າງຈິດໃຈອັນໃໝ່ ຮ່ວມກັນສ້າງປະຫວັດສາດໜ້າໃໝ່ໃນການສ້າງສາພັດທະນາປະເທດຊາດ.

- lattana 1 - ປະທານ​ປະ​ເທດ​ ບຸນຍັງ ວໍລະຈິດ ອວຍພອນ​ປີ​ໃໝ່​ລາວ ພສ 2562
error: Content is protected !!