ສື່ສານພາສາອັງກິດດີຈຶ່ງມີຜົນ

- advert banner 728 90 728x90 - ສື່ສານພາສາອັງກິດດີຈຶ່ງມີຜົນ

ໂດຍ: ມຶກບໍ່ແຫ້ງ

- new3 - ສື່ສານພາສາອັງກິດດີຈຶ່ງມີຜົນ

ການພັດທະນາບໍ່ວ່າຂະແຫນງການໃດກໍຕາມການສື່ສານແມ່ນແກ່ນແທ້ຂອງ ການຂັບເຄື່ອນກິດຈະກໍາຕ່າງໆເພື່ອບັນລຸເປົ້າຫມາຍທີ່ວາງໄວ້.

ແນ່ນອນ ເມື່ອເວົ້າເຖິງການສື່ສານແມ່ນ ມີຄວາມກວ້າງຂວາງຫຼາຍ ແຕ່ມື້ນີ້ຜູ້ຂຽນຈະມາຂໍແລກປ່ຽນກ່ຽວກັບລະດັບການໃຊ້ພາສາອັງກິດຂອງພະນັກງານບໍລິ ການໃນສະຫນາມບິນສາກົນ ອິນຊອນ (Incheon) ປະເທດເກົາຫຼີໃຕ້.

ຜູ້ຂຽນເຄີຍເດີນທາງຜ່ານສະຫນາມບິນ ອິນຊອນຂອງປະເທດເກົາຫຼີໃຕ້ສອງຄັ້ງກໍມີຄວາມປະທັບໃຈຫຼາຍທັງສອງຄັ້ງ ເຊິ່ງບໍ່ແມ່ນແຕ່ວ່າຄວາມທັນສະໄຫມຂອງອາຄານສະຖານທີ່, ເທັກໂນໂລຊີໃຫມ່ເຫຼົ່ານັ້ນດອກ ແຕ່ແມ່ນພະນັກງານບໍລິການໃນສະຫນາມບິນຕັ້ງແຕ່ຄົນຍາມໃກ້ປາກປະຕູຈົນຮອດພະນັກງານໃຫຮູ້ຂໍ້ມູນ ຂ່າວສານສາມາດສື່ສານພາສາອັງກິດໄດ້ເປັນຢ່າງດີທີ່ສຸດ.

ໃນຄວາມເປັນຈິງແລ້ວພາສາອັງກິດກໍບໍ່ໄດ້ແມ່ນພາສາທາງການຂອງເກົາຫຼີ ໃຕ້ເລີຍ ແຕ່ລັດຖະບານປະເທດດັ່ງກ່າວມີນະໂຍບາຍການຮຽນຮູ້ພາສາອັງກິດ ທີ່ເປັນພາສາທີ່ສອງນັ້ນຢ່າງເຂັ້ມຂຸ້ນທີ່ສຸດ, ສັງເກດເຫັນວ່າມີຄົນຫນຸ່ມຈາກເກົາຫຼີໃຕ້ໄປຮຽນພາສາອັງກິດຢູ່ພາຍໃນ ແລະ ຕ່າງປະເທດຢ່າງຫຼວງຫຼາຍ ເຊິ່ງເປັນປັດໄຈຫນຶ່ງທີ່ເຮັດໃຫ້ປະເທດນີ້ຈາກປະເທດທີ່ທຸກທີ່ສຸດປະເທດຫນຶ່ງຢູ່ ອາຊີ ໃນອະດີດຈົນມາ ເປັນປະເທດທີ່ຮັ່ງມີປະເທດຫນຶ່ງໃນໂລກປັດຈຸບັນ.

ພຽບພ້ອມກັບ ຄວາມສາມາດພາສາອັງກິດນັ້ນ ເຂົາເຈົ້າຍັງມີຄຸນນະທໍາໃນການເຮັດວຽກບໍລິການ ທີ່ໃຫ້ຄວາມເອົາໃຈໃສ່ເປັນຢ່າງດີ, ເມື່ອຜູ້ຂຽນມາຮອດ ແລະ ນໍາໃຊ້ສະຫນາມບິນຄັ້ງທໍາອິດ ເຊິ່ງບໍ່ຮູ້ຈະຂີ່ລົດໄຟໃຕ້ດິນແນວໃດ ເລີຍໄປຖາມພະນັກງານຍິງອາວຸໂສຄົນຫນຶ່ງລາວກໍຈະໄດ້ແລ້ວປະມານ 50ປີ, ເຖິງວ່າ ການສື່ສານພາສາອັງກິດຈະໄດ້ດີສົມຄວນ ແຕ່ລາວຍັງຈັບບິກ ແລະ ເຈ້ຍມາວາດຮູບເປັນແຜນທີ່ໃຫ້ໄປນໍາອີກ.

ຈາກເລື່ອງມາຍິກມາຍ່ອຍອັນນີ້ມັນຈຶ່ງບໍ່ແປກທີ່ໄດ້ນໍາມາເຊິ່ງພາບພົດອັນຍິ່ງໃຫຍ່ຂອງສະຫນາມບິນອິນຊອນ ເຊິ່ງຖືກຈັດວ່າ ເປັນສະຫນາມບິນທີ່ດີທີ່ສຸດແຫ່ງຫນຶ່ງໃນໂລກ ແລະ ຍັງໄດ້ຊື່ວ່າ ເປັນສະຫນາມບິນທີ່ດີທີ່ສຸດໃນການເດີນທາງຜ່ານໄປຈຸດຫມາຍປາຍທາງອື່ນ ປະຈໍາປີ 2019 ຕື່ມອີກ.

- lattana 1 - ສື່ສານພາສາອັງກິດດີຈຶ່ງມີຜົນ

ການບໍລິການຂອງສະຫນາມບິນອິນຊອນມັນອາດເປັນລໍາດັບທີ່ແຕກຕ່າງຈາກເຮົາຫຼາຍທີ່ຍັງບໍ່ສາມາດທຽບເທົ່າທັນກັນໄດ້ ແຕ່ຈຸດຫນຶ່ງທີ່ຫຼຽວເຫັນວ່າ ກ່ອນວຽກງານການບໍລິການຈະເດີນແມ່ນແລ່ນສະດວກນັ້ນມັນກໍຂຶ້ນກັບການສື່ສານ ໂດຍສະເພາະພາສາສາກົນ ຄືພາສາອັງກິດນັ້ນແລ.

ປະເທດເຮົາກໍຄືປະເທດເກົາຫຼີໃຕ້ ທີ່ນໍາໃຊ້ພາສາອັງກິດເປັນພາສາທີສອງ ແຕ່ຍັງສັງເກດເຫັນວ່າ ການບໍລິການຂອງພະນັກງານເຮົາ ໂດຍການນໍາໃຊ້ ພາສາອັງກິດນັ້ນຍັງມີຄວາມທ້າທາຍສົມຄວນບໍ່ວ່າໃນສະຫນາມບິນກໍຄືຂະແຫນງການບໍລິການອື່ນໆ ເຊັ່ນການທ່ອງທ່ຽວ.

ຄວາມຈິງທີ່ຫນ້າເສົ້າກໍຄືດັດຊະນີຄວາມຊໍານານທາງດ້ານພາສາອັງກິດຂອງບັນດາປະເທດທີ່ໃຊ້ພາສາດັ່ງກ່າວເປັນພາສາທີສອງນັ້ນ ເພິ່ນສໍາຫຼວດເກືອບຮ້ອຍປະເທດທົ່ວໂລກ ແຕ່ສັງເກດວ່າ ສປປລາວຂ້ອນໄປທັງເກືອບທ້າຍສຸດຫມູ່ ແຕ່ຫວຽດນາມມີຄວາມຊໍານານທາງດ້ານພາສາທີ່ສູງຫຼາຍ.

ເຖິງວ່າ ພາສາອັງກິດຈະບໍ່ແມ່ນສິ່ງຕັດສິນທັງຫມົດຂອງລະບົບການບໍລິການ ແຕ່ເປັນສ່ວນສໍາຄັນຢ່າງຍິ່ງ ທີ່ຈະຊ່ວຍໃຫ້ການດໍາເນີນການມີຄວາມວ່ອງໄວ ແລະ ປະສິດພາບສູງໃນທ່າມກາງການແຂ່ງຂັນຢ່າງຂຸ້ນຂ້ຽວຂອງການພັດທະນາໃນພາກພື້ນ ແລະ ສາກົນ,ພວກເຮົາ ມາພັດທະນາທັກສະພາສາອັງກິດໃຫ້ຄົນລາວຫຼາຍກວ່ານີ້ກັນເທາະ.

error: Content is protected !!