ສະພາຮັບຮອງເອົາຮ່າງກົດໝາຍວ່າດ້ວຍອາຊີວະສຶກ ສະບັບປັບປຸງ

- advert banner 728 90 728x90 - ສະພາຮັບຮອງເອົາຮ່າງກົດໝາຍວ່າດ້ວຍອາຊີວະສຶກ ສະບັບປັບປຸງ

ຮ່າງກົດໝາຍວ່າດ້ວຍ ອາຊີວະສຶກສາ ສະບັບປັບປຸງ ໄດ້ຖືກຮັບຮອງເອົາໃນກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ VIII ໃນວັນທີ 12 ມິຖຸນານີ້, ໂດຍການເປັນປະທານຂອງທ່ານນາງ ສີໃສ ລືເດດມູນສອນ ຮອງປະທານສະພາແຫ່ງຊາດ ພາຍຫຼັງທ່ານນາງ ແສງເດືອນ ຫຼ້າຈະທະບູນ ລັດຖະມົນຕີກະຊວງສຶກສາທິການ ແລະ ກິລາ ໄດ້ສະເໜີ ຕໍ່ກອງປະຊຸມວ່າ: ກົດໝາຍວ່າດ້ວຍອາຊີວະສຶກສາ ໄດ້ປະກາດໃຊ້ໃນປີ 2014, ຜ່ານການຈັດຕັ້ງປະຕິບັດກົດໝາຍດັ່ງກ່າວ, ເຫັນວ່າມີບາງເນື້ອໃນຊໍ້າຊ້ອນກັບກົດໝາຍວ່າດ້ວຍແຮງງານ, ມີຫຼາຍປະໂຫຍກຂ້ອນຂ້າງຍາວ, ເນື້ອໃນບາງມາດຕາ, ບາງຄໍາສັບຍັງບໍ່ຊັດເຈນ ແລະ ບໍ່ຮັດກຸມ ຍັງບໍ່ຕອບສະໜອງນະໂຍບາຍການສົ່ງເສີມການລົງທຶນຂອງພາກທຸລະກິດເຂົ້າໃນວຽກງານອາຊີວະສຶກສາ, ນະໂຍບາຍສົ່ງເສີມການຄົ້ນຄວ້າວິທະຍາສາດ, ເຕັກໂນໂລຊີ ແລະ ນະວັດຕະກໍາບໍ່ຊັດເຈນ, ຍັງບໍ່ທັນຕອບສະໜອງຄວາມຮຽກຮ້ອງຕ້ອງການຂອງການພັດທະນາເສດຖະກິດ-ສັງຄົມໃນໄລຍະໃໝ່. ສ່ວນໂຄງປະກອບຂອງຮ່າງກົດໝາຍວ່າດ້ວຍ ອາຊີວະສຶກສາ ສະບັບເກົ່າ ປະກອບມີ 13 ພາກ, 18 ໝວດ ແລະ 107 ມາດຕາ, ສະບັບປັບປຸງ ປະກອບມີ 14 ພາກ, 17 ໝວດ ແລະ 98 ມາດຕາ, ໃນນັ້ນ, ໄດ້ເພີ່ມເຂົ້າໃໝ່ 1 ພາກ,​ 1​ ໝວດ ແລະ ຕັດອອກ 9 ມາດຕາ ໂດຍເອົາເນື້ອໃນໄປຊັບຊ້ອນເຂົ້າໃນມາດຕາອື່ນ, ໃນນັ້ນໄດ້ປັບປຸງເນື້ອໃນທັງໝົດ 70 ມາດຕາ, ຮັກສາໄວ້ຄືເກົ່າ 22 ມາດຕາ ແລະ ເພີ່ມເຂົ້າໃໝ່ອີກ 6 ມາດຕາ.

- lattana 1 - ສະພາຮັບຮອງເອົາຮ່າງກົດໝາຍວ່າດ້ວຍອາຊີວະສຶກ ສະບັບປັບປຸງ

ສ່ວນເຫດຜົນ ແລະ ຄວາມຈໍາເປັນໃນການປັບປຸງຮ່າງກົດໝາຍດັ່ງກ່າວນີ້ ເພື່ອແກ້ໄຂບັນຫາເນື້ອໃນທີ່ຍັງບໍ່ທັນມີຄວາມຊັດເຈນ, ແນໃສ່ໃຫ້ມີເນື້ອໃນລະອຽດ ແລະ ສອດຄ່ອງກັບແຜນພັດທະນາເສດຖະກິດ-ສັງຄົມໃນໄລຍະໃໝ່, ແກ້ໄຂບາງເນື້ອໃນທີ່ມີຄວາມຊໍ້າຊ້ອນ, ເພື່ອດຶງດູດການລົງທຶນທັງພາຍໃນ ແລະ ຕ່າງປະເທດ ເຂົ້າໃນວຽກງານອາຊີວະສຶກສາໃຫ້ຫຼາຍຂຶ້ນ, ເພື່ອສົ່ງເສີມການຮ່ວມມືລະຫວ່າງພາກລັດ ແລະ ພາກທຸລະກິດ ໃນວຽກງານອາຊີວະສຶກສາໃຫ້ແໜ້ນແຟ້ນ ແລະ ກວ້າງຂວາງຂຶ້ນ, ສົ່ງເສີມການຄົ້ນຄວ້າວິທະຍາສາດ, ເຕັກໂນໂລຊີ ແລະ ນະວັດຕະກໍາ ແລະ ສົ່ງເສີມຜູ້ຮຽນ, ຜູ້ດ້ອຍໂອກາດ ແລະ ຜູ້ຮຽນທີ່ມີບັນຫາໄດ້ເຂົ້າເຖິງການຮຽນວິຊາຊີບ ຕອບສະໝອງກັບການພັດທະນາເສດຖະກິດ-ສັງຄົມຢູ່ພາຍໃນປະເທດ, ພາກພື້ນ ແລະ ສາກົນ ທີ່ມີການປ່ຽນແປງ ແລະ ມີທ່າອ່ຽງຂະຫຍາຍຕົວນັບມື້ສູງຂຶ້ນ ແລະ ວ່ອງໄວ.

ເມື່ອຮ່າງກົດໝາຍວ່າດ້ວຍ ອາຊີວະສຶກສາ ສະບັບປັບປຸງຖືກຮັບຮອງ ແລະ ປະກາດນໍາໃຊ້: ຈະຊ່ວຍໃຫ້ການພັດທະນາວຽກງານອາຊີວະສຶກສາ ມີປະສິດທິພາບ ແລະ ປະສິດທິຜົນສູງຂຶ້ນ, ມີການຂະຫຍາຍໂອກາດເຂົ້າເຖິງອາຊີວະສຶກສາ ແລະ ຝຶກອົບຮົມວິຊາຊີບຂອງຜູ້ຮຽນເພີ່ມຂຶ້ນ, ສ້າງ ແລະ ພັດທະນາກໍາລັງແຮງງານໃນລະດັບວິຊາຊີບຫຼາຍຂຶ້ນ, ມີຄຸນນະພາບສາມາດເຂົ້າສູ່ຕະຫຼາດແຮງງານ ແລະ ເປັນຜູ້ປະກອບການດ້ວຍຕົນເອງ ສອດຄ່ອງກັບຄວາມຕ້ອງການຂອງແຜນພັດທະນາເສດຖະກິດ-ສັງຄົມແຫ່ງຊາດ ກໍຄືທ້ອງຖິ່ນ, ຍົກສູງຄວາມເຊື່ອໝັ້ນໃຫ້ແກ່ຜູ້ມີສ່ວນຮ່ວມ, ຄູ່ຮ່ວມພັດທະນາ ແລະ ສັງຄົມ ທັງຊຸກຍູ້ສົ່ງເສີມການລົງທຶນເຂົ້າໃນວຽກງານອາຊີວະສຶກສາໃຫ້ຫຼາຍຂຶ້ນ.

- 1 1 - ສະພາຮັບຮອງເອົາຮ່າງກົດໝາຍວ່າດ້ວຍອາຊີວະສຶກ ສະບັບປັບປຸງ
- Tiger Head 728x90 - ສະພາຮັບຮອງເອົາຮ່າງກົດໝາຍວ່າດ້ວຍອາຊີວະສຶກ ສະບັບປັບປຸງ