ຢ່າໃຫ້ເຫດຜົນຕື້ນໆ ຟືນນະໂຍບາຍປະຢັດ

- Untitled design - ຢ່າໃຫ້ເຫດຜົນຕື້ນໆ ຟືນນະໂຍບາຍປະຢັດ

- Untitled 1 6 - ຢ່າໃຫ້ເຫດຜົນຕື້ນໆ ຟືນນະໂຍບາຍປະຢັດ

ຫລັງ​ຈາກ​ອ່ານໜັງສື​ພິມ​ວຽງ​ຈັນທາ​ມ (Vientiane Times) ສະບັບ​ວັນ​ທີ 14 ​ເດືອນ​ນີ້ ກ່ຽວ​ກັບ​ແຜນ​ໂຈະ​ຊື້ລົດ​ໃໝ່​ມາ​ຮັບ​ໃຊ້​ວຽກ​ລັດຖະການ​ແລ້ວ ກໍ​ເລີຍ​ປວດ​ຢາກ​ເວົ້າ​ເລື່ອງ​ນະ​ໂຍບາຍ​ປະຢັດ​ຮັດ​ສາຍ​ແອວ, ອັດ​ຮູ​ຮົ່ວ ກໍ​ຄື​ການ​ໃຊ້​ຈ່າຍ​ງົບປະມານ​ຂອງ​ລັດ​ຢ່າງ​ຟຸມ​ເຟືອຍ​ແບບ​ບໍ່​ອັ້ນ. ​ເນື້ອ​ໃນ​ຂອງ​ບົດ​ທີ່​ອ່ານ​ພໍ້​ໃນ​ Vientiane Times ທີ່​ເອີ່ຍ​ເຖິງ​ນັ້ນ ບໍ່​ໄດ້​ເວົ້າສະ​ເພາະ​ແຕ່​ເລື່ອງ​ແຜນ​ໂຈະ​ຊື້ລົດ​ໃໝ່​ມາ​ຮັບ​ໃຊ້​ເທົ່າ​ນັ້ນ, ​ແຕ່​ຍັງ​ລວມ​ໄປ​ເຖິງ​ການ​ປະຢັດ​ໃນ​ຂະ​ແໜງ​ການ​ອື່ນໆ​ທີ່​ເຄີຍ​ມີ​ການ​ໃຊ້​ຈ່າຍ​ງົບປະມານ​ຂອງ​ລັດ​ແບບ​ຟຸມ​ເຟືອຍ​ມາ​ກ່ອນ​ແລ້ວ. ຈຸດ​ທີ່​ຈານ​ແຫຍ່​ຊົມ​ເຊີຍ ​ແລະ ກິນ​ໃຈ​ແຮງ​ແມ່ນ​ກ່ຽວ​ກັບ​ການ​ຫ້າມ​ເຊົ່າ​ສະຖານ​ທີ່​ຕາມ​ໂຮງ​ແຮມ ຫລື ນອກ​ສຳນັກງານ​ອົງການ​ທີ່​ກ່ຽວຂ້ອງ ​ເພື່ອ​ຈັດ​ກອງ​ປະຊຸມ​ລະດັບ​ຕ່າງໆ ​ແຕ່​ໃຫ້​ນຳ​ໃຊ້​ສະຖານ​ທີ່ຢູ່​ພາຍ​ໃນ​ສຳນັກງານ​ກ່ຽວຂ້ອງ​ເອງ. ບັນຫາ​ນີ້ ຢູ່ ສປ ຈີນ ​ເຂົາ​ໄດ້​ຫ້າມ​ກັນ​ມາເມື່ອ 3 ປີກ່ອນ​ໜ້າ​ພຸ້ນ. ຢູ່​ບ້ານ​ເຮົາ ພະຍາດ​ນິຍົມ​ເຊົ່າ​ສະຖານ​ທີ່​ທາງ​ນອກ ​ເພື່ອ​ຈັດ​ກອງ​ປະຊຸມ, ຈັດ​ງານ​ລ້ຽງ​ໄດ້​ລະບາດ​ມາ​ຫລາຍ​ປີ​ແລ້ວ ດ້ວຍ​ຂໍ້​ອ້າງ​ຕື້ນໆ​ວ່າ: “​ເພື່ອ​ຄວາມ​ສະດວກ​ສະບາຍ, ​ເພື່ອ​ການ​ບໍລິການ​ລະດັບ​ມື​ອາຊີບ” ບວກ​ກັບ​ຂໍ້​ອ້າງ​ອື່ນໆ​ວ່າ: “​ເພື່ອ​ປ່ຽນ​ບັນຍາກາດ” ​ໃຫ້​ພະນັກງານ​ໄດ້​ເຫັນ​ຫລາຍ​ບ່ອນ​ຫລາ​ຍທີ່. ນອກຈາກ​ການ​ເຊົ່າ​ສະຖານ​ທີ່​ທາງ​ນອກ ​ເພື່ອ​ຈັດ​ກອງ​ປະຊຸມ​ແລ້ວ ກໍ​ຍັງ​ມີ​ທ່າ​ອ່ຽງນິຍົມ​ໄປ​ຈັດ​ກອງ​ປະຊຸມ​ຢູ່​ຕ່າງ​ແຂວງ​ເຂດ​ຫ່າງ​ໄກ​ຕື່ມ. ​ເລື່ອງ​ນີ້​ຖ້າ​ເປັນ​ກອງ​ປະຊຸມ​ທີ່​ພົວພັນ​ກັບ​ຫົວ​ຂໍ້​ທີ່​ຕ້ອງ​ຊອກ​ຮູ້​ບັນຫາ​ໃນ​ແຂວງ​ບ່ອນ​ຈັດ​ປະຊຸມ ຫລື ກອງ​ປະຊຸມ​ທີ່​ຈັດ​ເປັນ​ເຂດ​ໃຫ້​ຜູ້​ແທນ​ໃນ​ແຂວງ​ໃກ້​ຄຽງ​ໄດ້​ມາ​ເຕົ້າ​ໂຮມ​ກັນ​ຢູ່​ບ່ອນ​ດຽວ ​ເພື່ອ​ປະຢັດ​ງົບ​ໃນ​ການ​ເດີນທາງ​ນັ້ນຍ່ອມ​ເປັນ​ເລື່ອງ​ດີ, ​ແຕ່​ຖ້າ​ການ​ໄປ​ຈັດ​ກອງ​ປະຊຸມ​ຢູ່​ຕ່າງ​ແຂວງ​​ໂດຍ​ອ້າງ​ວ່າ “​ເພື່ອ​ໃຊ້​ງົບ​ໃຫ້​ໝົດ, ບໍ່ຊັ້ນມັນ​ຕົກ​ໄປ​” ຫລື ​“​ເພື່ອ​ປ່ຽນ​ບັນຍາກາດ” ​ໃຫ້​ອ້າຍ​ເອື້ອຍນ້ອງ​ພະນັກງານ​ແລ້ວ, ​ແນ່ນອນກໍ​ຄົງ​ເປັນ​ເຫດຜົນ​ເສຍ​ຫຍ້າ​ປົກ​ຂີ້ໝາ​ຊື່ໆ.

 

ຈານ​ແຫຍ່​ວ່າ​ເລື່ອງ​ນີ້​ຄວນ​ເບິ່ງ​ຄືນ​ຮອດ​ການ​ຈັດ​ກອງ​ປະຊຸມ​ທີ່​ໃຊ້​ງົບປະມານ​ໂຄງການ​ຊ່ວຍ​ເຫລືອ​ຂອງ​ຕ່າງປະ​ເທດ​ຕື່ມ ​ເພາະ​ຖ້າ​ອ້າງ​ແຕ່​ວ່າ​ເປັນ​ຖົງ​ເງິນ​ໂອ​ດີ​ເອ (ODA) ​ແລ້ວ​ກໍ​ຢ່າ​ເຢີ້… ມັນ​ກໍ​ສ້າງ​ຄ່າ​ນິຍົມ​ບໍ່​ດີ​ໃຫ້​ສັງຄົມ​ພວກ​ເຮົາ. ນອກ​ນັ້ນກໍ​ຍັງ​ຈະ​ເກີດ​ມີ​ການ​ຍາດ​ແຍ່ງ​ກັນ​ໄປ​ຮ່ວມ​ກອງ​ປະຊຸມ​ທີ່​ໃຊ້​ພື້ນ​ໂຄງການ ​ເພາະ​ຈະ​ໄດ້​ເພີ​ດຽມ (Perdiem-​ເງິນ​ເບ້ຍລ້ຽງ​ປະຈຳ​ວັນ) ບໍ່​ນັບ​ເງິນ “ຄອມ​ມີ​ຊັນ” (​ເງິນ​ເປີ​ເຊັນ) ຄ່າ​ເຊົ່າ​ສະຖານ​ທີ່ ກໍ​ຄື​ຄ່າ​ອາຫານ​ຕື່ມ. ​ເລື່ອງ​ຄຳ​ສັ່ງ​ໃຫ້​ນຳ​ໃຊ້​ຂອງຂວັນ-ສິ່ງ​ລະນຶກ​ທີ່​ຜະລິດ​ຢູ່​ພາຍ​ໃນ​ ​ເພື່ອ​ຕ້ອນ​​ແຂກ​ຕ່າງປະ​ເທດ​ນັ້ນ​ແມ່ນ​ຈຸດ​ຫັນປ່ຽນ​ທີ່​ຖືກຕ້ອງ​ທີ່​ສຸດ ​ເພາະ​ຜ່ານ​ມາ​ລັດ​ພວກ​ເຮົາ​ສິ້ນ​ເປືອງ​ງົບປະມານ​ເລື່ອງ​ຂອງຂວັນ​ບໍ່​ແມ່ນ​ຂອງ​ໜ້ອຍ. ຄຳ​ວ່າ “ຜະລິດ​ຕະພັນ​ພາຍ​ໃນ” ນີ້​ກໍ​ຄວນ​ເວົ້າລະອຽດ, ບໍ່ຊັ້ນກໍ​ອາດ​ມີ​ຜູ້​ສວຍ​ໂອກາດ​ຊ່ອງ​ໂວ່, ດີ​ທີ່​ສຸດ​ຄວນ​ມີ​ການ​ກຳນົດ​ເພດານ​ລາຄາ​ຂອງຂວັນ​ຄັກ​ແນ່ (​ແຕ່​ກໍ​ເຊື່ອ​ວ່າ​ຄົງ​ມີ​ແຜນ​ລະອຽດ​ແລ້ວ) ​ເພາະ​ຜ່ານ​ມາ​ພວກ​ເຮົາ​ກໍ​ເຄີຍ​ຫ້າມ​ກັນ​ມາ​ຈົນ​ນ້ຳລາຍ​ແຫ້ງ ​ແຕ່​ກໍ​ເປິ… ຈົນ​ຊິ​ບໍ່​ມີ​ເງິນສົດ​ສຳລັບ​ເອົາ​ໄວ້​ຕີ​ຂັນ​ອີກ​ຕໍ່​ໄປ​ແລ້ວ. ​ເລື່ອງ​ການ​ຫ້າມ​ຊື້​ເຫລົ້າລາຄາ​ແພງ​ມາ​ເກືອ​ກັນ​ຢູ່​ງານ​ລ້ຽງ​ນັ້ນ ທຸກໆ​ຄົນ​ຄົງ​ຍໍມື​ສາທຸ​ນຳ.

 

- Wave100S AD to Website 2020 0 - ຢ່າໃຫ້ເຫດຜົນຕື້ນໆ ຟືນນະໂຍບາຍປະຢັດ

ສຸດ​ທ້າຍ​ແມ່ນ​ການ​ເຂົ້າຮ່ວມ​ກອງ​ປະຊຸມ​ຢູ່​ຕ່າງປະ​ເທດ ຄື​ໃຫ້​ເລື່ອງ​ເຂົ້າຮ່ວມ​ກອງ​ປະຊຸມ​ທີ່​ລົງ​ເລິກ​​ເນື້ອ​ໃນ​ທີ່​ເປັນ​ປະ​ໂຫຍ​ດສຳລັບ​ປະ​ເທດ​ເຮົາ​ເປັນຕົ້ນຕໍ ພ້ອມ​ທັງ​ຈຳກັດ​ຈຳນວນ​ຜູ້​ແທນ​ທີ່​ເຂົ້າຮ່ວມ, ຫ້າມ​ແຫ່​ແຫນ​ກັນ​ໄປ “​ເປີດ​ຫູ​​ໄຂ​ຕາ” ຫລື ​ໄປ​ປະຊຸມ​ແບບ​ “ປ່ຽນ​ຖ້ຽວ” ກັນ. ​ແນ່ນອນ​ບັນຫາ​ນີ້​ຄົງ​ແກ້ບໍ່​ງ່າຍ​ປານ​ໃດ ​ເພາະ​ບາງ​ອົງການ​ຈັດຕັ້ງຕ່າງປະ​ເທດ​ນັ້ນ ມີ​ການ​ກຳນົດ​ຈຳນວນ​ຜູ້​ແທນ​ໃຫ້​ແບບ​ຕາຍ​ຕົວ ​ເພື່ອ​ເຂົ້າຮ່ວມ​ຄົບ​ກອງ​ປະຊຸມໜ່ວຍ​ງານ​ຍ່ອຍ​ຕ່າງໆ​ຂອງ​ອົງການ. ຈານ​ແຫຍ່​ວ່າ​ວິທີ​ແກ້​ບັນຫາ​ນີ້​ຄວນ​ພິຈາລະນາ​ໃຫ້​ຄັກໆ​ກ່ອນ​ຈະ​ເຂົ້າ​ເປັນ​ສະມາຊິກ​ຂອງ​ອົງການ​ສາກົນ ​ແລະ ພາກພື້ນຕ່າງໆ ຄື​ຕ້ອງ​ເບິ່ງ​ວ່າ​ເນື້ອ​ໃນ-​ເປົ້າໝາຍ​ຂອງ​ອົງການ​ນັ້ນໆ​ມັນ​ຊ້ຳຊ້ອນ​ກັບ​ອົງການ​ອື່ນໆ​ທີ່​ລາວ​ເຮົາ​ເປັນ​ສະມາຊິກ​ແລ້ວ​ບໍ່ ? ​ແລະ ອີກ​ຄຳ​ຖາມ​ທີ່​ຕ້ອງຕັ້ງຂຶ້ນຄື: ລາວ​ເຮົາ​ຈະ​ໄດ້ຜົນ​ປະ​ໂຫຍ​ດ​ໃດ​ແດ່​ຈາກ​ການ​ເປັນ​ສະມາຊິກ​ຂອງ​ອົງການ​ນີ້ ? ພວກ​ເຮົາ​ມີ​ຄວາມ​ສາມາດ​ພຽບພ້ອມ​ເພື່ອ​ເຄື່ອນ​ໄຫວ​ກັບ​ອົງການ​ນີ້​ແລ້ວ ຫລື ບໍ່ ? ​ແລະ ສຸດ​ທ້າຍ​ກໍ​ຄື ພວກ​ເຮົາ​ມີ​ງົບປະມານ​ພຽງພໍ ຫລື ບໍ່ ​ເພື່ອ​ຈ່າຍ​ເປັນ​ຄ່າ​ບຳລຸງ​ປະຈຳ​ປີ​ໃຫ້​ອົງການ​ດັ່ງກ່າວ ?. ນີ້​ຄືບັ້ງ​ໂຈດ​ທີ່​ຈະ​ຕ້ອງ​ແກ້​ໃຫ້​ໄດ້​ກ່ຽວ​ກັບ​ບັນຫາ​ນີ້.

- WhatsApp Image 2020 05 27 at 5 - ຢ່າໃຫ້ເຫດຜົນຕື້ນໆ ຟືນນະໂຍບາຍປະຢັດ
- WhatsApp Image 2020 05 27 at 5 - ຢ່າໃຫ້ເຫດຜົນຕື້ນໆ ຟືນນະໂຍບາຍປະຢັດ
error: Alert: ເນື້ອຫາຂ່າວມີລິຂະສິດ !!