ບານ​ເຕະ​ທິມຊາດ​ສາວ​ລາວ​ ກູ້​ໜ້າ​ກູ້​ຕາ​ໃຫ້​ປະ​ເທດ​ຊາດ

- advert banner 728 90 728x90 - ບານ​ເຕະ​ທິມຊາດ​ສາວ​ລາວ​ ກູ້​ໜ້າ​ກູ້​ຕາ​ໃຫ້​ປະ​ເທດ​ຊາດ

ໂດຍ: ທິດກ່ຳ

- new3 - ບານ​ເຕະ​ທິມຊາດ​ສາວ​ລາວ​ ກູ້​ໜ້າ​ກູ້​ຕາ​ໃຫ້​ປະ​ເທດ​ຊາດ

ພວກ​ເຮົາ​ເປັນ​ຄົນ​ລາວ​ທີ່ຢູ່​ພາຍ​ໃນ ​ແລະ ຕ່າງປະ​ເທດ ​ຄົງ​ໄດ້​ເຫັນ​ຜົນງານ​ຂອງ​ນັກ​ກິລາບານ​ເຕະ​ທິມຊາດ​ແມ່ຍິງ​ລາວ ຫລື ວ່າ​ທິມບານ​ເຕະ​ສາວ​ລາວ​ຢູ 19 ​ໄດ້​ສ້າງ​ຜົນງານ​ຢ່າງ​ໂດດ​ເດັ່ນ ​ແລະ ​ເພິ່ງ​ພໍ​ໃຈ​ໃນ​ການ​ແຂ່ງຂັນ​ກິລາ​ບານ​ເຕະ​ຢູ່​ປະ​ເທດ​ບັງ​ກະລາ​ເທດ​ໃນ​ລາຍການ Bangamato U19  ​Women’s International Gold Cup 2019 ​ໂດຍ​ມີ 6 ປະ​ເທດ​ເຂົ້າຮ່ວມຄື: ມົງ​ໂກ​ລີ, ທາ​ຈິກິ​ສະຖານ, ລາວ, ສະຫະລັດ​ອາຣັບ​ເອມີ​ເຣດ, ບັງ​ກະລາ​ເທດ ​ແລະ ຄີກິ​ສະຖານ, ​ເຊິ່ງ​ເລີ່​ມ​ແຂ່ງຂັນ​ມາ​ແຕ່​ວັນ​ທີ 22 ​ເມສາ​ຫາ​ວັນ​ທີ 3 ພຶດສະພາ 2019 ທີ່​ຜ່ານ​ມາ​ນີ້​ເອງ.

​  ໃນ​ຮອບ​ທຳ​ອິດ ທິມສາວ​ລາວ​ຊະນະ​ມົງ​ໂກ​ລີ 5 ປະຕູ​ຕໍ່ 0, ນັດ​ທີ​ສອງ​ສາມາດ​ຊະນະທີມ​ທາ​ຈິກິ​ດສະຖານ 6 ປະຕູ​ຕໍ່ 0 ​ແລະ ຮອບ​ທີ​ສາມ​ຊະນະ​ຄີ​ກິ​ສະຖານ 7 ປະຕູ​ຕໍ່ 1, ລວມສາມນັດ​ມີ 9 ຄະ​ແນນ​ສາມາດ​ເຂົ້າ​ໄປ​ຊິງ​ຊະນະ​ເລີດ​ກັບປະ​ເທດ​ບັງ​ກະລາ​ເທດ​ໃນ​ມື້ວັນ​ທີ 3 ພຶດສະພາ​ຕາມ​ຕາຕະລາງ​ທີ່​ມີ​ໄວ້​ແລ້ວ.

​  ແຕ່​ໃນ​ຕົວ​ຈິງ, ຕາມ​ແຫ​ລ່ງຂ່າວ​ໄດ້​ບອກ​ວ່າ​ຍ້ອນ​ສະພາບ​ອາກາດ​ບໍ່​ອຳນວຍເຮັດໃຫ້​ເກີດ​ພາຍຸມາບໍ່​ເປັນ​ໃຈ​ຜູ້​ເປັນ​ເຈົ້າພາບ​ຈັດການ​ແຂ່ງຂັນ ​ກໍ​ເລີຍ​ປະກາດ​ຍົກ​ເລິກ​ແລ້ວ​ຍິນ​ດີ​ຍົກ​ໃຫ້​ທິມຊາດ​ສາວ​ລາວ​ແດນ​ລ້ານ​ຊ້າງ​ເປັນ​ແຊ້ມ ​ແລະ ບັງ​ກະລາ​ເທດ​ໄດ້​ເປັນ​ຮອງ​ແຊ້ມ​ໄປ​ແບບ​ປະລິຍາຍ. ສ່ວນວ່າ​ຜົນ​ປະ​ໂຫຍ​ດຄ່າ​ເມື່ອຍ​ກໍ​ຍິນ​ດີ​ເອົາ​ລາງວັນ​ທີ​ໜຶ່ງ​ກັບ​ລາງວັນ​ທີ​ສອງ​ມາບ​ວກກັນ​ເປັນ​ເທົ່າ​ໃດ​ແລ້ວ​ມາ​ຫານ​ສອງ​ໄດ້​ຝ່າຍ​ລະ 2 ໝື່ນ​ໂດ​ລາ​ສະຫະລັດ.

   ຕາມ​ທິດ​ກ່ຳ​ເດົາ​ເບິ່ງ​ການ​ແບ່ງ​ປັນ​ໂຫຍ​ດ​ແບບ​ນີ້​ກໍ​ແມ່ນ​ເພື່ອ​ຄວາມ​ຮັກ, ​ຄວາມ​ສາມັກຄີ​ລະຫວ່າງ​ສອງ​ປະ​ເທດ, ​ໂດຍ​ສະ​ເພາະ​ກໍ​ແມ່ນ​ທິມກິລາ​ເພດ​ຍິງ​ດ້ວຍ​ກັນ ​ແລະ ອີກ​ປະການ​ໜຶ່ງ​ໃນ​ຖານະ​ບັງກະລາ​ເທດ​ເປັນ​ເຈົ້າພາບ​ຈັດ​ຂຶ້ນ, ໃນ​ການ​ແບ່ງປັນ​ຜົນ​ປະ​ໂຫຍ​ດ​ແບບ​ນີ້​ທິດ​ກ່ຳ​ກໍ​ບໍ່​ເຄີຍ​ເຫັນ​ມາ​ແຕ່​ໜຸ່ມ​ຈົນ​ເຖົ້າ ​ແຕ່​ກໍ​ເຫັນ​ວ່າການ​ແຂ່ງຂັນ​ຄັ້ງນີ້​ໄດ້​ຈົບ​ລົງ​ໂດຍ​ດີ​ມີ​ຄວາມ​ສາມັກຄີ​ເປັນ​ເລີດ.

​  ແນວ​ໃດ​ກໍ​ຕາມ, ​ເທົ່າ​ທີ່​ທິດ​ກ່ຳ​ຄິດ ​ການ​ໄປ​ແຂ່ງຂັນ​ກິລາ​ໃນ​ຄັ້ງນີ້​ມັນ​ກໍ​ປຽບ​ເໝືອນ​ການ​ໄປສູ້​ເສິກ​ອີກ​ແບບໜຶ່ງ, ທັງ​ເປັນ​ການ​ໄປສະ​ແດງ​ໃຫ້​ເຫັນ​ເຖິງ​ສັກກະ​ຍະ​ພາບ​ຂອງ​ນັກ​ຕໍ່ສູ້​ລູກ​ໜັງ ​ແລະ ຍັງ​ສະ​ແດງ​ໃຫ້​ເຫັນ​ເຖິງ​ການ​ພັດທະນາ​ດ້ານ​ກິລາ​ບານ​ເຕະ​ຍິງ​ໃນ​ຍຸກ 4.0, ​ມັນ​ກໍ​ເປັນ​ເລື່ອງ​ທຳ​ມະ​ດາ​ວ່າ​ຖ້າ​ເຮົາ​ຫາກ​ວິ​ເຄາະ​ໃນ​ແງ່​ມຸມ​ໜຶ່ງ​ກໍ​ຮູ້​ວ່າ​ໃນ​ເມື່ອ​ຄູ່​ຕໍ່ສູ້​ໄດ້​ເຫັນ​ຄວາມ​ເກັ່ງ​ກ້າ​ແຂງ​ແກ່ນ​ຂອງ​ອີກ​ຝ່າຍ​ໜຶ່ງ​ທີ່​ຈະ​ສູ້​ບໍ່​ໄຫວ​ກໍ​ຕ້ອງ​ໄດ້​ຍົກ​ທຸງ​ຂາວ​ຫາ​ວິທີ​ທາງ​ອອກ​ເພື່ອ​ຮັກສາ​ທ່າ​ໄດ້​ປຽບ​ໃນ​ດ້ານ​ຜົນ​ປະ​ໂຫຍ​ດທີ່​ຕົນ​ປະ​ຄັບ​ປະຄອງ​ຢູ່.

  ໜັງສືພິມ​ລາວ​ພັດທະນາ​ ​ເປັນ​ໜັງສືພິມ​ລາຍ​ວັນ​ທີ່​ເດີນ​ໜ້າ​ຮັບ​ໃຊ້​ສັງຄົມ​ຕ້ອງ​ຂໍ​ຍ້ອງຍໍ​ຊົມ​ເຊີຍ​ນັກ​ກິລາ​ທິມຊາດ​ຍິງ​ລາວ​ຢູ 19 ທີ່​ໄດ້​ສ້າງ​ຜົນງານ​ມາ​ໃຫ້​ຕົນ​ເອງ ​ແລະ ລວມໝູ່. ນອກຈາກ​ນັ້ນ, ຍັງ​ສາມາດ​ກູ້​ໜ້າ​ກູ້​ຕາ​ມາ​ໃຫ້​ປະ​ເທດ​ຊາດ​ບ້ານ​ເມືອງ, ຜົນງານ​ທີ່​ຍາດ​ມາໄດ້​ນີ້​ກໍ​ແມ່ນ​ຍ້ອນ​ຄວາມ​ບຸກບືນ, ສູ້​ຊົນ, ຕັ້ງໜ້າ​ຝຶກ​ແອບ ​ແລະ ປະຕິບັດ​ລະບຽບ​ວິ​ໄນ​ຂອງນັກ​ກິລາ​ທຸກ​ຄົນ ​ແລະ ອີກ​ສິ່ງ​ໜຶ່ງ​ທີ່​ບໍ່​ຄວນ​ລືມ​ນັ້ນກໍ​ແມ່​ນຄະນະ​ນຳ, ຄູ​ຝຶກ​ໄດ້​ເສຍສະຫລະນຳພາ​ທິມຊາດ​ຂອງ​ຕົນ​ໄປ​ສູ່ເປົ້າໝາຍ.

- lattana 1 - ບານ​ເຕະ​ທິມຊາດ​ສາວ​ລາວ​ ກູ້​ໜ້າ​ກູ້​ຕາ​ໃຫ້​ປະ​ເທດ​ຊາດ

  ດັ່ງ​ພວກ​ເຮົາ​ຮັບ​ຮູ້​ນຳ​ກັນ​ແລ້ວ​ວ່າ: ​ໃນ​ຍຸກ​ໂລກາ​ພິວັດ ຫລື ວ່າ​ຍຸກ​ອຸດ​ສາຫະ​ກຳ 4.0 ການ​ແກ້ງ​ແຍ່ງ​​ແຂ່ງຂັນ​ກັນ​ໃນ​ການ​ພັດທະນາ​ທຸກ​ດ້ານ​ເປັນ​ວິວັດ​ແຫ່ງ​ການ​ຂະຫຍາຍຕົວ​ຂອງ​ສັງຄົມ, ຂອງ​ພາກພື້ນ ​ແລະ ຂອງ​ໂລກ, ຖ້າ​ພວກ​ເຮົາ​ບໍ່​ພາກັນ​ເບິ່ງ​ກວ້າງ​ເຫັນ​ໄກ​ແລ້ວ​ ຄວາມ​ດ້ອຍ​ພັດທະນາ​ລ້າ​ຫລັງ​ກໍ​ຈະ​ຄອບ​ງຳ​ປະ​ເທດ​ຊາດ​ບ້ານ​ເມືອງ​ດັ່ງ​ປະຫວັດສາດ​ສາມ​ສີ່​ຮ້ອຍ​ປີຜ່ານມາ.

​  ເພາະສະນັ້ນ, ພວກ​ເຮົາ​ທີ່​ເປັນ​ນັກ​ກິລາ​ທິມຊາດ​ຝ່າຍ​ຊາຍ​ເອີກ​ສາມ​ສອກ, ກົ້ນບາກ, ປາກ​ໜວດ ​ບໍ່​ວ່າ​ລຸ້ນ​ໃດ, ລຸ້ນນ້ອຍ, ລຸ້ນ​ໃຫຍ່, ລຸ້ນອາວຸ​ໂສ​ຄວນ​ໄດ້​ຄິດ​ຫງຳ ​ແລະ ນຳ​ເອົາ​ມາ​ເປັນ​ແບບຢ່າງ, ບໍ່​ຄວນ​ເຫັນ​ຜົນ​ປະ​ໂຫຍ​ດຂອງ​ຕົນ​ຫລາຍ​ກວ່າ​ສ່ວນ​ລວມ ​ແລະ ​ເໜືອກ​ວ່າປະ​ເທດ​ຊາດ.

 ການລົ້ມບານ​ເພື່ອ​ຮັບ​ສິນ​ບົນ​ຈາກ​ລາຍການ​ແຂ່ງຂັນ​ລະດັບ​ພາກພື້ນ ​ແລະ ສາກົນ​ໃດ​ໜຶ່ງ ຫລື ວ່າ​ລະດັບ​ໃດ​ກໍ​ຕາມ ​ຖື​ວ່າ​ເປັນ​ການ​ຂາຍໜ້າ​ຂາຍ​ຕາ​ຕົນ​ເອງ ​ແລະ ປະ​ເທດ​ຊາດ ​ຕົກ​ໃນ​ເຄື່ອຂ່າຍ​ການ​ສໍ້​ລາດ​ບັງ​ຫລວງ, ສໍ້​ຫລວງ​ບັງ​ລາດ, ປະຊາຊົນ​ເຂົາ​ຈົ່ມ ​ແລະ ​ເສື່ອມສັດທາ​ທັງ​ປວງນັ້ນ​ແລ.

- b87bc440 fd29 4368 bb53 ce4a9e827062 - ບານ​ເຕະ​ທິມຊາດ​ສາວ​ລາວ​ ກູ້​ໜ້າ​ກູ້​ຕາ​ໃຫ້​ປະ​ເທດ​ຊາດ
error: Content is protected !!