ເຜີຍ​ແຜ່​ດຳລັດ​ວ່າ​ດ້ວຍ​ການ​ປັບ​ໃໝ​ຜູ້​ລະ​ເມີດ​ກົດໝາຍ​ຢາສູບ

- advert banner 728 90 728x90 - ເຜີຍ​ແຜ່​ດຳລັດ​ວ່າ​ດ້ວຍ​ການ​ປັບ​ໃໝ​ຜູ້​ລະ​ເມີດ​ກົດໝາຍ​ຢາສູບ

     ວັນທີ 3 ພຶດສະພານີ້, ກົມອະນາໄມ ແລະ ສົ່ງເສີມສຸຂະພາບກະຊວງສາທາລະນະສຸກ ໄດ້ຈັດກອງປະຊຸມເຜີຍແຜ່ດຳລັດວ່າດ້ວຍການປັບໃໝ ແລະ ນຳໃຊ້ມາດຕະການຕ່າງໆຕໍ່ຜູ້ລະເມີດກົດໝາຍ ແລະ ລະບຽບການກ່ຽວກັບການຄວບຄຸມຢາສູບໃຫ້ 6 ແຂວງພາກໃຕ້ຂຶ້ນທີ່ແຂວງສະຫວັນນະເຂດຄື: ແຂວງຄຳມ່ວນ, ສາລະວັນ, ຈຳປາສັກ, ເຊກອງ, ອັດຕະປື ແລະ ແຂວງເຈົ້າພາບ ໂດຍການເປັນປະທານຂອງທ່ານ ດຣ ພອນປະເສີດ ອຸນາພົນ ຮອງຫົວໜ້າກົມອະນາໄມ ແລະ ສົ່ງເສີມສຸຂະພາບກະຊວງສາທາລະນະສຸກ ແລະ ພາກສ່ວນທີ່ກ່ຽວຂ້ອງເຂົ້າຮ່ວມນຳ.

- lattana 1 - ເຜີຍ​ແຜ່​ດຳລັດ​ວ່າ​ດ້ວຍ​ການ​ປັບ​ໃໝ​ຜູ້​ລະ​ເມີດ​ກົດໝາຍ​ຢາສູບ

     ໃນກອງປະຊຸມ, ທ່ານ ດຣ ພອນປະເສີດ ອຸນາພົນ ໄດ້ມີຄຳເຫັນວ່າ: ວຽກງານຄວບຄຸມຢາສູບແມ່ນວຽກງານໜຶ່ງທີ່ກະຊວງສາທາລະນະສຸກໄດ້ເອົາໃຈໃສ່ໃນການຫາວິທີຫຼຸດຜ່ອນອັດຕາຄວາມສ່ຽງຂອງປະຊາກອນທີ່ມີອັດຕາການເຈັບເປັນ ແລະ ການຕາຍສູງຍ້ອນພະຍາດທີ່ກ່ຽວພັນກັບຢາສູບຄື: ໃນແຕ່ລະປີທົ່ວໂລກມີຄົນຕາຍປະມານ 60 ລ້ານກວ່າຄົນຍ້ອນພະຍາດທີ່ຕິດພັນກັບຢາສູບ.

    ຫົວໜ້າພະແນກສົ່ງເສີມສຸຂະພາບ-ສຸຂະສຶກສາ ແລະ ໂພຊະນາການ ກົມອະນາໄມ ແລະ ສົ່ງເສີມສຸຂະພາບ ໄດ້ເຜີຍແຜ່ດຳລັດດັ່ງກ່າວ, ເຊິ່ງປະກອບມີ 5 ໝວດ, 22 ມາດຕາ ທີ່ມີເນື້ອໃນກຳນົດອັດຕາປັບໃໝ ແລະ ນຳໃຊ້ມາດຕະການອື່ນຕໍ່ຜູ້ລະເມີດກົດໝາຍ ແລະ ລະບຽບການກ່ຽວກັບການຄວບຄຸມຢາສູບ ເພື່ອເປັນບ່ອນອີງໃຫ້ແກ່ເຈົ້າໜ້າທີ່ຈັດຕັ້ງປະຕິບັດການປັບໃໝຕໍ່ຜູ້ລະເມີດຢ່າງຖືກຕ້ອງ, ເປັນເອກະພາບທົ່ວປະເທດ ເພື່ອແນໃສ່ເຮັດໃຫ້ການດຳເນີນທຸລະກິດຜະລິດຕະພັນຢາສູບຖືກຕ້ອງຕາມກົດໝາຍ ແລະ ລະບຽບການ, ໃຫ້ພົນລະເມືອງມີສຸຂະພາບເຂັ້ມແຂງ, ຫຼຸດຜ່ອນການຊົມໃຊ້ຢາສູບ ແລະ ປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະ ເທດຊາດ. ໝວດທີ 2 ມາດຕາ 5 ວ່າດ້ວຍການລະເມີດ ໄດ້ລະບຸວ່າ: ພຶດຕິກຳທີ່ເປັນການລະເມີດກົດໝາຍ ແລະ ລະບຽບການກ່ຽວກັບການຄວບຄຸມຢາສູບ ປະກອບດ້ວຍ: ການບໍ່ພິມສະຫຼາກ ແລະ ຄຳເຕືອນສຸຂະພາບໃສ່ວັດຖຸຫຸ້ມຫໍ່, ການໂຄສະນາຜະລິດຕະພັນຢາສູບ, ການບໍ່ຕິດປ້າຍໃນສະຖານທີ່ຫ້າມສູບຢາ, ການສູບຢາໃນສະຖານທີ່ຫ້າມສູບຢາ, ການຂາຍ ຫຼື ຈຳໜ່າຍຜະ ລິດຕະພັນຢາສູບໃນສະຖານທີ່ເກືອດຫ້າມ, ການຂາຍຢາສູບໃຫ້ເດັກ, ໃຫ້ເດັກຊື້, ການຂາຍຜະລິດຕະພັນຢາສູບດ້ວຍເຄື່ອງຈັກອັດຕະ​ໂນຸມັດ, ການຜະລິດ, ນຳເຂົ້າ, ຈຳໜ່າຍ ຫຼື ຂາຍຢາຊອງທີ່ບັນຈຸຕ່ຳກວ່າ 20 ກອກ, ຢາຊອງ ຫຼື ຢາກະປ໋ອງເປັນກອກ ແລະ ຜະລິດຕະພັນຢາສູບນອກລະບົບທຸກຮູບການ ທັງໝົດນີ້ແມ່ນຈະຖືກປັບໃໝໄປຕາມແຕ່ລະກໍລະນີ ຈາກການສຶກສາອົບຮົມກ່າວເຕືອນກ້າວໄປເຖິງການປັບໃໝເປັນເງິນ ແລະ ຖອນໃບອະນຸຍາດດຳເນີນທຸລະກິດ ລວມທັງຢຶດ ແລະ ທຳລາຍຜະລິດຕະພັນຢາສູບດັ່ງກ່າວຖິ້ມ.

- 1 1 - ເຜີຍ​ແຜ່​ດຳລັດ​ວ່າ​ດ້ວຍ​ການ​ປັບ​ໃໝ​ຜູ້​ລະ​ເມີດ​ກົດໝາຍ​ຢາສູບ