ເຄັດລັບການແກ້ອາການເບື່ອວຽກ – ເບື່ອຫ້ອງການ

- advert banner 728 90 728x90 - ເຄັດລັບການແກ້ອາການເບື່ອວຽກ – ເບື່ອຫ້ອງການ

     – ເບື່ອວຽກທີ່ເຮັດ : ຫາກວຽກທີ່ເຮັດຢູ່ເຮັດໃຫ້ທ່ານເກີດຄວາມຮູ້ສຶກຫຍຸ້ງຍາກ, ວຽກໜັກເກີນໄປ, ມີແຕ່ຄົນມອບໝາຍວຽກໃຫ້ຫລາຍເກີນໄປ ແລະ ທຸກຄົນລ້ວນແຕ່ຕັ້ງຄວາມຫວັງວ່າວຽກຂອງທ່ານຈະຕ້ອງອອກມາດີ ເຮັດໃຫ້ທ່ານມີຄວາມກົດດັນສູງ ແລະ ບໍ່ມີຄວາມສຸກໃນການເຮັດວຽກ.

- new3 - ເຄັດລັບການແກ້ອາການເບື່ອວຽກ – ເບື່ອຫ້ອງການ

     ວິທີແກ້ໄຂ : ລອງປັບທັດສະນະຄະຕິໂດຍການເບິ່ງໃນທາງກົງກັນຂ້າມວ່ານີ້ແມ່ນບົດທົດສອບ ແລະ ເປັນປະສົບການທີ່ດີໃນການເຮັດວຽກ, ຫົວໜ້າຄົງຈະແນມເຫັນສັກກະຍະພາບໃນໂຕທ່ານວ່າສາມາດເຮັດວຽກທີ່ໄດ້ຮັບມອບໝາຍໃຫ້ປະສົບຄວາມສຳເລັດໄດ້, ແຕ່ຫາກທ່ານຍັງຮູ້ສຶກວ່າໜັກໜາຢູ່ ກໍລອງຂໍຄຳປຶກສາຈາກລຸ້ນອ້າຍ – ເອື້ອຍຜູ້ທີ່ມີປະສົບການຫລາຍກ່ວາ ເຂົາອາດ ສະແດງຄວາມຄິດເຫັນ ຫລື ໃຫ້ຄຳແນະນຳທີ່ເປັນປະໂຫຍດກັບທ່ານ.

 ຈື່ໄວ້ວ່າ ທ່ານບໍ່ຈຳເປັນຕ້ອງແກ້ໄຂບັນຫາທຸກຢ່າງໃຫ້ລຸລ່ວງ ສິ່ງທີ່ທ່ານຄວນເຮັດກໍຄື ພະຍາຍາມແກ້ໄຂບັນຫາຢ່າງເຕັມທີ່ຕາມຄວາມສາມາດທີ່ທ່ານພໍຈະເຮັດໄດ້ ຫາກບໍ່ໄຫວແທ້ໆກໍຢ່າໄປຝືນ ຄວນບອກໃຫ້ຫົວໜ້າຮູ້ເຖິງພາລະຄວາມຮັບຜິດຊອບທີ່ຫລວງຫລາຍຂອງທ່ານເພື່ອຫາແນວທາງແກ້ໄຂຮ່ວມກັນຈະດີກ່ວາ.

     – ເບື່ອລະບົບ ແລະ ບໍລິສັດ : ລະບົບວຽກຂອງບໍລິສັດບໍ່ໄດ້, ຊຳ້ຊ້ອນເຊື່ອງຊ້າ, ຫລາຍຂັ້ນຕອນ, ມີແຕ່ເອກະສານ, ມີແຕ່ການປະຊຸມ, ຂາດຄວາມຮ່ວມມື ແລະ ປະສານງານລະຫ່ວາງຝ່າຍ, ບໍລິສັດໃຫ້ເງິນເດືອນໜ້ອຍກ່ວາ ແລະ ສະຫວັດດີການໜ້ອຍກ່ວາບ່ອນອື່ນ, ແຕ່ໃຊ້ວຽກ (ເກີນ) ກຸ້ມຄ່າ.

     ວິທີແກ້ໄຂ : ຖ້າລະບົບວຽກຂອງບໍລິສັດບໍ່ມີປະສິດທິພາບພຽງພໍ ແລະ ທ່ານຮູ້ວິທີແກ້ໄຂບັນຫາເຫລົ່ານັ້ນ ທ່ານອາດລອງປັບປ່ຽນລະບົບການເຮັດວຽກດ້ວຍໂຕເອງກ່ອນວ່າ ເຮັດແບບນັ້ນແລ້ວໄດ້ຜົນດີຂຶ້ນຫລືບໍ່ ຈາກນັ້ນຈຶ່ງນຳສະເໜີຫົວໜ້າເບິ່ງ ອາດເກີດເປັນນະວັດຕະກຳຂອງລະບົບວຽກ ຫລື ຢ່າງໜ້ອຍຫົວໜ້າຈະໄດ້ຮູ້ບັນຫາຂອງລະບົບວຽກຫລາຍຍິ່ງຂຶ້ນ. ອີກຢ່າງໜຶ່ງແມ່ນຕ້ອງເອົາໃຈເຂົາມາໃສ່ໃຈເຮົາ ຫາກທ່ານເປັນເຈົ້າຂອງບໍລິສັດ ເຊິ່ງຕ້ອງແບກຮັບພາລະຫລາຍໆດ້ານ ທ່ານກໍຄົງຕ້ອງວາງນະໂຍບາຍໃນເລື່ອງຕ່າງໆຢ່າງລະອຽດຮອບຄອບ (ໂດຍສະເພາະເລື່ອງເງິນເດືອນ ແລະ ສະຫວັດດີການ) ເພື່ອໃຫ້ເກີດຄວາມຍຸດຕິທຳກັບທຸກຝ່າຍ ແລະ ເພື່ອຄົງໄວ້ເຊິ່ງສະຖຽນລະພາບອັນໝັ້ນຄົງຂອງບໍລິສັດ.

     ອີກສິ່ງໜຶ່ງທີ່ຈະຊ່ວຍໄດ້ແມ່ນ ທ່ານຕ້ອງໝັ່ນເຂົ້າຮັບການຝຶກອົບຮົມເພື່ອພັດທະນາຕົນເອງ ແລະ ເພີ່ມພູມຄວາມຮູ້ຄວາມສາມາດໃຫ້ແກ່ຕົນເອງຢູ່ສະເໝີ. ໃນອະນາຄົດ ບໍລິສັດອາດເບິ່ງເຫັນສັກກະຍະພາບຂອງທ່ານ ແລະ ໂຍກຍ້າຍປ່ຽນຕຳແໜ່ງ ພ້ອມທັງປັບຂຶ້ນເງິນເດືອນໃຫ້ ການພັດທະນາຕົນເອງໃຫ້ມີຄວາມຮູ້ເພີ່ມຂຶ້ນຢ່າງໜ້ອຍກໍຈະເປັນຕົ້ນທຶນໃຫ້ແກ່ທ່ານ ຫາກທ່ານຢາກຈະ ປ່ຽນວຽກໃໝ່ໃນອະນາຄົດ.

     – ເບື່ອຫົວໜ້າ, ລູກນ້ອງ ແລະ ເພື່ອນຮ່ວມງານ : ຫົວໜ້າເຂັ້ມງວດເກີນໄປ, ບໍ່ມີຄວາມຍຸດຕິທຳ, ອ່ອນແອເກີນໄປ, ບໍ່ມີຄວາມເປັນຜູ້ນຳ.

     ວິທີແກ້ໄຂ : ຮູ້ຈັກປັບໂຕໃຫ້ເຂົ້າກັບຫົວໜ້າ ເຊັ່ນ : ຫາກຫົວໜ້າເປັນຄົນເຈົ້າລະບຽບ, ລຳລິລຳໄລ ທ່ານກໍຄວນເຮັດວຽກໃຫ້ເປັນລະບົບ ລະອຽດຮອບຄອບ ແລະ ຮຽບຮ້ອຍ, ແຕ່ຫາກຫົວໜ້າເປັນຄົນບໍ່ກ້າຕັດສິນໃຈ, ອ່ອນແອ ຫລື ຍັງໃໝ່ໃນການເຮັດວຽກ ທ່ານກໍຄວນສຶກສາຫາຂໍ້ມູນເພີ່ມຕື່ມ ເພື່ອຈະໄດ້ຊ່ວຍສະເໜີແນະນຳແນວທາງເລືອກໃໝ່ໆໃຫ້ແກ່ຫົວໜ້າ ເຂົາຈະໄດ້ຄິດ ແລະ ຕັດ ສິນໃຈໄດ້ຢ່າງຖືກຕ້ອງ. ວິທີການເຫລົ່ານີ້ໜ້າຈະງ່າຍກ່ວາລໍຖ້າໃຫ້ຫົວໜ້າປັບໂຕເຂົ້າຫາທ່ານ.

- lattana 1 - ເຄັດລັບການແກ້ອາການເບື່ອວຽກ – ເບື່ອຫ້ອງການ

     – ລູກນ້ອງບໍ່ດຸໝັ່ນເຮັດວຽກ,ບໍ່ຕັ້ງໃຈເຮັດວຽກໃຫ້ເຕັມທີ່ຕັກເຕືອນ ລົງໂທດໃສ່ວິໄນແລ້ວ ແຕ່ກໍບໍ່ຍອມເຊື່ອຟັງ, ເຮັດວຽກບໍ່ໄດ້ຕາມເປົ້າໝາຍ, ບໍ່ປັບປຸງໂຕເອງ.

     ວິທີແກ້ໄຂ : ຮູ້ຈັກເອົາໃຈເຂົາມາໃສ່ໃຈເຮົາ ໃນກໍລະນີແບບນີ້ທ່ານອາດຕ້ອງເບິ່ງຍ້ອນກັບມາເບິ່ງໂຕທ່ານເອງວ່າແຂງເກີນໄປຫລືບໍ່, ອ່ອນເກີນໄປຫລືບໍ່, ທ່ານຕ້ອງຮູ້ຈັກສ້າງບັນຍາກາດທີ່ດີໃນການເຮັດວຽກ, ຍອມຮັບຟັງບັນຫາ, ໃຫ້ຄວາມຊ່ວຍເຫລືອ, ເປັນທີ່ປຶກສາທີ່ດີໃຫ້ແກ່ລູກນ້ອງ, ໃຫ້ການຍອມຮັບ, ເບິ່ງເຫັນ ແລະ ເຂົ້າໃຈໃນໂຕຕົນຂອງລູກນ້ອງແຕ່ລະຄົນ, ເຕັມທີ່ກັບລູກນ້ອງ ແລ້ວລູກນ້ອງຈະເຕັມທີ່ກັບທ່ານເຊັ່ນກັນ.

     – ເພື່ອນຮ່ວມງານບໍ່ໜ້າຄົບຫາ,ມັກແທງຂ້າງຫລັງ, ເອົາດີໃສ່ໂຕ ເອົາຊົ່ວໃສ່ທ່ານ.

     ວິທີແກ້ໄຂ : ບໍ່ສົນໃຈ ແລະ ໃຫ້ອະໄພເພື່ອນຮ່ວມງານປະເພດນີ້ ບາງເທື່ອຈິດອັນເປັນກຸສົນຂອງທ່ານຈະດົນບັນດານໃຫ້ເຂົາເຊົາວຸ້ນວາຍກັບທ່ານ, ກັບໂຕກັບໃຈໄດ້ ແລະ ຈື່ໄວ້ວ່າ ຍິ່ງຕໍ່ສູ້ ທ່ານກໍຈະຍິ່ງເປັນທຸກ, ເສຍເວລາເຮັດວຽກຂອງທ່ານນຳອີກ.

     – ເບື່ອໂຕເອງ : ທ່ານອາດມີບັນຫາເຂົ້າມາຮຸກຮານ ທັງເລື່ອງຄອບຄົວ, ການເງິນ, ໝູ່ເພື່ອນ, ຄວາມຮັກ ຫລື ອາດສັບສົນກັບເປົ້າໝາຍຊີວິດຂອງໂຕເອງຈົນເກີດອາການຂ້າງຄຽງພານລາມມາເຖິງເລື່ອງວຽກ ເຮັດໃຫ້ຮູ້ສຶກເບື່ອໜ່າຍ, ທໍ້ໃຈ, ໝົດຫວັງກັບທຸກສິ່ງ ແລະ ບໍ່ມີເຫື່ອແຮງຈະເຮັດວຽກໃນແຕ່ລະມື້.

     ວິທີແກ້ໄຂ : ບໍ່ແມ່ນເລື່ອງແປກທີ່ທ່ານຈະເບື່ອໂຕເອງ ຜູ້ຊ່ຽວຊານດ້ານຈິດຕະວິທະຍາກ່າວວ່າ : ສິ່ງທີ່ພົບຫລາຍ ແລະ ເປັນບັນຫາຫລາຍທີ່ສຸດດ້ານສຸຂະພາບຈິດໃນການເຮັດວຽກກໍແມ່ນຄວາມເຄັ່ງຄຽດຂອງບຸກຄະລາກອນກ່ຽວກັບເລື່ອງສ່ວນໂຕ. ສິ່ງທີ່ທ່ານຄວນເຮັດກໍຄື ຕັ້ງສະຕິ, ຈັດລຽງລຳດັບຄວາມຄິດ, ໄຈ້ແຍກບັນຫາແຕ່ລະບັນຫາອອກຈາກກັນ ແລ້ວທະຍອຍແກ້ໄຂມັນເທື່ອລະບັນຫາ, ບໍ່ຄວນເອົາບັນຫາສ່ວນໂຕມາປະປົນກັບເລື່ອງວຽກ ເພາະຈະເຮັດໃຫ້ບັນຫາເລື່ອງວຽກທີ່ວ່າໜັກຢູ່ແລ້ວ ເພີ່ມທະວີຄວາມໜັກໜາສາຫັດຂຶ້ນອີກຫລາຍເທົ່າ ກາຍເປັນເສຍຫາຍທັງສອງເລື່ອງ. ເຊື່ອວ່າຫາກທ່ານຮູ້ຈັກປັບທັດສະນະຄະຕິ, ເບິ່ງດ້ານບວກ, ມີຄວາມອົດທົນ ແລະ ໃຊ້ສະຕິປັນຍາໃນການແກ້ໄຂບັນຫາ ທຸກຄວາມເບື່ອຈະຈາງຫາຍໄປເອງໃນທີ່ສຸດ.

error: Content is protected !!