ຍົກມາດຖານ ລົດໂດຍສານລາວ
ໂດຍ: ມຶກບໍ່ແຫ້ງ
ເຖິງວ່າໃນປັດຈຸບັນ ອັດຕາສ່ວນມີລົດສ່ວນຕົວຈະເພີ່ມຂຶ້ນ ແຕ່ລົດໂດຍສານທາລະນະ ຍັງມີຄວາມຈຳເປັນຢ່າງຍິງ ໃນການໄປຫາສູ່ກັນ ແຕ່ມາດຕະຖານປັດຈຸບັນ ພວກເຮົາຈະປັບປຸງແນວໃດ?
ການເກີດອຸປະຕິເຫດລົດເມຕົກຂົວ ໃນວັນທີ 20 ເມສາ 2019 ທີ່ຜ່ານມາ ເຂດງູນ້ອຍ-ງູໃຫຍ່ ເມືອງປາກກະດິງ ແຂວງບໍລິໄຊ ເຊິ່ງພາໃຫ້ເກີດມີຜູ້ບາດເຈັບຈຳນວນຫລາຍ ແລະເສຍຊີວິດຮອດ 6 ຄົນ ເຊິ່ງເຮັດໃຫ້ພວກເຮົາຕົກໃຈກັບການເກີດເຫດທີ່ຮ້າຍແຮງນີ້ ແລະ ພາຍລຸນມາ ຜ່ານການສອບສວນຂອງເຈົ້າໜ້າທີ່ ຈຶ່ງຮູ້ວ່າອຸປະຕິເຫດດັ່ງກ່າວ ແມ່ນ ເກີດຈາກການລັບໃນ ຂອງໂຊເຟີ ນັ້ນເອງ, ເປັນເລື່ອງທີ່ໜ້າເສົ້າ ທີ່ປະຊາຊົນຈຳນວນຫລາຍໄດ້ສູນເສຍຊີວິດ ແລະບາດເຈັບຈາກສາເຫດທີ່ສາມາດປ້ອງກັນໄດ້ຄືດັ່ງກ່າວ.
ໃນໄລຍະຜ່ານມາ ການເກີດອຸປະຕິເຫດຂອງລົດເມສາຍໃຕ້ ກໍມັກເກີດຂຶ້ນເລື້ອຍໆ ສະເລ່ຍແລ້ວ ປີໜຶ່ງກໍບໍ່ຫລຸດ ສອງ-ສາມ ຄັ້ງ ເຊິ່ງເຮັດໃຫ້ ປະຊາຊົນເຮົາ ຜູ້ນຳໃຊ້ລົດເມໂດຍສານ ມີຄວາມຫວາດຫວັ່ນ ແລະມີຄວາມສ່ຽງ.
ເຊື່ອວ່າຫລາຍຄົນຄົງໄດ້ໃຊ້ການບໍລິການ ລົດເມໂດຍສານຢູ່ບ້ານເຮົາບໍ່ຫລາຍກໍໜ້ອຍ, ການເກີດອຸປະຕິເຫດ ຫລາຍເທື່ອທີ່ຜ່ານມາ ກໍອາດມີຫລາຍສາເຫດ, ຄວາມຜິດພາດຂອງໂຊເຟີ, ເຕັກນິກລົດບໍ່ຮັບປະກັນ, ສະພາບເສັ້ນທາງ, ຂາດລະບຽບ ການຄຸ້ມຄອງ ທີ່ຮັດກຸມເປັນຕົ້ນ.
ພວກເຮົາຮັບຮູ້ວ່າ ມາດຖານ ຄຸນສົມບັດ ແລະຄວາມພ້ອມຂອງໂຊເຟີລົດເມ ຈຳນວນຫລາຍນັ້ນ ຍັງບໍ່ໄດ້ຮັບການພິຈາລະນາ ຢ່າງຈິງຈັງ, ເປັນດຳມະດາ ທີ່ພວກເຮົາຈະເຫັນ ໂຊເຟີລົດເມ ບ້ານເຮົາ ລົມໂທລະສັບ ໃນເວລາຂັບຂີ່, ເລັ່ງໄວ ຕາມໃຈ ເພື່ອຍາດແຍ່ງລູກຄ້າກັນ, ບາງກໍລະນີ ທີ່ຮ້າຍແຮງໄປກວ່ານັ້ນ ຍັງດຶ່ມສິ່ງມຶນເມົາກໍມີ, ສະພາບຮ່າງກາຍບໍ່ພ້ອມ (ອິດເມື່ອຍ, ນອນບໍ່ພຽງພໍ ແລະອື່ນໆ) ກໍເຮັດໃຫ້ມີຄວາມສ່ຽງສູງໃນການເກີດອຸປະຕິເຫດ.
ພ້ອມນັ້ນ, ໂດຍສ່ວນໃຫຍ່ແລ້ວ ລົດເມໂດຍສານຂະໜາດກາງ ຫາ ໃຫຍ່ຢູ່ບ້ານເຮົາ ຍັງເປັນລົດມືສອງນຳເຂົ້າ ທີ່ນຳໃຊ້ງານໜັກ ແຕ່ອາດຂາດການກວດກາເຕັກນິກຢ່າງລະອຽດ ກໍເປັນສາເຫດໜຶ່ງທີ່ບໍ່ຄວນເບິ່ງຂ້າມ. ດັ່ງທີ່ຮູ້ ສະພາບເສັ້ນທາງ ຍັງບໍ່ຮັບປະກັນ 100% ເພາະບາງບ່ອນ ມີບວກຂຸມ ໂດຍສະເພາະ ຍາມຝົນ ເມື່ອແລ່ນຍາມກາງຄືນ ບວກໃສ່ ຄວາມປະມາດຂອງໂຊເຟີແລ້ວ ຍິ່ງເພີ່ມຄວາມສ່ຽງເຂົ້າໄປອີກ.
ການບັນທຸກ ຜູ້ໂດຍສານ ແລະເຄື່ອງຂອງ ທີ່ເກີນມາດຖານຄວາມປອດໄພນັ້ນ ຍັງມີໃຫ້ເຫັນທົ່ວໄປ ຕົວຢ່າງ ເມື່ອຊ່ວງ ກ່ອນ ແລະ ຫຼັງ ການສະເຫລີມສະຫລອງປີໃໝ່ລາວ ທີ່ຜ່ານມາ, ປະຊາຊົນຈົ່ມວ່າ ຢ່າງອຶກກະທຶກ ເພາະລົດເມຫລາຍຄັນ ຈາກ 45 ບ່ອນນັ່ງ ເປັນ 60-70 ບ່ອນນັ່ງກໍມີ, ເຕັມເທົ່າໃດ ກໍບໍ່ພໍ ແລະ ໜ່ວຍງານທີ່ຮັບຜິດຊອບ ກໍມີແຕ່ເວົ້າເລື່ອງການ ຄວບຄຸມລາຄາ ໂດຍສານ ແຕ່ບໍ່ໄດ້ເຄັ່ງຄັດເລື່ອງຄວາມປອດໄພ ເຊັ່ນ ການບັນທຸກຫລາຍເກີນໄປ ແລະອື່ນໆຊ້ຳ.
ຈາກບັນດາ ບັນຫາທີ່ກ່າວມານັ້ນ ມັນເຖິງເວລາແລ້ວ ທີ່ພວກເຮົາຕ້ອງ ຍົກສູງມາດຖານ ການບໍລິການ ການຂົນສົ່ງສາທາລະນະໃນ ສປປລາວ, ບໍ່ສະເພາະແຕ່ການໂດຍສານຂອງລົດເມ ສາຍໃຕ້ ຫຼື ເໜືອ ແຕ່ຮວມທັງການໂດຍສະສານ ສາທາລະນະແບບອື່ນນຳ ເພື່ອເພີ່ມຄວາມປດກໄພ ໃຫ້ປະຊາຊົນ ສາມາດໄວ້ວາງໃຈ. ຖ້າປ່ອຍປະໃຫ້ເປັນໄປຕາມສະພາບດັ່ງປັດຈຸບັນ ພວກເຮົາກໍບໍ່ອາດແປກໃຈ ຖ້າຫາກມີອຸປະຕິເຫດ ຂອງລົດໂດຍສານ ທີ່ມີຄົນເຈັບ ຫຼື ຕາຍອີກ.
