ສະພາຮັບຮອງເອົາຮ່າງກົດໝາຍວ່າດ້ວຍ ປ່າໄມ້ ສະບັບປັບປຸງ

- advert banner 728 90 728x90 - ສະພາຮັບຮອງເອົາຮ່າງກົດໝາຍວ່າດ້ວຍ ປ່າໄມ້ ສະບັບປັບປຸງ

ຮ່າງກົດໝາຍວ່າດ້ວຍ ປ່າໄມ້ ສະບັບປັບປຸງ ໄດ້ຖືກຮັບຮອງໃນກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ VIII ຄັ້ງວັນທີ 13 ມິຖຸນານີ້, ໂດຍການເປັນປະທານຂອງທ່ານ ບຸນປອນ ບຸດຕະນະວົງ ຮອງປະທານສະພາແຫ່ງຊາດ ແລະ ພາຍຫຼັງທ່ານ ລຽນ ທິແກ້ວ ລັດຖະມົນຕີ ກະຊວງກະສິກໍາ ແລະ ປ່າໄມ້ ໄດ້ນໍາສະເໜີຮ່າງກົດໝາຍວ່າດ້ວຍປ່າໄມ້ ສະບັບປັບປຸງ ຕໍ່ກອງປະຊຸມວ່າ: ກົດໝາຍວ່າດ້ວຍປ່າໄມ້ ໄດ້ຖືກຮັບຮອງ ແລະ ປະກາດນໍາໃຊ້ໃນປີ 2007, ຜ່ານການຈັດຕັ້ງປະຕິບັດໃນໄລຍະຜ່ານມາ, ເຫັນວ່າກົດໝາຍສະບັບນີ້ ໄດ້ເປັນເຄື່ອງມືມະຫາພາກ, ເປັນນິຕິກໍາພື້ນຖານສໍາລັບການຄຸ້ມຄອງ, ປົກປັກຮັກສາ ແລະ ພັດທະນາປ່າໄມ້. ຄຽງຄູ່ກັນນີ້ ເຫັນວ່າກົດໝາຍດັ່ງກ່າວ ຍັງມີຫຼາຍດ້ານບໍ່ທັນສອດຄ່ອງກັບຄວາມຮຽກຮ້ອງຕ້ອງການຂອງການຄຸ້ມຄອງ, ປົກປັກຮັກສາ, ພັດທະນາ,​ ສົ່ງເສີມທົ່ວປວງຊົນເຂົ້າຮ່ວມຢ່າງຫ້າວຫັນ ແລະ ນໍາໃຊ້ຢ່າງມີປະສິດທິຜົນ, ບໍ່ທັນສອດຄ່ອງກັບການຮ່ວມມືກັບສາກົນໃນໄລຍະໃໝ່. ສ່ວນໂຄງປະກອບຂອງຮ່າງກົດໝາຍວ່າດ້ວຍ ປ່າໄມ້ ສະບັບເກົ່າ ປະກອບມີ 12 ພາກ,​13 ໝວດ ແລະ 130 ມາດຕາ, ສໍາລັບສະບັບປັບປຸງ ປະກອບມີ 15 ພາກ, 16 ໝວດ ແລະ 175 ມາດຕາ, ໃນນີ້, ປັບປຸງທັງໝົດ 90 ມາດຕາ, ເພີ່ມໃໝ່ 56 ມາດຕາ ແລະ ຮັກສາໄວ້ 29 ມາດຕາ.

- lattana 1 - ສະພາຮັບຮອງເອົາຮ່າງກົດໝາຍວ່າດ້ວຍ ປ່າໄມ້ ສະບັບປັບປຸງ

ສ່ວນເຫດຜົນ ແລະ ຄວາມຈໍາເປັນໃນການປັບປຸງກົດໝາຍວ່າດ້ວຍປ່າໄມ້ ໃນຄັ້ງນີ້ ເພື່ອຫັນປ່ຽນໄປສູ່ການຄຸ້ມຄອງ, ປົກປັກຮັກສາ ແລະ ສົ່ງເສີມການປູກໄມ້ເປັນຕົ້ນຕໍ, ສອດຄ່ອງກັບແນວທາງນະໂຍບາຍຂອງພັກໃນໄລຍະໃໝ່ຕາມທິດການພັດທະນາສີຂຽວ ແລະ ຍືນຍົງ, ຕິດພັນກັບການພັດທະນາຊົນນະບົດ ແກ້ໄຂຄວາມທຸກຍາກຕາດທິດ 3 ສ້າງ ແລະ ສອດຄ່ອງກັບສົນທິສັນຍາສາກົນທີ່ລາວເປັນພາຄີ.

ເມື່ອຮ່າງກົດໝາຍ ວ່າດ້ວຍ ປ່າໄມ້ ສະບັບປັບປຸງນີ້ ໄດ້ຖືກຮັບຮອງ ແລະ ປະກາດນໍາໃຊ້ ຈະເປັນນິຕິກໍາພື້ນຖານໃຫ້ແກ່ການເຄື່ອນໄຫວຂອງອົງການລັດຂັ້ນສູນກາງ, ທ້ອງຖິ່ນ ແລະ ພາກສ່ວນທີ່ກ່ຽວຂ້ອງ ໃນການເຄື່ອນໄຫວວຽກງານການຄຸ້ມຄອງ, ປົກປັກຮັກສາ, ພັດທະນາ, ນໍາໃຊ້ ແລະ ກວດກາປ່າໄມ້ ແລະ ທີ່ດິນປ່າໄມ້ ຊຶ່ງຈະເປັນການປະກອບສ່ວນເຂົ້າໃນການສ້າງລັດແຫ່ງກົດໝາຍເປັນກ້າວໆ, ເປັນບ່ອນອີງໃຫ້ແກ່ການກໍານົດຍຸດທະສາດ, ແຜນງານ, ໂຄງການຂອງອົງການຈັດຕັ້ງລັດຂັ້ນສູນກາງ ແລະ ຂັ້ນທ້ອງຖິ່ນ, ເຮັດໃຫ້ການຄຸ້ມຄອງ, ປົກປັກຮັກສາ, ພັດທະນາ, ນໍາໃຊ້ ແລະ ກວດກາປ່າໄມ້ ແລະ ທີ່ດິນປ່າໄມ້ ເປັນລະບົບ ແລະ ມີປະສິດທິຜົນຂຶ້ນກວ່າເກົ່າ, ເຮັດໃຫ້ອົງການຈັດຕັ້ງລັດຂັ້ນສູນກາງ, ຂັ້ນທ້ອງຖິ່ນ ແລະ ທຸກພາກສ່ວນໃນສັງຄົມ ເຂົ້າໃຈ ແລະ ເຫັນໄດ້ພັນທະໜ້າທີ່ຂອງຕົນເອງທີ່ມີຕໍ່ການຄຸ້ມຄອງ,​ ປົກປັກຮັກສາ, ພັດທະນາ, ນໍາໃຊ້ ແລະ ກວດກາປ່າໄມ້ ແລະ ທີ່ດິນປ່າໄມ້, ພ້ອມທັງສ້າງຄວາມເຊືອໝັ້ນໃຫ້ແກ່ນັກລົງທຶນທັງພາຍໃນ ແລະ ຕ່າງປະເທດ ແລະ ປະຊາຊົນ ເຂົ້າຮ່ວມໃນການລົງທຶນພັດທະນາປ່າໄມ້ໃຫ້ມີຄວາມໝັ້ນຄົງ, ເປັນພື້ນຖານໃຫ້ແກ່ອົງການຈັດຕັ້ງລະຫວ່າງປະເທດ ແລະ ອົງການຈັດຕັ້ງສາກົນ ໃຫ້ການສະໜັບສະໜູນດ້ານທຶນຮອນ ແລະ ເຕັກໂນໂລຊີ ເຂົ້າໃນວຽກງານປ່າໄມ້.

- 1 1 - ສະພາຮັບຮອງເອົາຮ່າງກົດໝາຍວ່າດ້ວຍ ປ່າໄມ້ ສະບັບປັບປຸງ
- Tiger Head 728x90 - ສະພາຮັບຮອງເອົາຮ່າງກົດໝາຍວ່າດ້ວຍ ປ່າໄມ້ ສະບັບປັບປຸງ