ປັດ​ໄຈ​ເງື່ອນ​ໄຂ​ກ່ຽວ​ພັນ​ເຊື່ອມ​ໂຍງ​ເລື່ອງ​ອຸປະຕິ​ເຫດ

ປັດ​ໄຈ​ເງື່ອນ​ໄຂ​ກ່ຽວ​ພັນ​ເຊື່ອມ​ໂຍງ​ເລື່ອງ​ອຸປະຕິ​ເຫດ - advert banner 728 90 728x90 - ປັດ​ໄຈ​ເງື່ອນ​ໄຂ​ກ່ຽວ​ພັນ​ເຊື່ອມ​ໂຍງ​ເລື່ອງ​ອຸປະຕິ​ເຫດ

ໂດຍ: ທິດກ່ຳ

ປັດ​ໄຈ​ເງື່ອນ​ໄຂ​ກ່ຽວ​ພັນ​ເຊື່ອມ​ໂຍງ​ເລື່ອງ​ອຸປະຕິ​ເຫດ - new3 - ປັດ​ໄຈ​ເງື່ອນ​ໄຂ​ກ່ຽວ​ພັນ​ເຊື່ອມ​ໂຍງ​ເລື່ອງ​ອຸປະຕິ​ເຫດ

​  ເທົ່າ​ທີ່​ທິດ​ກ່ຳ​ໄດ້​ຕິດຕາມ​ແຫ​ລ່ງຂ່າວ​ຄາວ​ເຫັນ​ວ່າ: ​ນັບ​ແຕ່​ປີ 2019 ​ເປັນຕົ້ນມາ​ແມ່ນມີ​ອຸປະຕິ​ເຫດ​ບົນທ້ອງ​ຖະໜົນ​ເກີດຂຶ້ນຢ່າງ​ຫລວງຫລາຍ​ພາຍ​ມາກ ​ແລະ ໜ້າ​ເປັນ​ຫວ່ງ. ອຸປະຕິ​ເຫດທີ່​ເກີດ​ຂຶ້ນນີ້​ເກືອບ​ເວົ້າ​ໄດ້​ວ່າ​ມີ​ສາລະພັດ​ຢ່າງ​ເປັນຕົ້ນລົດຈັກ​ຕຳ​ລົດຈັກ, ລົດຈັກ​ຕຳ​ລົດ​ໃຫຍ່, ລົດ​ໃຫຍ່​ຕຳ​ລົດ​ໃຫຍ່, ລົດ​ຕູ້​ຕຳ​ລົດ​ຕູ້, ລົດ​ກະບະ​ຕຳ​ລົດຈັກ​ແລ້ວ​ປົບ​ໜີ, ​ລົດ​ໂດຍສານ​ແລ່ນ​ໄປ​ດີໆ​ກໍ່​ເກີດ​ເຫດ​ໄຟ​ໄໝ້​ໄຫງ່ກຸ້ມ. ນອກຈາກ​ນັ້ນ, ກໍເກີດ​ເຫດ​ລົດ​ຕົກ​ພູ​ຕົກ​ຜາ, ຕົກ​ຂົວ, ຕົກ​ຮ່ອງ​ຕົກ​ຫ້ວຍ​ສາລະພັດ​ຢ່າງ​ທີ່​ເກີດ​ມາ​ໃນ​ປະ​ເທດ​ຊາດ​ບ້ານ​ເມືອງ​ຂອງ​ພວກ​ເຮົາ​ທີ່​ພວມ​ກ້າວ​ເຂົ້າສູ່ຄວາມ​ຈະ​ເລີ​ນຮຸ່ງເຮືອງ ​ແລະ ພັດທະນາ.

ປັດ​ໄຈ​ເງື່ອນ​ໄຂ​ກ່ຽວ​ພັນ​ເຊື່ອມ​ໂຍງ​ເລື່ອງ​ອຸປະຕິ​ເຫດ - 79 - ປັດ​ໄຈ​ເງື່ອນ​ໄຂ​ກ່ຽວ​ພັນ​ເຊື່ອມ​ໂຍງ​ເລື່ອງ​ອຸປະຕິ​ເຫດ

  ຕາມ​ທິດ​ກ່ຳ​ຄິດ, ອັນ​ສາ​ເຫດ​ຂອງ​ມັນ​ກໍ​ແມ່ນ​​ເກີດ​ມາ​ຈາກ​ສາມ​ປັດ​ໄຈ​ໃຫຍ່ໆ ​ແລະ ສອງ​ເງື່ອນ​ໄຂ​ທີ່​ກ່ຽວ​ພັນ​ເຊື່ອມ​ໂຍງ​ກົມກຽວ, ​ເຊິ່ງພວກ​ເຮົາ​ຈະ​ຕ້ອງ​ໄດ້​ພ້ອມ​ກັນ​ຄິດ ​ແລະ ພ້ອມ​ກັນ​ແກ້​ ເປັນຕົ້ນ: ອັນ​ທີ​ໜຶ່ງ​ແມ່ນ​ປັດ​ໄຈ​ເລື່ອງ​ເສັ້ນທາງ​ຢູ່​ບ້ານ​ເຮົາ​ຍັງ​ບໍ່​ໄດ້​ມາດຕະຖານ​ເທົ່າ​ທີ່​ຄວນ ​ເຊັ່ນວ່າທາງ​ແຄບ, ທາງ​ເປັນ​ບວກ​ຂຸມ, ທາງ​ຂົດ​ໂງ, ທາງ​ຂຶ້ນພູ​ລົງ​ຫ້ວຍ, ທາງ​ຄ້ອຍ​ທາງ​ເນີນ, ​ເສັ້ນທາງ​ບາງ​ເສັ້ນພໍ​ຍາມ​ຝົນ​ມາ​ມີນ້ຳອັ່ງ​ຂັງ, ​ເປັນ​ບວກຕົມ ​ແລະ ຕົກ​ຍາມ​ແລ້ງ​ມາ​ມີ​ຂີ້ຝຸ່ນ​ໄຫງ່ກຸ້ມ ​ແລະ ອື່ນໆ. ປັດ​ໄຈ​ອັນ​ທີ​ສອງ ລົດ​ລາງ​ພາຫະນະ​ນັບ​ມື້​ເພີ່ມ​ຂຶ້ນ, ພາ

ຫະນະ​ຫລາຍ​ປະ​ເພດ​ເປັນ​ລົດ​ມືສອງ​ບໍ່​ໄດ້​ມາດຖານ, ມີ​ອາຍຸ​ການ​ຫລາຍ​ປີ, ສະພາບ​​ດ້ານ​ເຕັກນິກ​ບໍ່​ຮັບປະກັນ ​ຂັບຂີ່​ໄປ​ດີໆກໍ​ມັກ​ເກີດ​ມີ​ບັນຫາ​ຂັດຂ້ອງ​ຕາມ​ມາ.

ສ່ວນ​ປັດ​ໄຈ​ອັນ​ທີ​ສາມ ​ກໍ​ແມ່ນ​ເກີດ​ມາ​ຈາກ​ຜູ້​ຂັບ​ຂີ່​ເອງ​ທີ່​ບໍ່​ມີ​ຄວາມ​ພ້ອມ​ທາງ​ດ້ານ​ສຸຂະພາບ, ພາລະ​ກຳລັງ ທັງ​ລະ​ເມີດ​ກົດໝາຍ, ກົດ​ຈາລະ​ຈອນ​ຂັບ​ຂີ່​ໄວ, ຂັບ​ເກີນ​ກຳນົດ, ດື່ມເຫລົ້າ​ເມົາ​ແລ້ວ​ຂັບ​ລົດ ​ແລະ ຈາກ​ສະພາບ​ແວດ​ລ້ອມ​ອື່ນໆ ທີ່​ຍັງ​ບໍ່​ເອື້ອອຳນວຍ.

​  ໃນ​ສາມ​ປັດ​ໄຈທີ່​ກ່າວ​ມາ​ນີ້ ​ເປັນສາ​ເຫດ​ອັນຕົ້ນຕໍ​ທີ່​ພາ​ໃຫ້​ເກີດ​ອຸປະຕິ​ເຫດ​ຢູ່​ບ້ານ​ເຮົາ​ຢ່າງ​ແຜ່​ລາມ ​ແລະ ​ເປັນຕາ​ຢ້ານ​ອີ່ຫລີ, ດັ່ງ​ສະຖິຕິ​ໃນ​ສາມ​ເດືອນ​ຕົ້ນປີ​ພາກສ່ວນ​ກ່ຽວຂ້ອງ​ໄດ້ສະຫລຸບ​ວ່າ​ມີ​ຄົນ​ຕາຍ​ຍ້ອນ​ອຸປະຕິ​ເຫດ​ຈຳນວນ 300 ກວ່າ​ຄົນ​ແລ້ວ. ສ່ວນວ່າ​ບັນດາ​ເງື່ອນ​ໄຂ​ທີ່​ກ່ຽວ​ພັນ​ເຊື່ອມ​ໂຍງ​ເຖິງ​ພາກສ່ວນ​ທີ່​ກ່ຽວຂ້ອງ​ທີ່​ຕ້ອງ​ໄດ້​ແກ້ນັ້ນ ມັນ​ກໍ​ແມ່ນ​ໜ້າ​ທີ່​ຂອງ​ສອງ​ຂະ​ແໜງ​ການ​ຕົ້ນຕໍ​ຄື: ກະຊວງ​ໂຍທາທິການ ແລະ ຂົນ​ສົ່ງ ​ກັບ ​ກະຊວງ​ປ້ອງ​ກັນ​ຄວາມ​ສະຫງົບ ​ຍົກ​ຕົວຢ່າງ​ກະຊວງໂຍທາທິການ ແລະ ຂົນສົ່ງ ​ກໍ​ຕ້ອງ​ເວົ້າ​ເລື່ອງ​ເສັ້ນທາງ, ​ເວົ້າ​ເລື່ອງ​ພາຫະນະ, ​ເວົ້າ​ເລື່ອງ​ມາດຕະຖານ​ບຸກຄະລາ​ກອນ, ອອກ​ກົດໝາຍ ​ແລະ ນິຕິ​ກຳ​ຕ່າງໆ ທີ່​ກ່ຽວຂ້ອງ​ກັບ​ຂະ​ແໜງ​ການ​ຕົນ​ໃຫ້​ຮັດກຸມ ​ແລະ ​ເດັດຂາດ​ທັນ​ຍຸກ​ທັນ​ສະ​ໄໝ, ກະຊວງ​ປ້ອງ​ກັນ​ຄວາມ​ສະຫງົບ​ ກໍ​ຕ້ອງ​ຄຸມ​ໃນ​ເລື່ອງ​ການທ່ອງທ່ຽວ​ໄປມາ​​ໃຫ້​ໄປ​ຕາມກົດ​ ບໍ່​ໃຫ້​ຜູ້​ໃຊ້​ລົດ​ໃຊ້​ຖະໜົນ​ພາກັນ​ລະ​ເມີດ​ກົດ​ຈາລະ​ຈອນ, ຜູ້​ໃດ​ຝ່າຝືນ​ຕ້ອງ​ໃຊ້​ມາດຕະການ​ຕາມ​ກົດ​ໝາຍ​ໃຫ້​ເດັດຂາດ ​ແລະ ​ເປັນ​ທຳ.

ປັດ​ໄຈ​ເງື່ອນ​ໄຂ​ກ່ຽວ​ພັນ​ເຊື່ອມ​ໂຍງ​ເລື່ອງ​ອຸປະຕິ​ເຫດ - lattana 1 - ປັດ​ໄຈ​ເງື່ອນ​ໄຂ​ກ່ຽວ​ພັນ​ເຊື່ອມ​ໂຍງ​ເລື່ອງ​ອຸປະຕິ​ເຫດ

​   ໃນ​ປັດຈຸບັນ, ບ້ານ​ເມືອງ​ຂອງ​ພວກ​ເຮົາ​ພວມ​ໜີ​ຫ່າງ​ຈາກ​ຄວາມທຸ​ກຍາກ ​ແລະ ດ້ອຍພັດທະນາ, ​ໄປ​ຄຽງ​ຄູ່​ກັບ​ສິ່ງ​ກ້າວໜ້າ ​ແລະ ຍອດ​ຍິ່ງ​ດີງາມ​ແລ້ວ ຍ່ອມ​ມີ​ປາກົດການ​ຫຍໍ້​ທໍ້ຕາມ​ມາ​ເໝືອນ​ຄົນ​ກັບ​ເງົາ.

​   ແຕ່​​ແນວ​ໃດ​ກໍ​ຕາມ ​ພວກ​ເຮົາ​ກໍ​ຕ້ອງ​ພ້ອມ​ກັນ​ພະຍາຍາມ​ເຮັດ​ໃຫ້​ສັງຄົມ​ບ້ານ​ເມືອງມີ​ຄວາມ​ສະຫງົບ​ປອດ​ໄພ ​ແລະ ຮົ່ມ​ເຢັນ​ນັ້ນຫລາຍ​ທີ່​ສຸດ ​ແລະ ​ໃຫ້​ແທດເໝາະ​ກັບ​ການ​ຂະຫຍາ​ຍຕົວ​ຂອງ​ສັງຄົມ ​ແລະ ກັບ​ຄົນ. ຢາກ​ເຮັດ​ໄດ້​ຕາມ​ຄວາມ​ມຸ່ງ​ມາດ​ປາ​ຖະໜາ​ ພວກ​ເຮົາ​ກໍ​ຕ້ອງ​ເຂັ້ມ​ງວດ​ໃນ​ເລື່ອງ​ຄຸ້ມ​ຄອງລັດ, ຄຸ້ມ​ຄອງ​ສັງຄົມ ບໍ່​ຄວນ​ເຫັນ​ແຕ່​ເງິນ​ແສນ​ໄຖ່​ແຕ່​ບໍ່​ເຫັນ​ໄພ່​ແສນ​ເມືອງ, ຖ້າ​ບໍ່​ດັ່ງນັ້ນ, ບ້ານ​ເມືອງ​ຈະ​ເກີດ​ຄວາມ​ວຸ້ນວາຍ, ​ເກີດ​ໂຣຄາ​ພະຍາດ​, ເກີດ​ໂຣກລະບາດ​ຕາມ​ມາ​ຕໍ່​ດວງ​ຊາຕາຂອງ​ປະ​ເທດ.

  ສະພາບ​ບ້ານ​ເມືອງ​ເຮົາ​ປັດຈຸບັນ​ມັນ​ເກີດ​ປາກົດການ​ຫຍໍ້​ທໍ້​ຫລາຍ​ຢ່າງ​ທີ່​ພວມ​ຂວາງ​ໜ້າ, ນອກຈາກ​ມີ​ຄົນ​ເຈັບ​ຄົນ​ຕາຍ​ຍ້ອນ​ອຸປະຕິ​ເຫດ​ແລ້ວ, ຍັງ​ຕາຍ​ຍ້ອນ​ຢາ​ເສບ​ຕິດ, ຕາຍ​ຍ້ອນ​ໂຣຄາ​ພະຍາດ​ອື່ນໆສາລະພັດ​ຢ່າງ. ການ​ແກ້ງ​ແຍ່ງ​ແຂ່ງ

ຂັນ​ກັນຫາ​ຜົນ​ປະ​ໂຫຍ​ດຂອງ​ຄົນ​ໃນ​ສັງຄົມ​ກໍ​ເກີດ​ປາກົດການ​ແຜ່​ລາມ, ​ເຊິ່ງພວກ​​ເຮົາ​ຕ້ອງ​ຫາ​ວິທີ​ຈຳກັດ​ແຕ່​ຫົວທີ, ຖ້າ​ບໍ່​ດັ່ງນັ້ນບັນດາ​ປາກົດການ​ຫຍໍ້​ທໍ້ ຕ່າງໆທີ່​ເກີດ​ຂຶ້ນຢູ່ບ້ານ​ເຮົາ ​ມັນ​ຈະ​ບໍ່​ມີ​ມື້ສິ້ນສຸດ ​ແລະ ມັນ​ຈະລາ​ມພະ​ລາມ​ຈົວ​ໄປ​ໜ້າຕິກໆ, ຖ້າ​ພວກ​ເຮົາ​ຫາກ​ມິດ​ງຽບ​ຖື​ເບົາ​ເມີນ​ເສີຍ ​ແລະ ມັກ​ຖິ້ມ​ໂທດ​ປັດ​ປ່າຍ​ເອົາ​ຕົວລອດ​ເປັນ​ຍອດ​ດີ​ຄື​ດັ່ງ​ທຸກ​ວັນ​ນີ້.

ປັດ​ໄຈ​ເງື່ອນ​ໄຂ​ກ່ຽວ​ພັນ​ເຊື່ອມ​ໂຍງ​ເລື່ອງ​ອຸປະຕິ​ເຫດ - 567417 - ປັດ​ໄຈ​ເງື່ອນ​ໄຂ​ກ່ຽວ​ພັນ​ເຊື່ອມ​ໂຍງ​ເລື່ອງ​ອຸປະຕິ​ເຫດ

error: Content is protected !!