- advert banner 728 90 728x90 -

ກອງປະຊຸມຄັ້ງທີ 8 ຂອງຄະນະບໍລິຫານງານສູນກາງພັກສະໄໝທີ 10 ເນັ້ນສືບຕໍ່ສ້າງການຫັນປ່ຽນໃໝ່ທີ່ຕັ້ງໜ້າເພື່ອແກ້ໄຂບັນຫາຄົງຄ້າງຕ່າງໆ

- lattana 1 -

  ກອງປະຊຸມຄົບຄະນະຄັ້ງທີ 8 ຂອງຄະນະບໍລິຫານງານສູນກາງພັກສະໄໝທີ X ໄດ້ດຳເນີນມາແຕ່ວັນທີ 6-14 ພຶດສະພານີ້ທີ່ສຳນັກງານສູນກາງພັກ, ພາຍໃຕ້ການເປັນປະທານຂອງສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ. ກອງປະຊຸມໄດ້ຄົ້ນຄວ້າ, ປຶກສາຫາລື ແລະ ໃຫ້ທິດຊີ້ນຳຕໍ່ບັນຫາສຳຄັນຂອງຊາດ ຄື:
ຕີລາຄາຄວາມຄືບໜ້າການຈັດຕັ້ງຜັນຂະຫຍາຍມະຕິກອງປະຊຸມຄົບຄະນະຄັ້ງທີ 7 ຂອງຄະນະບໍລິຫານງານສູນກາງພັກສະໄໝທີ X ກ່ຽວກັບການແກ້ໄຂຄວາມຫຍຸ້ງຍາກດ້ານເສດຖະກິດມະຫາພາກ ເປັນຕົ້ນແມ່ນການຈັດຕັ້ງປະຕິບັດງົບປະມານຂອງລັດ, ການແກ້ໄຂໜີ້ສິນສາທາລະນະ, ການປັບປຸງລັດວິສາຫະກິດ, ການບໍລິການຂອງລັດເພື່ອອຳນວຍຄວາມສະດວກໃຫ້ແກ່ພາກທຸລະກິດ, ການຫລຸດຜ່ອນຂອດຂັ້ນທີ່ກົດໜ່ວງຖ່ວງດຶງການພັດທະນາ: ການແກ້ໄຂບັນຫາເງິນຕາ, ການຈໍລະຈອນສິນຄ້າ, ການຊຸກຍູ້ສົ່ງເສີມວິສາຫະກິດຂະໜາດກາງ-ຂະໜາດນ້ອຍ ແລະ ການສ້າງຖານລາຍຮັບໃໝ່. ຮັບຟັງລາຍງານກ່ຽວກັບສະພາບການພັດທະນາຊົນນະບົດໃນໄລຍະຜ່ານມາ, ຊຶ່ງແມ່ນວຽກງານຍຸດທະສາດ, ທັງເປັນວຽກບຸລິມະສິດສຳຄັນ ແລະ ເປັນແຜນນະໂຍບາຍໃຫຍ່ທີ່ຕ້ອງດຳເນີນໄປຢ່າງຕໍ່ເນື່ອງເພື່ອແກ້ໄຂຄວາມທຸກຍາກຂອງປະຊາຊົນ, ຜ່ານມາເຖິງວ່າເຂດຊົນນະບົດຢູ່ປະເທດເຮົາໄດ້ມີໂສມໜ້າຫັນປ່ຽນໃໝ່ນັບທັງພື້ນຖານໂຄງລ່າງ, ລະບົບສາທາລະນຸປະໂພກ, ການຜະລິດ, ການບໍລິການ, ລະບົບການເມືອງຢູ່ຮາກຖານໄດ້ຮັບການປັບປຸງໃຫ້ມີຄວາມໜັກແໜ້ນເຂັ້ມແຂງຂຶ້ນ​ ແຕ່ຄຽງຄູ່ກັນນັ້ນກໍເຫັນວ່າຍັງມີຂໍ້ຄົງຄ້າງຈຳນວນໜຶ່ງທີ່ຕ້ອງໄດ້ສືບຕໍ່ແກ້ໄຂທີ່ພົວພັນເຖິງຄວາມຮັບຜິດຊອບຊີ້ນໍາ-ນຳພາຂອງຄະນະພັກ ແລະ ອຳນາດການປົກຄອງແຕ່ລະຂັ້ນ.

ກອງປະຊຸມໄດ້ຕີລາຄາຕໍ່ບັນຫາການແບ່ງຂັ້ນຄຸ້ມຄອງບໍລິຫານລັດ ຊຶ່ງເປັນບັນຫາສໍາຄັນໜຶ່ງໃນການສືບຕໍ່ສ້າງ ແລະ ບູລະນະລັດປະຊາທິປະໄຕປະຊາຊົນ ຕາມຈຸດໝາຍກ້າວຂຶ້ນສູ່ສັງຄົມນິຍົມ ໃນໄລຍະຜ່ານມາພັກ-ລັດໄດ້ເອົາໃຈໃສ່ຊີ້ນຳວຽກງານດັ່ງກ່າວຕາມທິດແບ່ງຄວາມຮັບຜິດຊອບ, ແບ່ງສິດ ແລະ ຄວາມເປັນເຈົ້າການໃຫ້ທ້ອງຖິ່ນຫລາຍຂຶ້ນ, ສູນກາງເຮັດໜ້າທີ່ຄຸ້ມຄອງມະຫາພາກ ເປັນຕົ້ນຕໍ, ໂດຍສະເພາະແມ່ນການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ, ສ້າງບ້ານເປັນຫົວໜ່ວຍພັດທະນາ, ອັນໄດ້ເຮັດໃຫ້ໜ້າທີ່, ຂອບເຂດສິດ ແລະ ຄວາມຮັບຜິດຊອບຂອງບັນດາອົງການບໍລິຫານຂັ້ນສູນກາງ ແລະ ທ້ອງຖິ່ນແຕ່ລະຂັ້ນໄດ້ຖືກກຳນົດໄວ້ໃນກົດໝາຍຢ່າງຈະແຈ້ງ ທັງໄດ້ຮັບການປັບປຸງໃຫ້ໜັກແໜ້ນເຂັ້ມແຂງຂຶ້ນ, ທ້ອງຖິ່ນມີຄວາມຫ້າວຫັນເປັນເຈົ້າການໃນການປະຕິບັດພາລະບົດບາດໜ້າທີ່ໃນການຄຸ້ມຄອງລັດຄຸ້ມຄອງສັງຄົມດ້ວຍກົດໝາຍ ກໍຄືການພັດທະນາເສດຖະກິດ-ສັງຄົມ ຢູ່ທ້ອງຖິ່ນຮາກຖານຢ່າງມີປະສິດທິຜົນ. ພ້ອມນັ້ນຄະນະບໍລິຫານງານສູນກາງພັກຍັງໄດ້ສຸມໃສ່ຄົ້ນຄວ້າ, ວິເຄາະວິໄຈບັນດາບັນຫາຄົງຄ້າງ ແລະ ສາເຫດຈໍານວນໜຶ່ງ ເພື່ອວາງທິດທາງການປັບປຸງໃນຕໍ່ໜ້າໂດຍຊີ້ໃຫ້ເຫັນວ່າ: ປັບປຸງການແບ່ງຂັ້ນຄຸ້ມຄອງລະຫວ່າງອົງການບໍລິຫານລັດຂັ້ນສູນກາງ, ແຂວງ, ເມືອງ ແລະ ບ້ານ ຕ້ອງຮັບປະກັນສ້າງຄວາມເປັນລະບົບ ໂດຍອີງໃສ່ກົດໝາຍທີ່ກ່ຽວຂ້ອງ ເປັນຕົ້ນກົດໝາຍວ່າດ້ວຍລັດຖະບານ, ກົດໝາຍວ່າດ້ວຍການປົກຄອງທ້ອງຖິ່ນ, ກົດໝາຍທີ່ດິນ, ກົດໝາຍສົ່ງເສີມການລົງທຶນ, ກົດໝາຍງົບປະມານ ແລະ ກົດໝາຍອື່ນໆ ເພື່ອເພີ່ມຄວາມຮັບຜິດຊອບ ແລະ ຜົນປະໂຫຍດໃຫ້ທ້ອງຖິ່ນຮາກຖານໃນການນໍາໃຊ້ທ່າແຮງບົ່ມຊ້ອນເຂົ້າໃນການພັດທະນາບ້ານຊ່ອງຂອງຕົນເອງ. ກອງປະຊຸມໄດ້ໃຫ້ທິດຊີ້ນຳກ່ຽວກັບການດຳເນີນຄະດີຕາມຂະບວນຍຸຕິທຳ, ຊຶ່ງເປັນວຽກສຳຄັນໜຶ່ງ ແລະ ພວມເປັນບັນຫາພົ້ນເດັ່ນໃນປັດຈຸບັນ. ໄລຍະຜ່ານມາການດໍາເນີນຄະດີຕາມຂະບວນຍຸຕິທໍາໄດ້ຮັບການປັບປຸງໃຫ້ມີຄວາມໜັກແໜ້ນເຂັ້ມແຂງເປັນກ້າວໆ, ສາມາດປົກປ້ອງສິດ ແລະ ຜົນປະໂຫຍດຂອງລັດ, ລວມໝູ່ ແລະ ພົນລະເມືອງ ຕາມລັດຖະທຳມະນູນ ແລະກົດໝາຍ ປະກອບສ່ວນໃນການຮັບປະກັນສະຖຽນລະພາບການເມືອງ, ຄວາມສະຫງົບຄວາມປອດໄພໃນສັງຄົມ ແລະ ຊຸກຍູ້ການພັດທະນາເສດຖະກິດ-ສັງຄົມ, ແຕ່ຄຽງຄູ່ກັນນັ້ນກໍຍັງມີຫລາຍອັນທີ່ຕ້ອງໄດ້ສືບຕໍ່ປັບປຸງແກ້ໄຂ ເພື່ອຮັບປະກັນຄຸນນະພາບຂອງການແກ້ໄຂຄະດີ ກໍຄືການປະຕິບັດຄຳຕັດສິນຂອງສານ ເພື່ອແນໃສ່ເພີ່ມທະວີການຄຸ້ມຄອງລັດ, ຄຸ້ມຄອງສັງຄົມ ຕາມລັດຖະທໍາມະນູນ ແລະ ກົດໝາຍໃຫ້ມີຄວາມເຂັ້ມງວດ, ສັກສິດ ແລະ ມີຄວາມຍຸຕິທຳ. ກອງປະຊຸມໄດ້ໃຫ້ທິດຊີ້ນຳ ແລະ ຮັບຮອງເອົາໂຄງຮ່າງລາຍງານການເມືອງຕໍ່ກອງປະຊຸມໃຫຍ່ຄັ້ງທີ XI ຂອງພັກ, ໂດຍມອບໃຫ້ກົມການເມືອງສູນກາງພັກຊີ້ນຳການກະກຽມເນື້ອໃນຮ່າງລາຍງານການເມືອງໃຫ້ມີຄວາມໜັກແໜ້ນ, ຮັດກຸມ ແລະ ແທດຕົວຈິງ ເພື່ອສືບຕໍ່ບູລະນະ ແລະ ເພີ່ມເຕີມເສີມຂະຫຍາຍ, ແນວທາງປ່ຽນແປງໃໝ່ຂອງພັກໃຫ້ນັບມື້ອຸດົມສົມບູນ, ປະດິດສ້າງ ແລະ ແກ້ໄຂບັນຫາຕົວຈິງທີ່ເກີດຂຶ້ນ, ຮັບປະກັນໃຫ້ແກ່ການນຳພາພາລະກິດປົກປັກຮັກສາ ແລະ ພັດທະນາສ້າງສາປະເທດຊາດຕາມຈຸດໝາຍສັງຄົມນິຍົມໄດ້ຮັບຜົນສຳເລັດໃໝ່ໃນຊຸມປີຕໍ່ໜ້າ. ພ້ອມນີ້, ກອງປະຊຸມໄດ້ມອບໃຫ້ກົມການເມືອງ, ຄະນະເລຂາທິການສູນກາງພັກ ຊີ້ນຳ-ນໍາພາການເຊື່ອມຊຶມ ແລະ ຜັນຂະຫຍາຍບັນດາບັນຫາທີ່ໄດ້ຮັບຮອງໃນກອງປະຊຸມຄັ້ງນີ້ໃຫ້ກວ້າງຂວາງ, ເລິກເຊິ່ງ, ພ້ອມທັງຊີ້ນຳຢ່າງໃກ້ຊິດຕໍ່ບັນດາອົງການຂອງລັດຮີບຮ້ອນຫັນໃຫ້ເປັນແຜນປະຕິບັດງານລະອຽດ, ລວມທັງດຳເນີນການປັບປຸງບັນດານິຕິກຳທີ່ຈຳເປັນໃຫ້ສອດຄ່ອງກັບທິດທາງທີ່ວາງອອກຢ່າງເປັນລະບົບ, ຮັດກຸມ ທັງຈັດຕັ້ງປະຕິບັດໃຫ້ເຂັ້ມງວດ ແລະ ມີປະສິດທິຜົນສູງ ກໍຄືການຊີ້ນຳການຜັນຂະຫຍາຍມະຕິ, ຄຳສັ່ງ ລວມທັງບັນດານິຕິກຳຕ່າງໆຂອງສູນກາງພັກ, ສະພາແຫ່ງຊາດ ແລະ ລັດຖະບານວາງອອກໃຫ້ແຂງແຮງ ເພື່ອສ້າງການຫັນປ່ຽນໃໝ່ທີ່ຕັ້ງໜ້າໃນການແກ້ໄຂບັນຫາຄົງຄ້າງຕ່າງໆ, ສ້າງພື້ນຖານອັນໜັກແໜ້ນໃນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກໄດ້ຮັບຜົນສຳເລັດຢ່າງຈົບງາມ.

- Tiger Head 728x90 -
- 1 1 -
error: Content is protected !!