ນັກຮຽນ 100 ກວ່າຄົນເຂົ້າຮ່ວມໂຄງການ “ສອນນ້ອງລອຍນ້ຳ”
ສະຫະພັນລອຍນ້ຳແຫ່ງຊາດລາວ ຮ່ວມກັບໂຮງຮຽນຝຣັ່ງ ຈັດກິດຈະກຳ “ສອນນ້ອງລອຍນ້ຳ” ຂຶ້ນໃນວັນທີ 10 ພຶດສະພານີ້ ໂດຍມີທ່ານ ສົມພູ ພົງສາ ຮອງປະທານ ແລະ ທັງເປັນເລຂາທິການຄະນະກຳມະການໂອແລັມປິກແຫ່ງຊາດລາວ ພ້ອມດ້ວຍນ້ອງນັກຮຽນ 100 ກວ່າຄົນເຂົ້າຮ່ວມ.
ຄູຝຶກນັກກິລາລອຍນ້ຳທີມຊາດລາວ ໃຫ້ສຳພາດວ່າ: ໂຄງການສອນນ້ອງລອຍນ້ຳ ເປັນໂຄງການໜຶ່ງທີ່ດຳເນີນມາເປັນເວລາ 5 ປີແລ້ວ ເຊິ່ງແຕ່ລະປີຈະຈັດຂຶ້ນ 2 ຄັ້ງຄື: ເດືອນພຶດສະພາຫາມິຖຸນາ ແລະ ລະຫວ່າງເດືອນກັນຍາຫາເດືອນພະຈິກ ເຊິ່ງກິດຈະກຳຄັ້ງນີ້ເພື່ອແນໃສ່ຊ່ວຍເດັກນ້ອຍສາມາດຫລີກເວັ້ນບັນຫາຈົມນ້ຳໃຫ້ຫລຸດລົງ ພ້ອມທັງຮູ້ວິທີເອົາຕົວລອດໃນນ້ຳໄດ້. ສຳລັບໂຄງການປີນີ້ ທາງຄະນະກຳມະການໄດ້ເລືອກເອົາເດັກນັກຮຽນອາຍຸແຕ່ 7-11 ປີ ຢູ່ໂຮງຮຽນປະຖົມ 5 ແຫ່ງຄື: ປະສົມສົມບູນໜອງບອນ, ໂພນທັນ, ໂພນພະເນົາ, ໂສກປ່າຫລວງ ແລະ ໂຮງຮຽນປະຖົມສົມບູນສີສະຫວາດ.
ດັ່ງນັ້ນ, ທາງສະຫະພັນລອຍນ້ຳແຫ່ງຊາດລາວ ຈຶ່ງຂໍເຊີນຊວນບັນດາໂຮງຮຽນພາກລັດ ຖ້າວ່າໂຮງຮຽນໃດຫາກມີຄວາມສົນໃຈເຂົ້າຮ່ວມໂຄງການດັ່ງກ່າວ ແມ່ນສາມາດຕິດຕໍ່ຫາທີມງານຄູຝຶກສອນທີ່ຄະນະກຳມະການໂອແລັມປິກແຫ່ງຊາດລາວໄດ້.