- advert banner 728 90 728x90 -

ໄລຍະປີໃໝ່ມີ​ອັກຄີ​ໄພເກີດຂຶ້ນຢູ່ຫລາຍທ້ອງຖິ່ນ

- new3 -

  ຕາມການລາຍງານຂອງກົມຕຳຫລວດ​ສະກັດ​ກັ້ນ ​ແລະ ຕ້ານ​ອັກຄີ​ໄພ ໃຫ້ຮູ້ວ່າ: ໃນໄລຍະສະເຫລີມສະຫລອງບຸນປີໃໝ່ລາວໄດ້ມີອັກຄີໄພເກີດຂຶ້ນຢູ່ຫລາຍທ້ອງຖິ່ນ, ອັນໄດ້ສ້າງຄວາມເສຍຫາຍໃຫ້ແກ່ຊັບສີນຂອງປະຊາຊົນເປັນຈໍານວນຫລວງຫລາຍຄື:

​ໃນ​ວັນ​ທີ 12 ​ເມສາ, ​ເວລາປະມານບ່າຍ​ໂມງໄດ້​ເກີດ​ໄຟ​ໄໝ້​ເຮືອນ​ປະຊາຊົນ 4 ຫລັງຢູ່​ບ້ານ​ໂນນ​ສົມບູນ, ​ເມືອງ​ບໍລິ​ຄັນ​ແຂວງ​ບໍລິ​ຄຳ​ໄຊ ຍ້ອນການ​ຈູດ​ສວນແລ້ວໄຟລາມມາໃສ່ເຮືອນ.

ຕໍ່​ມາ​ໃນ​ເວລາ 14:30 ​ໂມງຂອງມື້ດຽວກັນໄດ້​ເກີດໄຟ​ໄໝ້​ຕະຫລາດ​ຈີນຢູ່​ບ້ານ​ປ່າ​ອ້ອຍ, ​ເມືອງ​ຫ້ວຍ​ຊາຍ​ແຂວງ​ບໍ່​ແກ້ວ, ມີຮ້ານຂາຍສີນຄ້າ 13 ຫ້ອງ ​ແລະ ສາງ​ເຄື່ອງອີກ 6 ຫ້ອງໄດ້ຮັບຄວາມເສຍ​ຫາຍ, ຍ້ອນໄຟຟ້າລັດວົງຈອນ ແລະ ​ເວລາ​ປະມານທ່ຽງຄືນຂອງວັນທີ 13 ໄດ້ເກີດ​ໄຟ​ໄໝ້​ເຮືອນ​ປະຊາຊົນຫລັງໜຶ່ງຢູ່​ບ້ານ​ນາ​ຄວາຍ​ກາງ, ​ເມືອງ​ໄຊ​ເສດ​ຖານະຄອນຫລວງ​ວຽງ​ຈັນ, ຍ້ອນ​ຜູ້​ເຝົ້າ​ເຮືອນ​ເມົາ​ຢາ​ເສບ​ຕິດ​ແລ້ວ​ຈູດເຮືອນຫລັງດັ່ງກ່າວ.

ເວລາ​ປະມານ 9:00 ​ໂມງຂອງວັນທີ 14 ໄດ້​ເກີດ​ໄຟໄໝ້​ໂຮງງານ​ຜະລິດ​ເຊືອກຂອງ​ບໍລິສັດ ພີ​ອີ​ທີລາ​ວ ຈຳກັດ ຢູ່​ບ້ານ​ໄຜ່​ລ້ອມ, ​ເມືອງ​ໄຊ​ທານີນະຄອນຫລວງ​ວຽງ​ຈັນ, ຍ້ອນໄຟຟ້າລັດວົງຈອນ.

- lattana 1 -

ເວລາ 18:30 ໂມງຂອງ​ວັນ​ດຽວ​ກັນໄດ້ເກີດ​ໄຟ​ໄໝ້​ເຮືອນ​ປະຊາຊົນຢູ່​ບ້ານ​ພູ​ຄຳ, ​ເມືອງ​ຊະນະ​ສົມບູນ​ແຂວງ​ຈຳປາ​ສັກເສຍຫາຍ 22 ຫລັງ ​ແລະ ​ເລົ້​າ​ເຂົ້າ 2 ຫລັງ, ສ່ວນ​ສາ​ເຫດ​ຍັງ​ຢູ່​ໃນ​ຂັ້ນຕອນ​ຂອງ​ການ​ສືບສວນ-ສອບສວນຂອງເຈົ້າໜ້າທີ່.

ຖັດມາ​ໃນ​ວັນ​ທີ 15 ​​ເວລາ​ປະມານ 19:00 ​ໂມງໄດ້​ເກີດ​ໄຟ​ໄໝ້​ເຮືອນ​ປະຊາຊົນຫລັງໜຶ່ງຢູ່ບ້ານນ້ຳຫງຳເມືອງ​ແປກ​ແຂວງ​ຊຽງ​ຂວາງ ແລະ        ​ໃນ​ວັນ​ທີ 16 ​ເມສາ ​ເວລາ 8:30 ​ໂມງໄດ້ເກີດໄຟ​ໄໝ້​ເຮືອນ​ປະຊາຊົນຫລັງໜຶ່ງ ຢູ່​ບ້ານ​ຢາງ​ໂພ​ສີ, ນະຄອນ​ໄກສອນພົມວິຫານ​ແຂວງ​ສະຫວັນ​ນະ​ເຂດ ຍ້ອນໄຟຟ້າລັດວົງຈອນ ແລະ ​ໃນ​ວັນ​ດຽວ​ກັນ ກໍເກີດ​ໄຟ​ໄໝ້​ລົດໂດຍສານໜຶ່ງຄັນຢູ່​ບ້ານ​ຮ່ອງ​ຂະ​ຍອມ, ນະຄອນ​ປາກ​ເຊ ແຂວງ​ຈຳປາ​ສັກ, ແຕ່ໂຊກດີບໍ່ມີຜູ້ເສຍຊີວິດຈາກເຫດການດັ່ງກ່າວ.

  ​ເຈົ້າໜ້າທີ່ ໃຫ້ຮູ້ວ່າ: ປັດຈຸບັນ, ສະພາບອາກາດຮ້ອນອົບເອົ້າ, ຊຶ່ງຈະກໍໃຫ້ເກີດອັກຄີໄພໄດ້ງ່າຍ, ສະນັ້ນ ຈຶ່ງເຕືອນໃຫ້ສັງຄົມມີສະຕິໃນການຊົມໃຊ້ຟື້ນໄຟຫລາຍຂຶ້ນ ເຊັ່ນ: ເອົາໃຈໃສ່ກວດກາລະບົບໄຟຟ້າ ແລະ ອຸປະກອນເຄື່ອງ ໃຊ້ໄຟຟ້າຕ່າງໆ, ຖ້າເຫັນວ່າມີສະພາບເກົ່າແກ່ເປ່ເພຕ້ອງປ່ຽນໃໝ່, ການໄຕ້ທູບທຽນບູຊາຕ້ອງຮັບປະກັນ ແລະ ຫ້າມຈູດຂີ້ເຫຍື້ອຊະຊາຍຢ່າງເດັດຂາດ ແລະ ເມື່ອມີໄຟໃໝ້ຢູ່ໃສຕ້ອງຮີບຮ້ອນແຈ້ງເຈົ້າໜ້າທີ່ມອດໄຟໝາຍເລກໂທລະສັບ 1190 ໄດ້ຕະຫລອດ 24 ຊົ່ວໂມງ. 

error: Content is protected !!