ເກົ້າອົດເກົ້າເຍື້ອນ ຫາກຈະໄດ້ທ່ອນຄຳ

- advert banner 728 90 728x90 - ເກົ້າອົດເກົ້າເຍື້ອນ ຫາກຈະໄດ້ທ່ອນຄຳ

ໂດຍ: ທິດກ່ຳ

- new3 - ເກົ້າອົດເກົ້າເຍື້ອນ ຫາກຈະໄດ້ທ່ອນຄຳ

ໃນຫົວຂໍ້ຂອງຄໍລຳທີ່  ທິດກ່ຳກ່າວມານີ້, ໄດ້ພົວພັນ ເຖິງພາລະກິດຂອງກຳມະບານລາວ ຍ້ອນວ່າໃນວັນທີ 1 ເດືອນພຶດສະພານີ້, ແມ່ນພວກເຮົາຈະໄດ້ພ້ອມກັນລະນຶກ ແລະ ສະເຫລີມສະຫລອງວັນກຳມະກອນສາກົນຄົບຮອບ 133 ປີ, ແນ່ນອນຖ້າເວົ້າເຖິງພາລະກິດຂອງກຳ ມະບານກໍຕ້ອງໄດ້ເວົ້າ ເຖິງພາລະໜ້າທີ່ກຳມະກອນທີ່ມີພັນທະຕໍ່ສັງຄົມ ແລະ ຕໍ່ຊາດບ້ານເມືອງ.

ໃນອາດີດຜ່ານມາ, ຕອນທິດກ່ຳ ຍັງໜຸ່ມແໜ້ນເຄີຍໄດ້ ເປັນເລຂາຊາວໜຸ່ມຮາກຖານ, ເລຂາຮາກຖານກຳມະບານ ໃນສຳນັກງານທີ່ຕົນສັງກັດ, ເຄີຍໄດ້ຕິດພັນກັບອົງການຈັດຕັ້ງມະຫາຊົນອັນເປັນອົງການຈັດຕັ້ງທີ່ພັກຊີ້ນຳ  ແລະ ນຳພາໂດຍກົງ.

ຄວາມຫວັງທີ່ຕັ້ງໃຈ ແລະ ຄວາມອີ່ມເອີບກັບໜ້າທີ່ພັກ ແລະ ການຈັດຕັ້ງໄດ້ມອບໝາຍໃຫ້ນັ້ນສຸດທີ່ມີກຽດ  ແລະ ໄດ້ຮັບໃຊ້ຊາດ, ຮັບໃຊ້ການປະຕິວັດຈົນມາ ເຖິງວັນ ນີ້ພາບແຫ່ງຄວາມຫລັງຍັງສະຖິດຢູ່ໃນດວງໃຈຢ່າງບໍ່ມີວັນລືມ.

ກ່າວເຖິງພາລະກຳປະຫວັດສາດຂອງກຳມະບານລາວແລ້ວ, ໃນສະໄໝການຕໍ່ສູ້ປົດປ່ອຍຊາດກໍຄືໄລຍະປົກປັກຮັກສາ ແລະ ສ້າງສາປະເທດຊາດກຳມະກອນລາວໄດ້ປະກອບສ່ວນທຸກ ສິ່ງທຸກຢ່າງໃຫ້ແກ່ການປະຕິວັດ, ໃຫ້ພາລະກິດປົກປັກຮັກສາ ແລະ ພັດທະນາປະເທດຊາດ.

ຖ້າຈະເວົ້າໃຫ້ແຈ້ງແລ້ວປະເທດຊາດບ້ານເມືອງເຮົາມີຄວາມຈະເລີນຮຸ່ງເຮືອງມາຮອດທຸກວັນນີ້ກໍແມ່ນຊາວກຳມະກອນລາວເຮົາເປັນຜູ້ສ້າງສາພັດທະນາມັນຂຶ້ນມາຈຶ່ງມີຄວາມຈະເລີນໝັ້ນຄົງ ແລະ ຂະຫຍາຍຕົວມາເຖິງທຸກວັນນີ້.

ກໍດັ່ງພວກເຮົາຮັບຮູ້ນຳກັນແລ້ວວ່າ, ໃນອາດີດຕະການປະເທດຊາດຂອງພວກ ເຮົາຕົກທຸກໄດ້ຍາກເຄີຍເປັນ ເມືອງຂຶ້ນຂອງສັກດີນາຕ່າງຊາດຕໍ່ໃສ່ຈັກກະພັດຜູ້ຮຸກຮານຕັ້ງຫລາຍຮ້ອຍປີ.

ຈາກສະພາບທີ່ວ່ານີ້ ກໍເຮັດໃຫ້ເສດຖະກິດ-ສັງຄົມ ທົດຖອຍຍ້ອນຖືກສັກດີນາ ແລະ ຈັກກະພັດກິດກັ້ນຄວບຄຸມ. ໄປຄຽວຄູ່ກັນນັ້ນ, ພວກເຂົາຍັງກອບໂກຍເອົາຊັບໃນດິນສິນໃນນ້ຳຈາກປະເທດເຮົາໄປຄູນຮັ່ງຄູນມີຢູ່ປະເທດພວກເຂົາຢ່າງມະຫາສານປະເທດເຮົາຕ້ອງເສຍຜົນປະ ໂຫຍດຢ່າງໃຫຍ່ຫລວງຕໍ່ ຊາຕາກຳຂອງການເປັນຫົວ ເມືອງຂຶ້ນ.

ພາຍຫລັງປະເທດຊາດໄດ້ຮັບການປົດປ່ອຍໃນປີ 1975 ພັກ ແລະ ລັດຖະບານ ເຮົາໄດ້ຟື້ນຟູເສດຖະກິດ- ສັງຄົມຈົນມາຮອດທຸກວັນ ນີ້ຈຶ່ງຄ່ອຍໆເຕີບໃຫຍ່ ແລະ ໝັ້ນຄົງຂຶ້ນໃນທຸກດ້ານ 40 ກວ່າປີທີ່ພັກ ແລະ ລັດຖະ ບານເຮົາໄດ້ນຳພາສ້າງສາ ປະເທດຊາດອົງການຈັດຕັ້ງກຳມະບານກໍໄດ້ເຕີບໃຫຍ່ ແລະ ຂະຫຍາຍຕົວມາເປັນ ກ້າວໆ.

- lattana 1 - ເກົ້າອົດເກົ້າເຍື້ອນ ຫາກຈະໄດ້ທ່ອນຄຳ

ໃນປັດຈຸບັນ, ບໍ່ວ່າຢູ່ຕາມສຳນັກງານອົງການ, ໂຮງຈັກໂຮງງານ, ພື້ນຖານການຜະລິດ ທີ່ຢູ່ຕົວເມືອງ ແລະ ຊົນນະບົດອົງການຈັດຕັ້ງກຳມະບານລາວ ແລະ ກຳມະກອນລາວກາຍເປັນກຳລັງ ແລະ ໄດ້ປະກອບສ່ວນໃນໜ້າທີ່ພັດທະນາ ແລະ ສ້າງສາປະເທດຊາດ.

ໃນເງື່ອນໄຂທີ່ປະເທດ ຊາດຍັງປະສົບຄວາມຫຍຸ້ງ ຍາກ ແລະ ດ້ອຍພັດທະນາກຳ ມະກອນລາວຍັງມີລາຍຮັບ ຕ່ຳເມື່ອທຽບໃສ່ປະເທດທີ່ ເຂົາພັດທະນາກວ່າໃນໂລກ ຊຸມປີ 2.000 ເປັນຕົ້ນມາຫາ ປີ 2017 ກຳມະກອນລາວ ມີແຮງງານຂັ້ນຕ່ຳພຽງ 900.000 ກີບ.

ນັບແຕ່ໃນປີ 2018 ເປັນຕົ້ນມາໄດ້ຍົກຂຶ້ນເປັນ 1.100.000 ກີບເວົ້າສະ ເພາະ ແຕ່ກຳມະກອນທີ່ ອອກ ແຮງງານດ້ວຍຕີນມືໂດຍ ເອົາແຮງສູ່ເພື່ອລ້ຽງຊີບ, ລ້ຽງຄອບຄົວ, ລ້ຽງລູກລ້ຽງ ເຕົ້າ, ເຮືອນເຊົ່າ, ເຂົ້າຊື້, ນ້ຳມັນລົດທຽວການ, ຄ່າຮ່ຳຄ່າຮຽນໃຫ້ລູກ, ເຈັບເປັນເອັນອຸ່ນ, ຄ່ານ້ຳຄ່າໄຟໄປທາງໃດກໍມີແຕ່ຈົກຖົງ, ຍັງບໍ່ທັນໄດ້ເວົ້າເຖິງຊື້ກິນໃສ່ ປາກໃສ່ທ້ອງປະຈຳວັນບັນຫາກິນເພື່ອຢູ່ ແລະ ຢູ່ເພື່ອກິນ.

            ເມື່ອຕັ້ງໂຈດກັນວ່າເປັນຫຍັງ ຈຶ່ງເປັນແນວນັ້ນ? ຄຳຕອບກໍຄືຍ້ອນເສດຖະກິດມະຫາພາກຍັງບໍ່ທັນເຂັ້ມແຂງ. ອັດຕາສະເລ່ຍຍອດຜະລິດຕະພັນຕໍ່ຫົວຄົນມີພຽງ 2.000 ກວ່າໂດລາຕໍ່ປີ.

ນອກຈາກນັ້ນ, ມັນຍັງມີເງື່ອນໄຂອື່ນໆ ມາກະທົບເຊັ່ນ: ບັນຫາການຜະລິດສິນຄ້າຂອງປະເທດບໍ່ທັນກວ້າງຂວາງ, ໜັກແໜ້ນ ແລະ ແຂງແຮງ, ການຂະຫຍາຍຕົວຂອງເສດຖະກິດຕະຫລາດໄປໄວແຕ່ການຄຸ້ມຄອງບໍ່ທັນເກັ່ງລາຍຮັບຂອງຊາດສ່ວນໜຶ່ງໄດ້ຫລັ່ງໄຫລໄປເຂົ້າຖົງຂອງບຸກຄົນຜູ້ມີຖານະ, ມີອຳນາດ, ຕຳແໜ່ງໜ້າທີ່, ໄປເຂົ້າຖົງນັກທຸລະກິດທີ່ສວຍໂອກາດມືຍາວສາວໄດ້ສາວເອົາ, ປາໃຫຍ່ກິນປານ້ອຍ, ປານ້ອຍກິນປາຊິວເລີຍໄປກະທົບເຖິງກຳມະກອນຜູ້ມີລາຍຮັບຕ່ຳ, ຜູ້ຫາເຊົ້າກິນຄ່ຳ.

ຈາກນັ້ນ, ປາກົດການທີ່ເກີດຂຶ້ນໃນສັງຄົມກໍຄືມີຂີ້ລັກມັກສົກ, ເກີດການປຸ້ນຈີ້, ເກີດການຄ້າຂາຍຜິດກົດໝາຍ, ເກີດການສໍ້ລາດບັງຫລວງ, ເກີດມີແມ່ຈ້າງນາງເລງກາງຄືນເປັນຕາເຫງັນກາງເວັນເປັນຕານົກເຄົ້າ ແລະ ປາກົດການຫຍໍ້ທໍ້ອື່ນໆ ທີ່ຫລີກບໍ່ມົ້ມ.

            ແນວໃດກໍຕາມ, ພວກເຮົາກໍຍັງມີຄວາມຫວັງເມື່ອໃດເສດຖະກິດຂອງຊາດເຂັ້ມແຂງແຮງງານຂັ້ນຕ່ຳຂອງກຳມະກອນລາວກໍຈະໄດ້ເພີ່ມຂຶ້ນ ແລະ ເວລານັ້ນລະກຳມະກອນລາວກໍຈະບໍ່ພາກັນຫລັ່ງໄຫລໄປອອກແຮງງານຢູ່ປະເທດເພື່ອນບ້ານເຮົາຍັງຄິດອີກວ່າບໍ່ນານເກີນລໍແຮງງານເຮົາກໍຈະໄດ້ເພີ່ມຈາກ 1.100.000 ກີບຂຶ້ນໄປເລື້ອຍໆ, ຂໍໃຫ້ກຳມະກອນລາວທຸກຄົນຄ່ອຍອົດທົນດັ່ງສຸພາສິດເພິ່ນວ່າເກົ້າອົດເກົ້າເຍື້ອນຫາກຈະໄດ້ທ້ອນຄຳ./.

- 3967 - ເກົ້າອົດເກົ້າເຍື້ອນ ຫາກຈະໄດ້ທ່ອນຄຳ
(ພາບປະກອບ)

error: Content is protected !!