ອີຣານບໍ່ສົນຄຳຂູ່ຂອງອາເມລິກາ ຢືນຢັນຜະລິດ ແລະ ສົ່ງອອກນ້ຳມັນຕໍ່ໄປ

- advert banner 728 90 728x90 - ອີຣານບໍ່ສົນຄຳຂູ່ຂອງອາເມລິກາ ຢືນຢັນຜະລິດ ແລະ ສົ່ງອອກນ້ຳມັນຕໍ່ໄປ

      ລັດຖະບານ​ອີຣານຢືນຢັນ​ການ​ຜະລິດ ​ແລະ ສົ່ງ​ອອກ​ພະລັງງານ ນ້ຳມັນ ​ແລະ ​ແກັສທຳ​ມະ​ຊາດ​ຕໍ່​ໄປ, ​ເຖິງ​ວ່າ​ອາ​ເມ​ລິ​ກາ​ກ່າວ​ວ່າ: ຕໍ່ຈາກ​ນີ້ ປະ​ເທດ​ໃດ​ທີ່​ຄ້າຂາຍ​ພະລັງງານ​ກັບ​ອີຣານ ຈະ​ຜະ​ເຊີນ​ຄວາມ​ສ່ຽງ​ຂອງ​ການ​ຖືກ​ຂວ້ຳບາດ​ຈາກ​ລັດຖະບານ​ວໍ​ຊິງ​ຕັນ​ກໍ​ຕາມ.

- lattana 1 - ອີຣານບໍ່ສົນຄຳຂູ່ຂອງອາເມລິກາ ຢືນຢັນຜະລິດ ແລະ ສົ່ງອອກນ້ຳມັນຕໍ່ໄປ

      ສຳນັກ​ຂ່າວ​ຕ່າງປະ​ເທດ​ລາຍ​ງານ​ວ່າ: ປະທານາທິບໍດີ ຮຳ​ຊັນ ​ໂຣຮານີ ກ່າວ​ໃນ​ວັນ​ທີ 1 ພຶດສະພາ​ວ່າ: ອີຣານຈະ​ເດີນ​ໜ້າ​ສົ່ງ​ອອກ​ນ້ຳມັນ​ຕໍ່​ໄປ ​ແລະ ​ເຕືອນ​ວ່າ: ​ແນວ​ຄິດ​ຂອງ​ອາ​ເມ​ລິ​ກາ​ໃນ​ການ​ກົດ​ດັນ​ໃຫ້​ອຸປະ​ທານ​ການ​ຜະລິດ​ນ້ຳມັນ​ຂອງ​ອີຣານ “​ເຫລືອ​ເປັນ​ສູນ” ຄື​ການ​ຕັດສິນ​ໃຈ​ທີ່​ຜິດພາດ “ຄັ້ງ​ໃຫຍ່​ຫລວງ”. ທ່ານ ບີ​ຈານ ນຳ​ດາ ຊັນ​ກາ​ເນ ລັດຖະມົນຕີ​ກະຊວງ​ນ້ຳມັນ​ຂອງ​ອີຣານ ກ່າວ​ວ່າ: ມີ “ປະ​ເທດ​ໃກ້​ຄຽງ​ຢ່າງ​ໜ້ອຍ 2 ​ແຫ່ງ” ພະຍາຍາມ “ສ້າງ​ກະ​ແສ” ວ່າ​ສາມາດ​ເພີ່ມ​ກຳລັງ​ການ​ຜະລິດ​ພະລັງງານ ທັງ​ນ້ຳມັນ​ດິບ ​ແລະ ​ແກັສທຳ​ມະ​ຊາດ​ທົດ​ແທນ​ອີຣານ​ໄດ້.

      ​ຂະນະ​ດຽວ​ກັນ, ກະຊວງ​ນ້ຳມັນ​ຂອງ​ອີຣານ​ເປີດ​ເຜີຍ​ລາຍ​ງານ​ປະລິມານ​ການ​ຜະລິດ​ນ້ຳມັນສະ​ເພາະ​ເດືອນ​ເມສາ​ຜ່ານ​ມາ ບັນລຸ 104 ລ້ານ​ບາ​ເຣລ ຫລື ສະ​ເລ່ຍວັນ​ລະ 3,47 ລ້ານ​ບາ​ເຣລ, ປັດຈຸບັນ ອີຣານ​ເປັນ​ປະ​ເທດ​ຜູ້​ຜະລິດ ​ແລະ ສົ່ງ​ອອກ​ພະລັງງານ​ລາຍ​ໃຫຍ່​ອັນ​ດັບ 5 ຂອງ​ໂລກ ​ແລະ ​ເປັນອັນ​ດັບ 2 ​ໃນ​ບັນດາ​ສະມາຊິກ​ອົງການ​ກຸ່ມ​ປະ​ເທດ​ຜູ້​ສົ່ງ​ອອກ​ນ້ຳມັນ (​ໂອ​ເປັກ) ຮອງ​ຈາກ​ອາຣັບບີ ຊາ​ອຸ​ດິດ.

       ​ເຖິງ​ຢ່າງ​ໃດ​ກໍ​ຕາມ, ອາ​ເມ​ລິ​ກາ​ປະກາດ​ໃນ​ທ້າຍ​ເດືອນ​ເມສາ​ຜ່ານ​ມາ​ວ່າ: ຂໍ້​ຍົກ​ເວັ້ນ​ເປັນ​ກໍລະນີ​ພິ​ເສດ​ໃຫ້​ແກ່ ຈີນ, ຍີ່ປຸ່ນ, ສ.​ເກົາຫລີ, ອິນ​ເດຍ, ​ໄຕ້​ຫວັນ, ​ເກຣັກ, ອິຕາ​ລີ ​ແລະ ຕວກກີ ​ໃນ​ການ​ນຳ​ເຂົ້າ​ແກັສທຳ​ມະ​ຊາດ ​ແລະ ນ້ຳມັນ​ດິບ​ຈາກ​ອີຣານນັບ​ແຕ່​ເດືອນ​ພະຈິກ​ປີຜ່ານມາ ຈະ​ໝົດ​ອາຍຸ​ດ​ໃນ​ວັນ​ທີ 1 ພຶດສະພາ​ນີ້. ໝາຍ​ຄວາມ​ວ່າ: ນັບ​ແຕ່​ວັນ​ທີ 2 ພຶດສະພາ​ເປັນຕົ້ນ​ໄປ ບໍ່​ວ່າ​ປະ​ເທດ​ໃດ​ກໍ​ຕາມ​ຍັງ​ມີ​ການ​ຄ້າຂາຍ​ດ້ານ​ພະລັງງານ​ກັບ​ລັດຖະບານ​ເຕຮາ​ລານ ​ເຖິງ​ວ່າ​ບໍ່​​ໄດ້​ຢູ່​ໃນ​ກຸ່ມ​ປະ​ເທດ​ໄດ້​ຮັບ​ການ​ຍົກ​ເວັ້ນ​ເບື້ອງຕົ້ນ ຈະ​ຜະ​ເຊີນ​ກັບ​ຄວາມ​ສ່ຽງ​ສູງ​ຕໍ່​ການ​ຖືກ​ຂວ້ຳບາດ​ຈາກ​ລັດຖະບານ​ວໍ​ຊິງ​ຕັນ ​ເຊິ່ງຖອນ​ຕົວ​ອອກ​ຈາກ​ຂໍ້​ຕົກລົງ​ນິວ​ເຄຼຍອີຣານ ​ໃນ​ປີ 2018.

- 1 1 - ອີຣານບໍ່ສົນຄຳຂູ່ຂອງອາເມລິກາ ຢືນຢັນຜະລິດ ແລະ ສົ່ງອອກນ້ຳມັນຕໍ່ໄປ